交通路（上海市）

交通路是中华人民共和国上海市市区去西郊搭仔嘉定江苏咾啥个次干道。伊勒垃京沪铁路北面贴隔壁，跨静安、普陀2区。交通路分成两段，东段东起宝山路，西到会文路，勒垃静安区里向；西段东起静安区徐家宅路，过横跨彭越浦个普善桥以后么进仔普陀区，沿牢京沪铁路北面向西接真南路。^[1]。

交通路真南路路口附近

历史

交通路是1914年开始造个，从宝山路开始到伊个辰光个上海县界结束，长430多米。1926年开仔西段，直达暨南大学真如旧址门前。1934年，经整修成为锡沪公路一部分。普陀区个段原先是煤屑路，1950年改成弹硌路，1968年改成沥青混凝土，1984年拓宽交暨路到真南路路段，1985年开始拓宽中山北路到交暨路路段。1988年，伊延伸过仔真北路立交桥，全长7150米，宽12.2到24.2米。上海商学院高等技术学院交通路院区就勒垃交通路丄^[2][3][4]。

2017年底，金昌路到交通路道路新建、改扩建工程启动，西起普陀区嘉定区交界个金昌路金迎路路口东面，向东到普陀区静安区交界个大洋桥，全线是金昌路搭仔交通路组成，拿两条路连勒一道，交通路大洋桥以西个宽度会得拓宽到30到45米^[5][6]。