完形心理學

完形心理學（參見德文：Gestaltpsychologie），又有半音譯噉譯做格式塔心理學，係個心理學門派，由德國心理學家韋特墨、苛勒同考夫卡喺20世紀頭創立。呢個學派主張人腦嘅感知係整體嘅。

完形原則

根據完形心理學嘅研究，人嘅腦傾向憑以下原則組織見到嘅嘢，例如^[1]：

• 接近原則^[2]：當一個人見到一柞同類物件嗰陣，會傾向將離彼此相近、離組外物件遠嗰啲當做同一組，例如係下面有兩幅圖，左手邊嗰幅會傾向俾人當做「一柞圓圈」，而右手邊嗰幅就會傾向俾人睇做「三組圓圈」^[3]。

• 相似原則^[4]：當一個人見到一柞物件嗰陣，傾向將外形上相似嘅當做一組－「外形上相似」可以包括形狀、色水、以及第啲外形上嘅特徵。以下圖為例，人傾向將灰色圓圈睇做一組，同埋將黑色圓圈睇做一組^[3]。

• 封閉原則^[5]：人傾向將物件視為完整嘅，並且忽略物件嘅缺口（只要啲缺口唔大得滯）。好似係下面嗰幅圖噉，下圖當中查實並冇任何完整嘅圖形，但多數人望到幅圖都會話自己見到一個圓形同一個四方形－忽略咗嗰啲細嘅缺口^[3]。

相關概念

附圖 1；好似呢幅圖噉嘅視覺現象成日俾人攞嚟做多穩態嘅例子。

• 多穩態：廣義上係指一個系統有多個穩定嘅均衡點，個系統可以喺呢啲均衡點之間變換，不過均衡點之間嗰啲狀態係唔穩定嘅^[6]；喺完形心理學上，多穩態嘅概念可以用附圖 1 噉嘅方式想像：附圖 1 幅影像可以睇成一個花樽，但又可以睇成兩塊人面互相對住；根據廿世紀嘅完形心理學，噉係因為一個睇緊幅圖嘅人腦有兩個均衡點－「將幅圖睇成花樽」同埋「將幅圖睇成兩塊人面互相對住」，而呢兩個均衡點之間嘅狀態係唔穩定嘅，所以個腦傾向一進入呢啲唔穩定嘅狀態，就即刻變換返去是但一個均衡點度；除此之外，個腦唔可以同時處於兩個均衡點，所以受試者會發覺自己冇得「同時將幅圖睇成花樽又睇成兩塊人面」^[7]。

睇埋

• 視覺
• 認知
• 創發
• 圖像設計