黃梅雨

黃梅雨（上海閒話：⁶waon-me-yu）指春夏之交冷熱空氣交鋒形成個鋒面雨，即每年6月至7月之間江淮地區、日本中南部搭韓國南部埃眼戶蕩持續陰勢天搭仔有雨個氣候現象。等黃梅天過脫，箇眼場化兩樣生個天氣開始由太平洋副熱帶高壓主導，正式進入熱天。梅雨發生辰光齊巧是中國江南梅子個成熟期，個咾謳「黃梅雨」。外加因得仔長期落雨，導致衣裳、食品咾啥易如發霉，梅雨貤謳「霉雨」。

成因

每年大約模張5月上旬，北方來個冷空氣搭從南方北上個暖空氣勒華南地區匯合，形成脫華南准靜止鋒。大約模張到著6月中旬，暖空氣勢力增強，准靜止鋒北移至江南、江淮地區，成江淮准靜止鋒（貤謳梅雨鋒）。《月令廣義》裏向就寫有「芒種後逢丙入梅，小暑後逢未出梅」。^[1]7月上旬，准靜止鋒再北移至日本、韓國一帶。因得仔南來個暖空氣夾帶大量水汽，碰着較冷氣團，就會產生大量對流活動。箇段辰光冷暖空氣勢力差勿多，以致形成准靜止鋒停留拉上述埃眼戶蕩。

規律

梅雨開始個日腳謳「入梅」或「立梅」，結束箇日謳「出梅」或「斷梅」。大致上緯度越高，入梅越晏。長江中下游地區，平均每年6月中旬入梅，7月中旬出梅。日本本土大約模張6月上旬入梅，7月中下旬出梅。^[2]

夏曆算法

入梅：在芒種起頭一隻丙日；出梅：在小暑起頭一隻未日。

入 梅	規定入梅日	芒種日腳	芒種後頭一隻丙日
	芒種當天為丙日	1882年6月6日（丙子）	1882年6月16日（丙戌）
	芒種後頭一隻丙日	2016年6月5日	2016年6月13日（丙寅）
出 梅	規定出梅日	小暑日腳	小暑後頭一隻未日
	小暑當天為未日	2001年7月7日（辛未）	2001年7月19日
	小暑後頭一隻未日	2016年7月7日	2016年7月12日（乙未）

氣象算法

入梅日：前頭五日天，副高來拉東經120°度個脊線≥北緯18°，外加至少有得三天日均氣溫高於22攝氏度；後頭五日天，必須有得四天落雨。