歡樂滿東華

《歡樂滿東華》（英文：Tung Wah Charity Gala）係香港東華三院同無綫電視聯合主辦嘅一個大型慈善籌款活動，係無綫電視慈善節目之一。而活動中最重要嘅電視節目《歡樂滿東華》就喺每年12月嘅其中一個星期六夜晚舉行（早期喺星期五夜晚舉行），目的係為東華三院籌募經費，節目前身係1974年創辦嘅《歡樂今宵之東華籌款晚會》，1979年改做而家呢個名，逐步發展到今日嘅《歡樂滿東華》。

《歡樂滿東華》喺每年12月第一或第二個星期六夜晚，喺無綫電視翡翠台現場直播。同其他慈善機構嘅電視籌款節目唔同，節目會喺播放晚間新聞之後，繼續直播到深夜兩三點，節目總時間長達最少六個鐘頭。

改名

1986年12月，由於香港總督尤德爵士喺任內逝世，為咗表示哀悼，當年嘅節目名改做《愛心滿東華》^[1]。

2019年12月，由於反逃犯條例修訂運動持續緊，考慮到社會氣氛唔「歡樂」，當年嘅節目名改做《善心滿東華》。

2025年11月，由於宏福苑大火傷亡枕藉，主辦方因應社會當時狀況，當年嘅節目名改做《東華三院155周年善心滿東華》^[2][3]。