ოორუე კავკაცია
From Wikipedia, the free encyclopedia
From Wikipedia, the free encyclopedia
ოორუე კავკაცია — გეოგრაფიული აკანი ევროპაშ დო აზიაშ სანძღოწკჷმა, კავკაციაშ ნორთი. თიში ტერიტორიაშ უდიდაში ნორთი რუსეთიშ აკოდგინალუაშა მიშმურს. ოორუე კავკაცია ადმინისტრაციულო ირთუ გეჸვეჯ ართულეფო:
| სუბიექტი | სტატუსი | ადმ. ცენტრი | ფართობი | მახორობა |
|---|---|---|---|---|
| კრასნოდარი | აკანი | კრასნოდარი | 76,0 | 4.744.000 |
| სტავროპოლი | აკანი | სტავროპოლი | 66,5 | 2.497.000 |
| ადიღე | რესპუბლიკა | მაიკოპი | 7,6 | 422.000 |
| დაღესტანი | რესპუბლიკა | მახაჩყალა | 50,3 | 1.737.000 |
| ინგუშეთი | რესპუბლიკა | მაგასი | 4,6 | 180.000 |
| ყაბარდო-ბალყარეთი | რესპუბლიკა | ნალჩიკი | 12,5 | 715.000 |
| ყარაჩაი-ჩერქეზეთი | რესპუბლიკა | ჩერკესკი | 14,1 | 390.000 |
| ჩეჩნეთი | რესპუბლიკა | გროზნო | 15,9 | 980.000 |
| ოორუე ოსეთი | რესპუბლიკა | ვლადიკავკაზი | 8,0 | 612.000 |
ჯოხოდვალას ოორუე კავკაცია შხირას ჩილათირო გჷმირინუანა რუსეთიშ ობჟათე ფედერალური ოლქიშ ეიოშინალო[ოხვილუ წყუშ მეწურაფას].
2006 წანაშე 2010 წანაშ მელახშახ ყაზბეგი–ჟიმოლენი ლარსიშ აკა კანონიერი ოხურგე–გჷმატებელი პუნქტი საქორთუოშ დო რუსეთიშ ხურგას კილერი რდჷ რუსეთიშ ცალჸურეიანი ინიციატივათ.[1]
თიჟამიან პრეზიდენტ მიხეილ სააკაშვილქ, 2010 წანაშ 11 გჷმათუთას ხემაჭარჷ ზოჯუალას, ნამუშ მეჯინათ 13 გჷმათუთაშე ჩეჩნეთიშ, ინგუშეთიშ, ოორუე ოსეთიშ, დაღესტანიშ, ყაბარდო-ბალყარეთიშ, ყარაჩაი-ჩერქეზეთიშ დო ადიღეშ რესპუბლიკეფს ინოჭარილი რუსეთიშ მენოღალეეფშო 90 დღარი უვიზო რეჟიმი მანჯაფილ იჸიდჷ საქორთუოშ ხურგაშ გინოჭკირუაშ ბორჯის.[2]
საქორთუოშ გალენურ საქვარეფიშ მინისტრიშ მოაბანე, ნინო კალანდაძექ 11 გჷმათუთას გაცხადჷ, ნამჷ-და ოორუე კავკაციაშ რესპუბლიკეფს მახორუ მენოღალეეფშო სავიზო წესეფიშ გოლექინაფა გოპიჯუ თი ფაქტიქ, ნამჷ-და ყაზბეგი–ჟმოლენი ლარსიშ ოხურგე გჷმატებელი პუნქტის ვიზეფი ვეგჷნმიჩამუ დო თე რესპუბლიკეფიშ მახორუეფს ოსქირონე ხურგაშ გჷნოჭკირუაშო ვიზეფიშ მიოღებელო რუსეთიშ ნანანოღაშა უწიენდეს ულა. რუსეთიშ დო საქორთუოშ შქას თე აკა ლეგალური ოხურგე გჷმატებელი პუნქტი მელახშე გინწყუ. თეიშახ, დახე 4 წანაშ გოძვენას რუსული კუნთხუშ ინიციატივათ მიმულა თე მალობათ მეჭყვადილი რდჷ. საქორთუოს რუსეთიშ მენოღალეეფშო ცალურე დოწესაფილი აფჷ გოლექინაფილი სავიზო რეჟიმი, მუთ თის შანენს, ნამჷ-და თინეფს აეროპორტეფს, საქორთუოშ ხურგაშ გჷნოკვათუაშ ბორჯის შეულებჷნა ვიზეფიშ ეჭოფუა.
რუსეთიშ გალენურ საქვარეფიშ სამინისტროქ საქორთუოშ ხეშულობაშ გჷნოჭყვიდირი, ცალჸურე გააუქვას სავიზო რეჟიმი ოორუე კავკაციაშ რესპუბლიკეფს მახორუ მენოღალეეფშო, პროვოკაციათ აფასჷ.[3]
სააგენტო „კავკაზსკი უზელიშ“ ინფორმაციათ, ოორუე კავკაციაშ რესპუბლიკაშ მახორუეფი ხუჯ დუკინეს საქორთუოშ გჷნოჭყვიდირს სავიზო რეჟიმიშ გოუქვაფაშ გეშა. თინეფიშ არზით, თენა მონწყუნს მიარე პრობლემას, ნამუთ თეიშახ საქორთუოშ ხურგაშ გჷნოკვათუაშახ მუთმოხვადუდესინ. თეწკჷმა ართო, თე ადამიერეფქ გჯმოხანტეს შეშფოთაფა, ნამჷ-და რუსეთიშ ხეშულობაშქ შილებე გაკონწარას მუნეფიშ მენოღალეეფშო სახენწჷფო ხურგაშ გჷნოჭკირუაშ წესეფი.
ჩეჩნეთიშ მენოღალეეფი გჷმოხანტჷნდეს გოკვირაფას საქორთუოშ გჷნოჭყვიდირიშ გეშა რუსეთიშ ნეგატიური რეაქციაშენ.[4]
თეიშახ „კავკაზსკი უზელი“ ჭარუნდჷ ადიღეშ მახორუეფიშ მოარზებაშ გეშა, ნამუეფქჷთ ყაზბეგი–ჟიმოლენი ლარსიშ ოხურგე პუნქტიშ გონწყუმა აფასეს, მუჭოთ ორთაშობური, მარა ვარსულღებული ბიჯგი, თიშ გეშა, ნამჷ-და მეძობელ კრასნოდარიშ აკანიშ მახორუეფს სავიზო რეჟიმიშ გოუქვაფა ვახუნ.[5]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
