江川路街道

江川路街道，是中華人民共和國上海市閔行區下頭一隻街道辦事處，也就是老早個閔行衛星城。上海人習慣叫江川路街道箇塊地方「老閔行」，或者直接叫伊「閔行」^{[註 1][1][2]}，乃朝江川路街道個北街居委會差弗多是閔行老街^[2]。面積30.27平方公里，戶籍人口13.2萬人（2011年）。

歷史沿革

閔行，貤叫敏行^[3]，來勒原先上海縣個南界、松江府個東北面^[4]，名字賽過是黃浦江來勒箇埭水流急。因為地勢較高、水患少，傳有「三世修來住在閔行前」個講法^[5][6]。箇隻鎮到現在約莫700年哉^[7]。到清朝晚期，迭面已經商貿興盛。1928年市縣分治以後，閔行鎮是上海縣首鎮，店鋪林立，市面繁榮，人稱「小上海」。1950年代，上海市開始建設閔行工業區；1980年代，閔行衛星城大開發，老鎮拆脫弗少^[6]，留下來個項家老宅舊址、節孝坊咾啥個儕是閔行區文物保護單位^[8]。來勒1991年新個閔行區建立以後，老早個閔行鎮區域變成「老閔行」。2000年10月份，上海市人民政府下發文件，批准撤銷華坪路、碧江路兩隻街道辦事處，成立江川路街道辦事處^[9]。

道路命名

江川路街道里向1949年以後新造個路多用雲南地名命名，比方講江川路、劍川路^[10]。箇些道路還另有編號，當中東西向個是單數，南北向個是雙數。

• 一號路：江川路
• 二號路：華寧路
• 三號路：劍川路
• 四號路：臨滄路
• 五號路：景谷路
• 六號路：昆陽路
• 七號路：鶴慶路
• 十號路：瑞麗路
• 十二號路：蘭坪路

註釋

1. 譬如上海公交徐閔線，伊南端個終點站就叫「閔行」。