From Wikipedia, the free encyclopedia
Ji̍t-pún Tang-pak tē-hng tē-tāng hoat-seng tī tong-tē sî-kan 2011 nî 3 goe̍h 11 ji̍t 14 sî 46 hun; tē-tāng tiong-sim tī Ji̍t-pún Tang-pak tē-hng Sanriku ê kīn-hái. Tē-tāng ê lēng-liōng kui-bô͘ ū M9.0,[1] sī Ji̍t-pún ū kho-ha̍k kì-lio̍k í-lâi siāng toā ê tē-tāng.
Tē-tāng ín-khí toā kui-bô͘ ê hái-tiòng kap hoé-chai, koh ū goân-chú-le̍k hoat-tiān-só͘ ê sún-hāi. Kun-kù 2017 nî 3 goe̍h 10 ji̍t ê pò-kò, ū 15,893 lâng sí-bông; 2,553 lâng sit-chong.[2]
Kun-kù Bí-kok USGS ê koan-chhek, chú-chìn ê lêng-liōng kui-bô͘ ū M9.0.[1] Tē-tāng ê tiong-sim tī Tang-pak tē-hng tang-pêng kīn-hái, tāi-iok lî Osika poàn-tó 130 kong-lí, chhim-tō͘ 24.4 kong-lí chó-iū.[3][4]
Tī Ji̍t-pún chāi-tē, Khì-siōng-thiaⁿ kā tē-tāng hō chò "Heisei 23 nî (2011 nî) Tang-pak tē-hng Thài-pêng-iûⁿ chhiong tē-chìn" (平成23年(2011年)東北地方太平洋沖地震).[5] Lēng-goā mā ū NHK só͘ hō ê "Tang-pak Koan-tang toā chìn-chai" (東北関東大震災),[6][7] Sankei, Asahi ê "Tang Ji̍t-pún toā chìn-chāi" (東日本大震災)[8] téng-téng.
Kàu 4 goe̍h 12 ji̍t, lóng-chóng ū chhiau-koè 410 kài M5.0 í-sōng ê î-chìn.[9]
Miyagi-koān Sendai-chhī ê hái-hoāⁿ tī hái-tiòng chhim-hāi liáu-āu hoat-kiàn 200 kàu 300-ūi sí-chiá.[10][11]. Tī Iwate-koān ê Rikuzentakata-chhī chhī-ke mā hoat-kiàn 300 kàu 400-ūi sí-chiá.[12]
Chiàu 2017 nî 3 goe̍h 10 ji̍t Ji̍t-pún Kéng-chhat-thiaⁿ ê pò-kò, thóng-kè ū sí-bông 15,893 lâng, sit-chong 2,553 lâng, siū-siong 6152 lâng. Kok-tē sò͘-jī chiàu ē-bīn ê piáu:[2]
Hêng-chèng-khu | Sí-bông | Sit-chong | Siū-siong |
---|---|---|---|
Pak-hái-tō | 1 | 3 | |
Aomori-koān | 3 | 1 | 112 |
Iwate-koān | 4,673 | 1,122 | 213 |
Miyagi-koān | 9,540 | 1,230 | 4,145 |
Akita-koān | 11 | ||
Yamagata-koān | 2 | 29 | |
Fukushima-koān | 1,613 | 197 | 183 |
Tang-kiaⁿ-to͘ | 7 | 117 | |
Ibaraki-koān | 24 | 1 | 712 |
Totigi-koān | 4 | 133 | |
Gunma-koān | 1 | 42 | |
Saitama-koān | 45 | ||
Tiba-koān | 21 | 2 | 258 |
Kanagawa-koān | 4 | 138 | |
Niigata-koān | 3 | ||
Yamanasi-koān | 2 | ||
Nagano-koān | 1 | ||
Sizuoka-koān | 3 | ||
Gihu-koān | |||
Mie-koān | 1 | ||
Tokusima-koān | |||
Koti-koān | 1 | ||
Chóng-kè | 15,893 | 2,553 | 6,152 |
Tē-tāng ín-khí ê hái-tiòng tùi Sanriku tē-khu chō-sêng chin toā ê ûi-hāi, Iwate-koān kap Miyagi-koān lóng siù toā hái-tiòng lâi chhim-hāi, chin choē lio̍k-tē hō͘ im khì. Ji̍t-pún kok tē toā-hūn só͘-chāi mā lóng hoat-pò͘ hái-tiòng kéng-pò.
Tû-liáu Ji̍t-pún, tī Thài-pêng-iûⁿ sì-chiu-ûi, pâu-hâm Tâi-oân, Hui-li̍p-pin, Lō͘-se-a, Niú-se-lân, Guam kap chit-koá kî-tha ê Thài-pêng-iûⁿ tó-sū, koh ū pō͘-hūn ê Bí-chiu iân-hái, long ū hoat-pò͘ hái-tiòng kéng-pò, mā koan-chhek tio̍h kui-bô͘ put-téng ê chúi-tiòng.
Hái-tiòng tī Bí-kok California mā ín-khí chāi-hāi.[13]
Tī Miyagi-koān ê Kesennuma-chhī in-ūi tàng-iû tùi iû-chô goā sia̍p, ín-khí choân chhī toā kui-bô͘ hoé-sio.[14] Sendai-chhī ê JX kong-si chè-iû-só͘ mā ū chhut hoé ê chêng-hêng.[15]
Tī Tiba-koān, Itihara-chhī, mā ū Cosmo Chio̍h-iû kong-si ê chè-iû-só͘ po̍k-chà.[16] Tī Tiba-chhī, JFE Kǹg-thih kong-si ê chè-thih-só͘ mā ū po̍k-chà ê chêng-hêng.[17]
14 ji̍t, Iwate-koān Morioka-chhī ê pa̍h-hoè-tiàm po̍k-chà, chō-sêng siong-bông.[18]
Kúi-a ūi ê hoat-tiān-só͘ lóng thêng-chí ūn-chok. Aomori-koān, Akita-koān, Iwate-koān choân-bīn thêng-tiān; Yamagata-koān, Miyagi-koān toā-hūn thêng-tiān; Kui-ê Tang-pak tē-hng tāi-iok ū 440 bān hō͘ thêng-tiān.[19] Koan-tang tē-hng mā ū 405 bān hō͘ thêng-tiān.[20]
Tī tē-tāng liáu-āu, Ji̍t-pún kok tē Tang-pak Tiān-le̍k kap Tang-kiaⁿ Tiān-le̍k kong-si ê kong-tiān tē-khu si̍t-si kè-oē-sèng ê hiān-tiān.[21][22]
Tang-kiaⁿ Tiān-le̍k kong-si ê Hukusima Tē-it Goân-chú-le̍k Hoat-tiān-só͘ ê 1-hō-ki goā-khak hoat-seng po̍k-chà, ū chió-liōng hòng-siā-sèng bu̍t-chit ia̍t chhut, hū-kīn chū-bîn so͘-khai.[23] 14 ji̍t, kâng chi̍t keng hoat-tiān-só͘ ê 3-hō-ki chài po̍k-chà. Nn̄g kài ê po̍k-chà sī chúi-sò͘ chū-chi̍p chō-sêng.[24]
15 ji̍t, 2-hō-ki ê goân-chú-lô͘ po̍k-hoat, iông-khì ū sún-siong; lēng-goā 4-hō-ki ê jiân-liāu-chô mā po̍k-chà.[25]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.