文言

文言（粵拼：man4 jin4）係中國一種書寫文體，源自甲骨文同金文，用來記事。文言經歷幾千年演變，唔同時期文法同用字都有明顯分別。

二十世紀之前，文言幾乎係東亞各國嘅通用文體。中國喺新文化運動之後，以中國國語普通話為基礎嘅白話文，因為政府力推，慢慢取代咗文言文。除咗中國之外，其餘嘅國家都推行自己嘅國語，唔再用文言文。

比較

同標準官話白話文（現代中國語文）相比，文言言簡意賅。

比較	文言文	標準官話白話文／現代中國語文
長短	言簡意賅	相對冗長
出處用法	書面語為主	「我手寫我口」為主，亦經修飾。
語感	古雅精煉	通俗易明
用詞	單字已有獨立意思	多啲雙字詞
	一字多用	異字異用
	之	的
句末助語詞	已、矣、乎、也…	了、吧、啊、嗎…
文法詞組次序	靈活啲	次序明確
標點	標點少而簡（逗、句為主）	標點繁多
例	《桃花源記》、《醉翁亭記》、《庖丁解牛》、《出師表》、《六國論》…	魯迅《吶喊》自序、朱自清《綠》、冰心《紙船》、舒乙《香港：最貴的一棵樹》…
流傳	限於曾學習文言嘅人	廣傳於華文世界
習法	背誦為主，輔以字詞拆解	字詞拆解為主，輔以文法分析

承傳

香港

香港中國語文科，小學生已經要學文言文，中學生要讀得深入啲。

廣東話保存咗唔少文言文嘅字詞。例如：

• 「粵語音韻來自秦漢，語彙上溯先秦，大者來自唐宋，…粵語語法有先秦特色，如雙賓語語序^[1]…」
• 「粵語人寫通用中文，便要寫『做此等事，當心人頭落地』，與宋人白話無異^[2]。」
• 粵語保留好多古代漢語嘅用字^[3]，例如「靚」（「衣冠士女……莫不靚^{[註 1]}妝麗服」，明代《虎丘記》）、「幾時」（「明月幾時有」，宋代《水調歌頭》）

香港文壇曾經流行白話文、文言、廣東話嘅混合，三及第同文白夾雜（白話文加文言）。至今仍有少數作者鍾意用呢種風格寫作^[4]。

香港粵劇﹑粵曲﹑粵語流行曲以至小說家金庸嘅武俠小說作品用文白夾雜型式寫。

日本

睇埋：漢文訓讀

日本自從中國唐代文化交流，到片假名平假名普及後好多年，公函文書、碑文、經文…好多重係用漢字文言。稱之為漢文（かんぶん，Kanbun）。

日本石川縣金澤市兼六園內石碑碑文所見嘅漢字係文言文

韓國

喺韓國，文言文叫漢文（한문，Hanmun）。

越南

喺越南，文言文叫儒字（亦叫字儒，Chữ Nho）。

睇埋

• 文言虛字
• 三及第
• 雙層語言
• 新文學運動

註

1. 讀音係粵拼：zing6，唔係粵拼：leng3