Checksum

Checksum（借入粵語作粵拼：cek1 sam1，大致假借中文字測cek1琛），中文譯核對和、總和檢查碼，係一種用嚟檢驗啲數據有冇出錯嘅簡單方法。因為實際上未必真係數學上講嘅和，有時又叫核對值、核對碼。

圖解：將 input 嘅信息，用測琛函數將段嘢轉化做測琛冧把。

簡單講，佢涉及嘅係傳訊嗰方用一段演算法，由源數據嗰度產生出一個冧把，包括概念上用商餘計算將個冧把限制喺某個範圍^{[註 1]}；收訊嗰方接收到數據之後，就用同一演算法計個冧把應該係乜，如果收到同自己計嘅版本冇分別，就假定傳訊冇事，如果唔夾，就肯定有嘢錯咗。

做法

睇埋：密碼雜湊函數同商餘計算

測琛最基本嘅做法如下^[1]：

1. 傳訊方攞住一段想傳出去嘅數據，將段數據斬做 k 橛，每橛都係 n 必（好多時都係 16 必）咁長；
2. 傳訊方將呢 k 橛嘅冧把加埋一齊（講緊用二進制），最後得出一個 n 必咁長嘅總和（sum）；
3. 將個總和值做位操作非，即係將原先係 0 嘅冧把冚唪唥變晒做 1，而原先係 1 嘅冧把冚唪唥變晒做 0，得出測琛值；
4. 將測琛值黐落原本段數據嘅最尾嗰度，傳出。
5. 收訊方收到段數據，計一次測琛，計個測琛值出嚟，如果段數據（例如）畀人篡改過嚟，或者喺傳訊過程當中因為雜音走咗樣，收訊人計到嘅測琛值理應會同傳訊方傳嗰個唔同，噉就顯示段數據有輘輷。

—收訊人可以靠住測琛嘅做法，cek1 吓段數據啱唔啱。

例如如果想傳嘅數據係 10101001 00111001，分做兩橛（k = 2），每橛 8 必咁長（n = 8），噉要計測琛值：

 10101001
 00111001

做二進制加數，同時如果最大嗰個位要進位，就返轉頭進去最細嗰個位度：

 11100010

同呢段冧把做位操作非：

 00011101 # 測琛值

不過事實已經表明咗，測琛呢種做法唔係咁靠得住。而家想像段數據嘅其中一個必走咗樣，同時又有另外一個必走咗樣，如果兩個必嘅位置啱，係有可能出現一種情況，係最後得出嘅測琛值不變嘅—而噉就會令到齋靠測琛值嚟做檢驗嘅收訊者探測唔到個錯誤。

變化

喺電腦，呢段演算法嘅標準定義係喺16位元嘅限制之下就咁將源數據經某種切割方法之後加埋一齊（即係將和限制咗喺 65536 嘅餘數）^[2]:88，但係實際上未必係限制喺16位元，亦未必係用加法，例如以前8位元處理器通行嗰陣，核對值可以只係限制喺8位元（即係 256 嘅餘數），或者可能會用邏輯異或^[3]:270-271。喺電腦以外好有可能唔係限制個餘數喺2嘅冪，而係將餘數限制喺10或者其他嘅數；例如日常生活中常見嘅國際標準書號，最後一個冧把就可以話係一個核對值，但係舊版嘅 ISBN-10 係用11嘅餘數，而新版嘅 ISBN-13 就係用10嘅餘數，佢用嘅演算法亦唔係就咁將啲數字加埋就算。

教學

• Error Detection Code - Checksum, GeeksForGeeks （英文），講解測琛嘅概念。