Chhî Jio̍k-hi

Chhî Jio̍k-hi (2000 nî 11 goe̍h 1 hō chhut-sì ) sī Tâi-oân ê chit-gia̍p iá-kiû soán-chhiú, bo̍k-chiân tī Tiong-hôa Chit-pāng Bī-choân Liông hāu-le̍k, siú-pī ūi-tì sī tâu-chhiú. 2019 nî chham-ka kùi-tiong soán-siù-hōe hō͘ Bī-choân Liông tī thâu-chi̍t-lûn tē-6-ūi kéng ji̍p-khì^[1].

Chhî Jio̍k-hi 徐若熙
Bī-choân Liông – No. 18
Tâu-chhiú
Chhut-sì: 2000 nî 11 goe̍h 1 ji̍t （2000-11-01）(24 hòe)  Tiong-hôa Bîn-kok Thô-hn̂g-chhī
Táⁿ-kek: chiàⁿ Tâu-kiû: chiàⁿ
Chho͘-chhù chhut-sài
2021 nî 3 goe̍h 17, tī Bī-choân Liông
Seng-gâi sò͘-kì thóng-kè (chì 2024 nî ûi-chí)
sèng-tâu — pāi-tâu	11 — 11
sa̋n-sín — sì-sí	229 — 56
hông-gū-lu̍t	2.64
Tūi-ngó͘
Bī-choân Liông (2019 nî 8 goe̍h 29－)
Seng-gâi cheng-chhái piáu-hiān kah ti̍t-chióng
Tiong-hôa Chit-pāng nî-tō͘ chóng-koan-kun: 2023 Chóng-koan-kun-sài MVP: 2023

Chhî Jio̍k-hi

Tit-kàu ê chióng
Lâm-chú iá-kiû
Tāi-piáu  Tiong-hôa Tâi-pak
A-chiu Iá-kiû Kím-phiau-sài
	2023 nî Tâi-pak	thoân-tūi

Ha̍k-seng Sî-kî

Chhî jio̍k-hi seⁿ tī Thô-hn̂g-chhī. Tī Pêng-tìn Ko-tiong tha̍k-chheh ê sî bat in-ūi chiàⁿ-chhiú chhiú-āu-khiau nńg-kut ê būn-tê khui-to tī-liâu, hioh-khùn 4-kò-goe̍h liáu-āu, kiû-sok chìn-pō͘ chiâⁿ chē, ko-tiong ê sî siōng kín tio̍h í-keng ū 153 km/h ah^[2].

Chit-pāng Seng-gâi

2020 nî 2 goe̍h 28 tī koaⁿ-pān jia̍t-sin-sài tam-jīm thâu-chi̍t-chiàn ê sian-hoat tâu-chhiú, bīn-tùi Tiong-sìn Hiaⁿ-tī kan-na tâu 2-kio̍k tio̍h sit 5-hun. Tān-sī tī gû-tiâu jia̍t-sin ê sî tio̍h kám-kak chiàⁿ-chhiú bô sóng-khoài, in-ūi chìn-chêng tio̍h bat kiám-cha--kòe, hoat-hiān ū kut-chhì ê būn-tê, āu-lâi keng-kòe i-seng koh kiám-cha liáu-āu, khak-tēng beh tī kâng-nî 4-goe̍h 28 chìn-hêng chhiú-āu-khiau kut-chhì chhiú-su̍t.^[3]

2021 nî 3 goe̍h 17, Tiong-chit seng-gâi it-kun thâu-chi̍t-pái chiōⁿ-tiôⁿ tâu-kiû, sian-hoat tâu 3.2-kio̍k, sàng-chhut 11-pái sa̋n-sín, hőng phah 3-ki an-táⁿ, chi̍t pái sí-kiû, bô sit-hun, siōng kín ê kiû-sok ū 154 km/h, mā-sī sin-lâng thâu-chi̍t-pái chiōⁿ-tiôⁿ chêng-kó͘-bô ê sa̋n-sín kì-lo̍k^[4][5]. Bī-choân Liông ūi-tio̍h pó-hō͘ Chhî Jio̍k-hi, ū hān-chè i ê tâu-kiû sò͘.

2022 nî kiû-kùi in-ūi chhiú-āu-khiau ê siong éng-hiáng--tio̍h, tī kiû-kùi tú-khai-sí ê sî-chūn bô-hoat-tō͘ pí-sài, keng-kòe kiám-cha liáu-āu, sui-jiân phêng-kó͘ sī iá m̄-bián khui-to tī-liâu, tān-sī su-iàu 2 kàu 3-kò-goe̍h ê sî-kan lâi ho̍k-kiān^[6]. Kâng-nî 7 goe̍h in-ūi ho̍k-kiān liáu bô-siáⁿ-hó, koat-tēng chìn-hêng Tommy John chhiú-āu-khiau kin-tòa tiông-kiàn chhiú-su̍t, pún-nî-tō͘ kiû-kùi khak-tēng bô-hoat-tō͘ koh pí-sài^[7].

Keng-le̍k

• Thô-hn̂g-chhī Tāi-ióng Kok-sió Siàu-pāng-tūi
• Thô-hn̂g Chhī-li̍p Sin-bêng Kok-tiong Chheng-siàu-pāng-tūi
• Thô-hn̂g Chhī-li̍p Pêng-tìn Ko-tiong Chheng-pāng-tūi
• Tiong-hôa Chit-pāng Bī-choân Liông (2020 nî－)

Chit-pāng Seng-gâi Sêng-chek

Nî-tō͘	Kiû-tūi	Chhut-sài	Sian-hoat	Sèng-tâu	Pāi-tâu	Tiong-kè	Kiù-oān	Oân-tâu	Oân-hong	Sì-sí	Sa̋n-sín	Chek-sit	Tâu-kiû kio̍k-sò͘	Chū-chek-hun-lu̍t	Hőng chiōⁿ-lúi-lu̍t
2021	Bī-choân Liông	20	19	3	7	0	0	0	0	25	98	28	81	3.11	1.11
2023	Bī-choân Liông	5	4	1	0	0	0	0	0	2	18	2	15.1	1.17	0.78
2024	Bī-choân Liông	20	18	7	4	1	0	0	0	29	113	26	94.2	2.47	1.11
Ha̍p-kè	3-tang	45	41	11	11	1	0	0	0	56	229	56	191	2.64	1.08

Te̍k-sû Sū-chek

2020 nî 10 goe̍h 2 hō, Tiong-chit jī-kun chóng-koan-kun-sài ê tē-3-chiàn tam-jīm sian-hoat tâu-chhiú, tâu-3-kio̍k bô sit-hun, kan-na hőng phah 2-ki an-táⁿ, sàng chhut 6-pái sa̋n-sín, koh tâu chhut 157 km/h ê kiû-sok, sī jī-kun chóng-koan-kun-sài kiû-sok ê sin kì-lo̍k (goân-té siōng kín ê kì-lo̍k sī 152 km/h), sin kì-lo̍k ê thâu 2-miâ lóng sī Chhî Jio̍k-hi (157km/h kah 153km/h)^[8].

2021 nî 3 goe̍h 28, tī Thian-bú Iá-kiû-tiôⁿ tùi-chiàn Hù-pang Hān-chiòng, tâu 4.2-kio̍k sàng chhut 10-pái sa̋n-sín, bô sit-hun, seng-gâi chêng 3-tiôⁿ lóng-chóng tâu chhut 26-pái sa̋n-sín, mā chhiau-kòe Koeh-lí Kiàn-hu tī 1999 nî ê 22 pái chiâⁿ-chò pún-thó͘ sin-lâng tâu-chhiú chêng-3-tiôⁿ ê sin kì-lo̍k.^[9]

2021 nî 8 goe̍h 8 hō, tī Sin-chng Iá-kiû-tiôⁿ tùi-chiàn Hù-pang Hān-chiòng, sian-hoat 12-tiôⁿ chóng-sǹg sī tit-tio̍h thâu-chi̍t-sèng, koh tī siōng khai-sí ê sî liân-sòa tâu chhut 8-pái sa̋n-sín, chiâⁿ-chò Tiong-chit ê sin kì-lo̍k (goân-pún khai-kio̍k liân-sòa sa̋n-sín ê kì-lo̍k sī 2019 nî 10 goe̍h 3 hō iû Bollinger tâu chhut ê 7-pái^[10]), lo̍h-bóe sian-hoat 5-kio̍k, sit 1-hun, sàng-chhut 12-pái sa̋n-sín, liông-tūi í 5:1 iâⁿ kiû, tit-tio̍h chit-pāng seng-gâi thâu-it-sèng.^[11]

2023 nî 11 goe̍h 12 Tâi-oân Tōa-sài tē-7-tiôⁿ, Bī-choân Liông phah-pāi Lo̍k-thian Thô-oân tit-tio̍h chóng-koan-kun, i sian-hoat 2-tiôⁿ, 1-pái sèng-tiôⁿ, tâu 11-kio̍k, 11-pái sa̋n-sín, chiâⁿ-chò Tâi-oân Tōa-sài MVP.

2023 nî 12 goe̍h 3 hō, 2023 nî A-chiu Iá-kiû Kím-phiau-sài khai-sí, sī thâu-chi̍t-pái ū chèng-sek sài-sū tī Tâi-pak Tōa-kī-tàn kí-pān, Chhî Jio̍k-hi tāi-piáu Tiong-hôa Tâi-pak sian-hoat bīn-tùi Hân-kok, chhòng-chō chiâⁿ chē Tōa-kī-tàn ê le̍k-sú kì-lo̍k, pau-koat tē-1-lia̍p hó-kiû, tē-1-pái sa̋n-sín, tē-1-ê sèng-tâu, lo̍h-bóe Chhî Jio̍k-hi 7-kio̍k 10-pái sa̋n-sín, jî-chhiáⁿ kan-na hőng phah-chhut 2-ki an-táⁿ, hō͘ Tiong-hôa-tūi í 4:0 iâⁿ Hân-kok.^[12][13][14]

2024 nî 4 goe̍h 6 hō tī Thian-bú Iá-kiû-tiôⁿ tùi-chiàn Thóng-it 7-ELEVEn Sai, tī 2-kio̍k-siōng hō͘ Lîm An-khó kòng chhut chi̍t-ki hőng-bú-láng, sī i ji̍p-khì chit-pāng 3-tang í-lâi thâu-chi̍t-pái hőng kòng hőng-bú-láng。