Pang-chān:日本野球代表隊

日本野球代表隊（日本語：野 (や)球 (きゅう)日 (にっ)本 (ぽん)代 (だい)表 (ひょう) ^{yakyū nippon daihyō}）是日本兮野球國家代表隊^[2][3]，偏名 Samurai Japan（侍 (さむらい)ジャパン _{samurai japan}；抑是翻譯做日本武士隊）。

Chit phiⁿ bûn-chiuⁿ ū Pe̍h-ōe-jī ê pán-pún. Chham-khó chit phiⁿ bûn-chiuⁿ ê Pe̍h-ōe-jī pán-pún.

日本野球代表隊
國家	日本
協會	全日本野球協會 [ja]、日本野球機構
聯合會	亞洲野球總會
總教練	井端弘和
制服 主場 客場
WBSC 排名
當前排名	1 （2024年12月31）[1]
上好排名	1（頭一擺佇2014年）
上䆀排名	3（2012年）
世界野球經典賽
參賽次數	5（頭一擺佇2006）
上好成績	金牌（2006、2009、2023）
世界野球12強賽
參賽次數	3（頭一擺佇2015）
上好成績	冠軍（2019）
奧運
參賽次數	5（頭一擺佇1992）
上好成績	金牌（2021）
世界盃
參賽次數	15（頭一擺佇1972）
上好成績	銀牌（1982）
洲際盃
參賽次數	15（頭一擺佇1973）
上好成績	金牌（1973、1997）

奧運獎牌紀錄
男子野球
	1996年 Atlanta	團隊
	1992年巴塞隆納	團隊
	2004年亞典	團隊
	2020年東京	團隊

2009年世界野球經典賽總決賽城島健司佮達比修有

日本野球代表隊嘛是目前唯一佇世界野球經典賽、世界野球12強賽佮夏季奧運野球攏得着冠軍抑金牌兮三冠王代表隊，實力是亞洲傳統三強（日本、臺灣、韓國）內底上強兮。

歷史

1964年頭一擺參加奧運，是奧運史上頭一場完成九局兮野球比賽。到今日本已經是夏季奧運兮常客，以早日本隊主要是以業餘選手為主、職棒選手較少，2003年亞洲野球錦標賽才頭一擺完全由日本職棒兮球員組成。

2006－2009年

2006年世界野球經典賽頭一擺徵召佇美國職棒大聯盟效力兮日本球員，毋過過程無順利，落尾干焦鈴木一朗佮大塚晶則入隊。經典賽開始進前普遍認為日本隊會當以A組第一兮身份進入八強，但是佇預賽上尾一戰以2:3輸予南韓隊，變成分組第二晉級。複賽頭一場出戰美國隊，因為主審兮嚴重誤判致使日本隊以3:4輸球；第二戰日本隊以6:1拍敗墨西哥，但是上尾一戰閣以1:2輸予南韓隊，最後靠墨西哥拍敗美國，比較失分率了後（RA/9），以分組第二晉級四強。佇準決賽內底以6:0拍敗南韓隊晉級冠軍戰。佇冠軍戰中以10:6拍敗強敵古巴隊，得着頭一屆世界野球經典賽兮冠軍。

2008年北京奧運選有中央聯盟優勝經驗兮星野仙一做國家隊總教練，並且順利拍贏資格賽得着奧運名額。毋過落尾佇四強賽佮銅牌戰輸予韓國佮美國，干焦得着第四名。後來總教練夆質疑伊兮調度較佮意使用家己兮選手，忽略其他狀況較好兮選手，所以最後日本隊共國家隊兮總教練換做讀賣巨人兮總教練原辰德。

2009年世界野球經典賽，日本佇決賽順利拍敗韓國得着冠軍，達成經典賽二連霸。

2010年代

2011年決議共日本野球代表隊常態化，並且宣布代表國家隊兮新稱呼「侍ジャパン」（Samurai Japan）^[4]。

2013年世界野球經典賽雖然日本隊拍入去四強，但是成績佮戰況較䆀，佇八強差一點仔予臺灣淘汰，四強閣輸予波多利哥，落尾得着季軍。仝年，小久保裕紀接任山本浩二成做新兮總教練^[5]。2014年底日本野球機構（NPB）佮日本棒協（BFJ）成立日本野球公司（NPB Enterprise），國家隊開始行向公司化佮體制化，包含組訓、選儂、常態化兮情蒐、後勤攏會當落實，商標、LOGO嘛攏會使提來營利，予國家隊有長期穩定兮資源^[6]。

2015年，第一屆世界野球12強賽佇準決賽予韓國倒贏，落尾得着第3名。2017年世界野球經典賽雖然仝款拍入去四強，但是仝款佇四強賽輸球，連紲兩屆經典賽得着季軍。後來小久保裕紀請辭，由稻葉篤紀接任。

2019年，佇第二屆世界野球12強賽金牌戰內底拍敗頂一屆冠軍韓國隊，得着日本隊兮頭一个12強冠軍。

2020年代

2023年，井端弘和成做國家隊總教練^[7][8]。

2024年世界野球12強賽，井端弘和佇徵召球員誠無順利，除了規定大聯盟40儂名單內底無法度徵召兮大谷翔平、今永昇太等等大聯盟球員以外，日職頂尖兮球員像佐佐木朗希、近藤健介、岡本和真嘛攏婉拒徵召抑是佇納入28儂名單了後退賽^[9]，落尾以洋聯球星辰己涼介、央聯強投戶鄉翔征、高橋宏斗等等做主體出戰12強賽。佇預賽B組以五戰攏贏晉級複賽，並且佇複賽兮三戰嘛全部拍贏，但是佇冠軍戰予臺灣以4:0完封得着亞軍，除了予日本無緣12強衛冕、終結日本佇國際三大賽「世界冠軍」三連霸（2019年世界野球12強賽、2020年奧運、2023年世界野球經典賽），嘛予日本自2019年12強複賽開始佇國際賽事兮27連勝斷去^[10]。