環狀物種

環狀物種（粵拼：waan4 zong6 mat6 zung2；英文：ring species）係生物學上一個物種分化現象：一柞族群分別噉住喺一柞相鄰嘅區域嗰度，因為進化過程令到佢哋當中地理上離對方愈遠嘅族群（遺傳上）愈係同對方唔同，而相鄰嘅族群之間嘅相似度高到足以同對方配種，生saang1出有生殖能力嘅後代，但唔相鄰嘅族群就做唔到呢樣嘢。

2010 年黑脊鷗嘅分佈情況：想像淨係得相鄰嘅群體有能力交配同生出有生殖能力嘅後代。

兩隻獅虎：獅虎係獅子同老虎生嘅雜種，通常冇生殖能力—有啲物種彼此之間遺傳上夠相似，能夠生到後代，但兩者又唔夠似，搞到啲後代好多時都會不育。

2012 年影到嘅一隻狼狗；狼狗通常都有生殖能力，而噉表示狼同狗呢兩種動物夠相似。

基本定義

睇埋：物種形成同生物進化

「	大自然嘅事物呢，係逐啲逐啲噉由冇生命嘅嘢去到動物嘅，而且（因為漸變）冇可能搵到條明確嘅分界線。	」
——阿里士多德[1]

人腦有種傾向，就係會將啲物件分類：「甲同乙之間有差異，但甲乙差異明顯細過甲丙差異同乙丙差異，所以 A 同 B 屬同一個類，而 C 就係另外一類。」不過事實表明，事物之間嘅差異，好多時都唔係「一係似一係唔似」咁簡單嘅。用顏色做例子說明，下圖 A 裏面有五隻色，相鄰嘅色比較接近，而相隔愈遠嘅色就差異愈大。

生物物種都可以用噉嘅方法嚟想像：而家有五群生物 A B C D E，A 同 B 之間嘅差異夠細，佢哋可以交配並且生出有生殖能力嘅後代，A 同 C 之間都做到呢樣嘢，不過 A-C 差異大過 A-B 差異，而 D 再同 C 唔同少少，C-D 差異夠細兩者可以交配生有生殖能力嘅後代，但 A-D 差異就大得滯，兩者之間冇能力配種^{[註 1]}。問題嚟喇，如果我哋靠「有冇能力配種」嚟斷定兩個群體算唔算同一種物種，有能力配種算同一物種，否則就算係唔同物種，噉：

• 思路 1：A 同 B 有能力配種所以係同一物種，B 同 C 有能力配種所以係同一物種，C 同 D 有能力配種所以係同一物種，所以 A B C D 冚唪唥都係同一物種；
• 思路 2：A 同 D 冇能力配種，唔可以算係同一物種；

—上述兩點之間出現咗明顯嘅矛盾。好似環狀物種噉嘅現象，說明咗「物種」呢個概念本質上就有漏洞，生物個體同群體之間嘅差異根本就唔係「一類類」咁簡單嘅^[2][3]。

用行話嚟講，噉即係話能否配種呢種關係並唔遞移：A 同 B 可以配種，B 同 C 可以配種，噉唔表示 A 同 C 之間可以配種^[4]。

語言對應

睇埋：互通程度同方言連續體

環狀物種被指係好似語言學上講到嘅方言連續體現象。

首先，而家想像互通程度嘅概念。互通程度係語言學上講到嘅「兩隻語言，能唔能夠喺未學過對方語言嘅情況下理解對方噏乜」，如果話兩隻話之間互通，意思係話佢哋之間做到呢樣嘢，一般認為互通反映兩隻話有返咁上下相似^[5]。

想像而家有 5 件物體 A B C D E，兩件物體一定要有返咁上下似，先至可以做到相通（估且唔好諗相通具體係咩意思住）。噉可以有幾種情況^[6][7]：

1. A B C D E 之間完美相通，是但攞兩件出嚟，兩件物體都夠相似可以做到相通；
2. A B C D E 之間完美唔相通，是但攞兩件出嚟，兩件物體都差異夠大做到唔相通；
3. A 同 B 之間差異夠細可以相通，C 係 B 再變少少但依然同 A 夠相似做到相通，D 係 C 再變少少，D-C 做到相通，但今次 A-D 差異夠大，A-D 做唔到相通。

噉如果要按相通程度嚟將啲物件分類，「相通嘅全部都屬同一類」，就會出現矛盾。

• 「環狀物種」嘅情況：A B C D E 係生物，相通係「能夠配種」，類係物種；
• 「環狀語言」嘅情況：A B C D E 係話，相通係「做到互通」，類係語言；

—兩種情況都展現咗一件事實^{[註 2]}，就係研究嘅嘢（生物同語言）查實根本冇「一類類，是但攞兩個類嚟睇兩者之間都有明確分界」咁簡單。

睇埋

• 快思邏輯
• 原型理論
• 聚類分析
• 本質主義
• 遞移關係

註釋

1. 不過兩者之間依然有可能會出現基因流動。
2. 但生物進化同語言演變兩者之間依然有啲重要分別。