江杨北路站

江楊北路站勒垃上海寶山區江楊北路綏化路，是上海軌道交通3號線個地面側式車站、北面隻終點站，3號線、4號線共用個江楊北路車輛基地（寶鋼車輛段）西面。

江楊北路地鐵站

設計規劃

3號線北延伸早期規劃里向嘸沒箇站個，北端終點附近線路走向經過比較，確定是沿咾同濟路—富錦路跑個，對外運營部分到鐵力路站就結束哉，鐵力路站望西是出入庫線^[1]。必過勒垃寶鋼車輛段設計個辰光，決定拿原設計里向畀職工上下班用個簡易站台擴展成一座正式車站，拿車輛段里向個部分線路改成運營正線，箇就是現在個江楊北路站^[2]。

車站結構

箇站是側式站台2面2線地面車站。雖然箇站有兩隻站台，列車用個是站前折返方式，一般性只勒垃南面隻站台上下車。原先江楊北路車輛基地只有正線北面隻停車庫，進出庫線路亦接勒正線北面，故咾出入庫列車常停勒北面隻閒置站台里向；隨咾車輛基地擴建正線南面隻停車庫，2015年2月16號到28號，車站臨時停運^[3]，調整線路布置，接進新車庫，勒垃正線南面新增一道「第三線」^[4][5]。

第三線勒垃實際建設個辰光，因為工程原因比原設計短一截，開通以後因為信號系統裏向個長度幫實際弗一樣，導致過箇隻股道個列車三天兩頭畀信號系統扣停。但是呢，阿爾斯通對U200信號系統維護少，印度方面^{[註 1]}更新軟件多埭也解決弗了，運營方只好修改實地軌道電路個位置來解決問題^[7]。

地面層
	側式站台 · 開右邊車門
		█ 3號線 備用站台
		█ 3號線 往上海南站方向（鐵力路）
	側式站台 · 開右邊車門
	站廳	1號出口、票務服務、自動售票機、人工服務台

立勒付費區里向拍攝鐵軌末端 立勒付費區里向拍攝鐵軌末端  立勒地鐵站外頭拍攝鐵軌末端 立勒地鐵站外頭拍攝鐵軌末端  江楊北路站站台 江楊北路站站台  江楊北路站站廳 江楊北路站站廳  地下換向通道 地下換向通道

車站出口

江楊北路站1號口

江楊北路站個出口勒垃站廳南面，有得無障礙坡道。

接駁換乘情況

江楊北路地鐵站開通仔麼，因為配套交通弗方便，車站周邊有較多非法營運車輛（「黑車」）^[8]。2008年7月份，車站南側造出來江楊北路綜合交通樞紐開工，有多座公交站台搭仔P+R停車場，2009年10月份基本完工^[9]，必過到2010年5月底纔正式交付畀公交公司，公交樞紐開通運營^[10]，配套個P+R停車場繼續閒置到2016年2月份纔對外開放^[11][12]。雖然公交樞紐開通仔麼，公交部門新開仔幾條線路，因為班次少、嘸沒覆蓋月浦農村，黑車還是莫牢牢止^[13][14]。

江楊北路P+R停車場有96隻停車位，工作日腳基本浪向好停滿，日均周轉率（停車輛次比泊位數量）約1.04，也就是平均每日天有100部車子停進來^[15]。

註釋

1. 3、4號線開通個辰光全線用Alstom U200信號系統，箇系統大部分客戶集中勒印度城市軌道交通系統，故咾2014年阿爾斯通拿箇系統業務轉移畀印度方面。後來3、4號線信號改造，因為箇技術能力忒推板，運營方決定徹底廢棄整隻現有U200系統^[6]。