英文音系

From Wikipedia, the free encyclopedia

Remove ads

英文音系（粵拼：jing1 man2*4 jam1 hai6；英文：English phonology）係指英文嘅音系。英文屬於印歐語系當中嘅日耳曼語族，同粵語（屬於漢藏語系）喺音系上有頗大嘅差異[1]。

音節特性

元音輔音

  • 粵英都有嘅輔音：/p/、/t/、/k/、/f/、/s/、/h/、/m/、/n/、/ŋ/、/l/、/j/、/w/... 等等。
  • 粵有英無嘅輔音：/kʷ/、/kʰʷ/、/t͡s/、/t͡sʰ/... 等等。
  • 粵無英有嘅輔音：/v/、/θ/、/ð/、/ʃ/... 等等[註 1]。
    /v/ 例字：vigour（IPA：/ˈvɪɡə/，意指精力、生命力）
    /θ/ 例字：thin（IPA：/θɪn/，意指瘦）
    /ð/ 例字：this（IPA：/ðɪs/，意指呢個）
    /ʃ/ 例字：sheep（IPA：/ʃiːp/，意指羊）

除此之外，英文亦比較多濁音，唔似得粵語噉淨係得清音[2]。

Thumb
廿一世紀初加州英文啲單元音嘅元音圖
廿一世紀初加州英文啲單元音嘅元音圖
 

音節結構

英文嘅音節結構係 CCCVCCCC [3][4] —佢哋嘅一段音節最多可以有成三個輔音砌埋一齊做複輔音。

英文嘅一啲語音組合規則：

  • 三個輔音嘅音節開頭：雖然話英文音節頭最多可以有三個音節，但係呢啲輔音嘅組合並唔係點都得嘅，而係要合乎以下嘅樣—
    /s/ + 塞音 + 近音，
 組合例字詞（羅馬字）例字詞（IPA）例字詞（意思）
 /s/ + /t/ + /r/stream/striːm/小溪
 /s/ + /p/ + /j ɹ l/sprawl/sprɔːl/擴張
 /s/ + /k/ + /j ɹ l w/scream/skriːm/尖叫
  • 英文嘅音節，唔准有輔音延長；
  • /ŋ/ 唔准喺音節頭出現；
  • /h/ 唔准喺音節尾出現；
  • /h/ 唔會喺多輔音嘅開頭嗰度出現[註 2]；

... 等等。

複輔音嘅存在，對人類學語言會造成具體影響。一個母語冇乜複輔音嘅人學呢啲語言嗰陣，成日會喺複輔音嘅發音上有困難[6]，例如粵語人（母語缺少複輔音）學英文，被指經常都會唔覺意將一串複輔音「縮短，攞走其中一啲輔音」—即係例如將 play（/pleɪ/，玩噉解）讀咗做 pay（/peɪ/，畀錢噉解，當中個 /l/ 音唔見咗）噉，搞到佢哋用英文溝通有困難[2]。

Remove ads

送氣變化

送氣係指一吓講嘢嘅聲發出嗰陣會帶有一吓空氣噴出，喺 IPA 入面通常會寫做一個上標嘅細階 h（ʰ）。觀察者可以擺隻手掌係自己個口前面，如果吓聲係有送氣嘅，佢應該可以感覺到有股空氣噴落佢隻手度[7]。廿一世紀初粵語入邊嘅例子：

有送氣：paa3（可能漢字：怕）、taa1（可能漢字：他）－呢兩隻字嘅開頭輔音用 IPA 寫會係 [pʰ] 同 [tʰ]；
冇送氣：baa1（可能漢字：巴）、daa1（可能漢字：打）－呢兩隻字嘅開頭輔音用 IPA 寫會係 [p] 同 [tʰ]；

廿一世紀初嘅英文音系有一個特徵，就係 /t/、/p/、/k/ 同 /t͡ʃ/ 呢幾隻輔音音素如果喺隻字詞嘅開頭，就要送氣，但如果個輔音前面有個 /s/ 就唔使送氣，例字詞[8]—

pit（IPA：[pʰɪt] - /pɪt/），spit（IPA：[spɪt]）
top（IPA：[tʰɒp] - /tɒp/），stop（IPA：[stɒp]）
keep（IPA：[kʰiːp] - /kiːp/），skip（IPA：[skɪp]）
Remove ads

對比粵語

睇埋：粵語音系

粵語同英文之間嘅差異，遠遠唔淨只係「有邊啲元音同輔音」咁簡單，包括：

  • 聲調：粵語係聲調語言，會靠一個音節嘅音高變化嚟分辨唔同嘅字詞，例如詩（粵拼：si1）同史（粵拼：si2）呢兩隻漢字嘅讀音，喺輔音同元音上一樣，兩者嘅分別在於詩係第一調，音高又高又平，而史係第二調，音高逐漸上升。英文唔係聲調語言，所以冇呢啲噉嘅嘢[註 3]。
  • 複輔音：英文嘅音節結構明顯比較複雜，屬 (C)(C)(C) V (C)(C)(C)(C) [9]—意思即係指英文入邊嘅一段音節，開頭可以有最多三個輔音連續出現，而個尾就可以有最多四個輔音連續出現，例字詞—
    spray（IPA：/spreɪ/，意指噴灑）—呢隻字詞有一段音節，音節開頭有三個輔音接連出現。
    • 相比之下，粵語嘅音節結構就簡單好多，係 (C) V (C) [10]，會有（粵拼）saa1 或者 laa1 嘅音節，但唔會有例如 slaa1 噉嘅音節。
  • 軟腭鼻音（/ŋ/）點用：呢個輔音用羅馬字寫，通常會寫做 ...ng，廿世紀嘅粵語同英文都有軟腭鼻音，不過粵語可以喺音節開頭用呢個輔音，例如係烏鴉個鴉（標準粵拼：ngaa1）噉，而英文就限住咗淨係可以喺音節尾用呢個輔音，例如 sing（IPA：/sɪŋ/）等嘅字詞。

粵語同英文嘅呢啲差異，被指係令到粵語人（以粵語做母語嘅人）學英文有困難，或者講起英文上嚟有明顯口音，人哋一聽就聽得出佢哋母語唔係英文。例如粵語人被指因為慣咗自己母語係冇複輔音嘅，所以講英文嗰時成日將一串複輔音「縮短，攞走咗其中一啲輔音」—即係例如將 play（/pleɪ/）讀做 pay（/peɪ/，個 /l/ 唔見咗）噉[2]。

註釋

  1. [註 1]
    日常用嘅文字做唔到完美反映語音，例如 /ʃ/ 並唔係真係 /s/ 同 /h/ 嘅結合，但係啲人習慣上會將呢個音寫做 sh 呢串羅馬字。
  2. [註 2]
    好似 sheep（/ʃiːp/ · 羊）等嘅字詞，開頭輔音查實係 /ʃ/，不過羅馬字數量有限，寫嗰陣習慣上寫做 sh 噉嘅款。
  3. [註 3]
    不過英文有語調呢家嘢，例如問問題嗰陣句嘢最尾嗰截音高會上升。

引述

Loading related searches...

Wikiwand - on

Seamless Wikipedia browsing. On steroids.

Remove ads
Remove ads