Koeh Chùn-lîn
Tâi-oân ê chit-gia̍p iá-kiû soán-chhiú From Wikipedia, the free encyclopedia
Remove ads
Koeh Chùn-lîn (1992 nî 2 goe̍h 2 ji̍t chhut-sì ) sī Tâi-oân ê chit-gia̍p iá-kiû soán-chhiú, siú-pī ūi-tì sī tâu-chhiú, bo̍k-chiân tī Tiong-hôa Chit-pāng Thóng-it 7-ELEVEn Sai hāu-le̍k. I chìn-chêng bat hāu-le̍k kòe Ji̍t-pún Chit-pāng Kî-gio̍k Se-bú Sai, Tiong-hôa Chit-pāng Hù-pang Hān-chiòng.
 | 這篇文章有漢字兮版本。 參考這篇文章兮漢字版本。 |
Tī Tâi-thé-tāi tha̍k-chheh ê sî, Koeh Chùn-lîn tio̍h tāi-piáu Tiong-hôa-tūi chham-ka kok-chè sài-sū, iû-kî sī tī 2014 nî A-ūn, 21U Sè-kài-poe Iá-kiû-sài hō͘ i tit-tio̍h hái-gōa ê koan-chù. Āu--lâi kah Kî-gio̍k Se-bú Sai chhiam-iok, pēng-chhiáⁿ chū 2015 nî khai-sí tī Ji̍t-pún Chit-pāng chhut-sài. I ê Ji̍t-chit seng-gâi siū-tio̍h bô-ún-tēng ê piáu-hiān kah siong-sè éng-hióng, lo̍h-bóe tī 2019 nî hőng sek-chhut. Tńg--khì Tâi-oân liáu-āu, i chham-ka 2020 nî Tiong-hôa Chit-pāng Soán-siù, hō͘ Hù-pang Hān-chiòng tī tē-jī-lûn chí-miâ. 2023 nî kùi-āu hō͘ Tâi-kǹg Hiông-eng tī khok-pian soán-siù chí-miâ, tān-sī á-bōe tī Tâi-kǹg chhut-sài tio̍h sûi hőng kau-e̍k khì Thóng-it 7-ELEVEn Sai.
Koeh Chùn-lîn tī chit-gia̍p sî-kî bat tāi-piáu Tiong-hôa-tūi chham-ka 2015 nî Sè-kài Iá-kiû 12-kiông Sài, 2017 nî Sè-kài Iá-kiû Keng-tián-sài, 2024 nî Sè-kài Iá-kiû 12-kiông Sài.
Remove ads
Seng-gâi
Koeh Chùn-lîn tī Sin-tek-chhī chhut-sì, tha̍k Sin-tek-chhī Se-mn̂g Kok-sió saⁿ-nî ê sî ka-ji̍p ha̍k-hāu ê siàu-pāng-tūi[1]. I ka-kī kóng sè-hàn ê sî bô kah-ì tha̍k-chheh tio̍h khì chham-ka kiû-tūi, i pún-lâi beh khì chham-ka chhiú-kiû-tūi bô sêng-kong, āu-lâi chiah ka-ji̍p iá-kiû-tūi[2]. Pit-gia̍p liáu-āu, i cháu khì Tâi-tiong tha̍k Se-oán Ko-tiong[1].
Koeh Chùn-lîn kok-sió ê sî sī pó͘-chhiú, kok-tiong khai-sí hùn-liān chò lāi-iá-chhiú[2], 2008 nî í pó͘-chhiú sin-hūn chham-ka A-chiu Chheng-siáu-pāng Kím-phiau-sài. Ko-tiong it-nî ê sî hō͘ kàu-liān hoat-hiān i ê tâu-kiû thian-hūn liáu-āu, tau̍h-tau̍h-á kái tam-jīm tâu-chhiú[3], i chò tâu-chhiú ê piáu-hiān mā hō͘ i khai-sí tit-tio̍h koan-chù[4][5][6]. I tī 2008 nî tē-it-kài Tâi-oân-poe thâu-chi̍t-pái iōng tâu-chhiú ê sin-hūn chhut-sài, tī 2009 nî Gio̍k-san-poe thâu-chi̍t-pái tam-jīm sian-hoat[2].
Koeh Chùn-lîn tī 2010 nî Gio̍k-san-poe hőng o-ló sī ông-pâi tâu-chhiú, kui-ê sài-sū i lóng-chóng chhut-sài 4-tiûⁿ tâu 34-kio̍k, ī-sài nn̄g-pái oân-hong tùi-chhiú, hông-gū-lu̍t 0.265, kan-na tī ho̍k-sài ê sî sit 1-hun[7], lo̍h-bé tit-tio̍h Tâu-chhiú-chióng kah Gio̍k-san Bêng-chheⁿ Kiû-oân-chióng ê chòe-ka tâu-chhiú[8]. Mā in-ūi i iu-ī ê piáu-hiān, ji̍p-soán 2010 nî Sè-kài Chheng-pāng Kím-phiau-sài ê Tâi-oân tāi-piáu-tūi[9], i tī tùi Hô-lân ê pí-sài lāi-té oân-tâu 9-kio̍k, sàng-chhut 18-pái sa̋n-sín, hőng khà chhut 4-ki an-táⁿ, chū-chek-hun 1-hun, lo̍h-bóe phah-iâⁿ tùi-chhiú chìn-kip 4-kiông[10], chòe-āu Tiong-hôa-tūi tit-tio̍h koan-kun[6].
Tāi-ha̍k Sî-kî
Koeh Chùn-lîn 2010 nî chìn-ji̍p Tâi-oân Thé-io̍k Ha̍k-īⁿ[chù 1]tha̍k-chheh. 2010 nî Mûi-hoe-kî Tāi-ha̍k Iá-kiû Kím-phiau-sài, i tī bīn-tùi Bûn-hòa Tāi-ha̍k ê pí-sài lāi-té tī tē-8-kio̍k chiap-thè Ông Ûi-tiong chiūⁿ-tiûⁿ, tī iân-tn̂g sài ê sî hō͘ Lîm Chó͘-kia̍t khà chhut chài-kiàn an-táⁿ su-kiû, hō͘ Tâi-oân Thé-īⁿ bô-hoat-tō͘ chìn-kip 4-kiông[12][13][14]. 2011 nî ê i tī koan-kun-sài lāi-té oân-tâu 9-kio̍k, tâu-chhut 9-pái sa̋n-sín, hőng khà chhut 5-ki an-táⁿ, í 2:0 oân-hong Ka-gī Tāi-ha̍k, hō͘ Tâi-oân Thé-īⁿ thâu-chi̍t-pái tī Mûi-hoe-kî Kím-phiau-sài lāi-té tit-tio̍h koan-kun[15][16][17].
Koeh Chùn-lîn chū 2011 nî khai-sí tāi-piáu Tiong-hôa-tūi chham-ka kok-chè sài-sū. Nî-tiong, i liân-sòa chham-ka Káng-kháu-poe kah Ka-ná-tāi Sè-kài Iá-kiû Thiau-chiàn-sài[18][19][20][21][22]. 10 goe̍h chham-ka Sè-kài-poe; ī-sài tē-jī-tiûⁿ tùi Pa-ná-má sian-hoat 3-kio̍k sit 7-hun chiâⁿ-chò pāi-tâu[23][24], tē-chhit-tiûⁿ tùi Hi-lia̍p sian-hoat 3-kio̍k bô sit-hun[25][26][27][28]. 11 goe̍h, i koh chham-ka 2011 MLB Choân-bêng-chheⁿ Tâi-oân Tōa-sài[29].
I tī 2012 nî Ha-liân-poe tùi Hô-lân tiong-kè bô sit-hun[30][31], tē-4-tiûⁿ bīn-tùi iû NCAA Tāi-ha̍k bêng-chheⁿ kiû-oân cho͘-sêng ê Bí-kok-tūi, chú-tâu 7.1-kio̍k sit 2-hun, sa̋n-sín 9-pái, tān-sī lo̍h-bóe in-ūi Tiong-hôa-tūi hőng oân-hong chiâⁿ-chò pāi-tâu[32][33]. I goân-té beh chham-ka 2013 nî Sè-kài Iá-kiû Keng-tián-sài Chu-keh-sài[34], tān-sī tī tī 2012 nî 11 goe̍h 14 khui-bō͘ chìn-chêng in-ūi chhiú-āu-khiau hoat-iām thè-chhut, ōaⁿ gōa-iá-chhiú Ko Kok-hui[35]. Āu--lâi sui-jiân siong í-keng hó--ah, tān-sī tio̍h bô hőng khó-lū chò hit-kài Keng-tián-sài ê Tiong-hôa tāi-piáu-tūi soán-chhiú[36][37][38].
2013 nî 10 goe̍h 14, tī Thian-chin Tang-a-ūn ê tâng-pâi-chiàn lāi-té, kah Lô Hôa-úi chò-hóe oân-hong Tiong-kok-tūi, lo̍h-bóe tit-tio̍h tâng-pâi[39].
2014 nî 9 goe̍h 23, tī Jîn-chhoan A-ūn ê tē-jī-chiàn lāi-té sian-hoat tùi-koat Thài-kok-tūi, chú-tâu 4-kio̍k, 2 an-táⁿ, sit 1-hun, 6-pái sa̋n-sín, 9 goe̍h 28 ê kim-pâi-chiàn sian-hoat tùi-chiàn Lâm-hân-tūi, chú-tâu 4.2-kio̍k sit 1-hun[40][41].
11 goe̍h 17, bīn-tùi Lâm-hân-tūi, Ji̍t-pún-tūi lóng sian-hoat tit-tio̍h sèng-tâu, pēng-chhiáⁿ hőng soán chò 21U Sè-kài-poe Iá-kiû-sài ê MVP[42].
Kî-gio̍k Se-bú Sai (2015－2019 nî)
2014 nî 10 goe̍h 21, Koeh Chùn-lîn ka-bêng Ji̍t-pún Chit-pāng Kî-gio̍k Se-bú Sai, chhiam-iok-kim 5,200-bān Ji̍t-phiò, nî-sin 1,200-bān Ji̍t-phiò, kiû-saⁿ pòe-hō 12-hō[43].
2015 nî 3 goe̍h 29, thâu-chi̍t-pái tī chú-tiûⁿ sian-hoat teng-pán gêng-chiàn O͘-le̍k-sū Béng-gû, chú tâu 5-kio̍k, sit 3-hun, Se-bú lo̍h-bóe í 5:4 phah-iâⁿ O͘-le̍k-sū, Koeh Chùn-lîn mā tit-tio̍h kò-jîn tī Ji̍t-chit ê seng-gâi thâu-chi̍t sèng[44]. 4 goe̍h 5 hō tē-jī-pái tī chú-tiûⁿ sian-hoat, gêng-chiàn Hok-kong Nńg-gîn Eng ê pí-sài chú tâu 8-kio̍k bô sit-hun, Se-bú lo̍h-bóe í 4:0 phah-iâⁿ Nńg-gîn, tit-tio̍h kò-jîn tī Ji̍t-chit ê tē-2 sèng[45].
2017 nî kiû-kùi, Koeh Chùn-lîn bô jīm-hô ê chhut-sài kì-lo̍k, kiû-kùi kiat-sok liáu-āu, i kā teng-lo̍k-miâ ê pheng-im kái-chò Hôa-gí ê "Kuo", pēng-chhiáⁿ kā pòe-hō kái-chò "69"[46].
Koeh Chùn-lîn 2019 nî kan-na tī it-kun chhut-sài 2-tiûⁿ. 6 goe̍h 6 hō bīn-tùi Kóng-tó Tang-iôⁿ Tāi sian-hoat 6-kio̍k sit 2-hun, tâu-chhut 5-pái sa̋n-sín, 2-pái pó-sàng kah 1-pái sí-kiû, hőng khà chhut 3-ki an-táⁿ, lo̍h-bóe tit-tio̍h sèng-tâu[47][48]. 6 goe̍h 13 bīn-tùi Tho̍k-māi kī-jîn[49], sian-hoat 4-kio̍k sit 4-hun, kî-tiong 3-hun sī chū-chek-hun, chiâⁿ-chò hit-tiûⁿ pí-sài ê pāi-tâu[50][51], i mā chū-án-ne tī pí-sài kiat-sok liáu-āu hőng pàng lo̍h-khì jī-kun[52][53].
2019 nî 10 goe̍h, Koeh Chùn-lîn kah kâng-tūi ê lú-Ji̍t Tâi-oân kiû-oân Liāu Jīm-lúi lóng hō͘ Kî-gio̍k Se-bú Sai sek-chhut[54][55][56].
Hù-pang Hān-chiòng (2020－2023 nî)
Koeh Chùn-lîn chham-ka 2020 nî Tiong-hôa Chit-pāng Soán-siù-hōe, tī tē-2-lûn hō͘ Hù-pang Hān-chiòng chí-miâ[57][58]. 2021 nî 11 goe̍h 9 hō, i oân-sêng Tiong-hôa Chit-pāng it-kun chho͘-teng-pán, bīn-tùi Bī-choân Liông sian-hoat 2.3-kio̍k sit 1-hun, tâu-chhut 5-pái sa̋n-sín, 1-pái pó-sàng, hőng khà chhut 3-ki an-táⁿ[59], m̄-koh i tī 2021 nî kiû-kùi kan-na chhut-sài 2-tiûⁿ niā-niā[60][61].
Koeh Chùn-lîn 2022 nî kiû-kùi tú khai-sí ê sî tio̍h in-ūi chiàⁿ-kha tio̍h-siong bô-hoat-tō͘ chiūⁿ-tiûⁿ pí-sài[62], hioh 1-kó͘-goe̍h liáu-āu chiah tī 5 goe̍h 10 hō bīn-tùi Lo̍k-thian Thô-oân sian-hoat[63][64][65], tâu 6-kio̍k sit 2-hun chiâⁿ-chò pāi-tâu[66][67][68].
Thóng-it 7-ELEVEn Sai (2024 nî－)
2023 nî 11 goe̍h 28, Koeh Chùn-lîn tī Tâi-kǹg Hiông-eng ê tē-2-pái khok-pian soán-siù lāi-té hőng kéng tio̍h[69][70][71], m̄-koh tī kâng-nî 12 goe̍h 27, i sûi hō͘ Tâi-kǹg Hiông-eng iōng-lâi hiòng Thóng-it 7-ELEVEn Sai kau-e̍k, ōaⁿ-tio̍h tâu-chhiú Kang Sêng-gān, hō͘ Koeh Chùn-lîn 29-kang tio̍h ōaⁿ nn̄g-kái kiû-tūi[72][73][74], Tâi-kǹg Hiông-eng mā tī 2024 nî 4 goe̍h 30 tiàm Tōa-pi-ô͘ Iá-kiû-tiûⁿ chú-tiûⁿ tùi-chiàn Thóng-it Sai ê pí-sài khai-sí chìn-chêng, kā i tī Tâi-kǹg ê 75-hō kiû-saⁿ sàng hō͘ Koeh Chùn-lîn chò kì-liām[75].
2024 nî 7 goe̍h 10 hō bīn-tùi Bī-choân Liông, Koeh Chùn-lîn iōng 99-kiû oân-tâu oân-hong, sàng-chhut 5-pái sa̋n-sín, 1-pái pó-sàng, hőng khà chhut 7-ki an-táⁿ, hō͘ Thóng-it Sai í 9:0 phah-iâⁿ[76], che sī i it-kun chit-pāng seng-gâi lāi-té thâu-chi̍t-pái oân-tâu, mā hō͘ i chiâⁿ-chò Thóng-it Sai Liāu Bûn-iông tī 2016 nî oân-tâu oân-hong liáu-āu thâu-chi̍t-ê ta̍t-sêng chit-hāng kì-lo̍k ê pún-thó͘ tâu-chhiú[77], mā-sī Tiong-chit chū 2015 nî ê Tēⁿ Khái-bûn liáu-āu koh-chi̍t-pái ū pún-thó͘ tâu-chhiú ta̍t-sêng siáu-káu oân-hong[78][79][80].
2024 nî, in-ūi Kó͘-Lîm Jōe-iông tio̍h-siong bô-hoat-tō͘ chham-ka Sè-kài Iá-kiû 12-kiông Sài, Tiong-hôa-tūi sûi ōaⁿ Koeh Chùn-lîn lâi pó͘ tâu-chhiú ê chiàn-le̍k[81][82][83][84][85]. I tī ī-sài tùi Ò-chiu ê pí-sài tam-jīm sian-hoat[86], chhut-tiûⁿ 3.2-kio̍k tâu-chhut 5-pái sa̋n-sín, 1-pái pó-sàng, sit 1-hun chek-sit[87][88][89][90], lo̍h-bóe Tiong-hôa-tūi í 11：3 phah iâⁿ Ò-chiu, pēng-chhiáⁿ tī Ji̍t-pún phah iâⁿ Kó͘-pa ê chōng-hóng chi-hā thê-chêng chìn-kip ho̍k-sài[91][92], chòe-āu Tiong-hôa-tūi mā tit-tio̍h Tâi-oân tī 12-kiông ê thâu-chi̍t-ê koan-kun.
2025 nî kiû-kùi khai-sí, Koeh Chùn-lîn ê pòe-hō kái chò tī kok-ka-tūi sú-iōng ê 75-hō, chit-ê hō-bé chìn-chêng sī kàu-liān Chu Goân-khîn leh iōng--ê[93][94]. I in-ūi tī chhun-hùn kî-kan tōa-thúi tio̍h-siong, hō͘ i tī khui-kùi bô-hoat-tō͘ chiūⁿ-tiûⁿ pí-sài[95][96], it-ti̍t kàu 5 goe̍h 14 chiah thâu-chi̍t-pái tī it-kun chhut-sài[97][98], tī 80-kiû ê hān-chè chi-hā, bīn-tùi Lo̍k-thian Thô-oân sian-hoat 2.1-kio̍k sit 5-hun chiâⁿ-chò pāi-tâu[99].
Remove ads
Chit-pāng Seng-gâi Sêng-chek
Ji̍t-pún Chit-pāng
Tiong-hôa Chit-pāng
Remove ads
Chù-kha
Chham-khó Chu-liāu
Gōa-pō͘ Liân-kiat
Wikiwand - on
Seamless Wikipedia browsing. On steroids.
Remove ads