荃灣綫

荃灣綫（粵拼：cyun4 waan1 sin3；英文：Tsuen Wan Line）係由港鐵營運嘅鐵路綫。條綫由香港島，經九龍西，去到荃灣。喺1982年5月10號通車，因為總站設喺荃灣，所以叫荃灣綫。2004年為止，荃灣綫總共有16個車站，當中有8個係轉車站（荔景站、美孚站、太子站、旺角站、油麻地站、尖沙咀站（可以行去尖東站乘屯馬綫）、金鐘站、中環站（可以行去香港站乘東涌綫或者機場快綫），係香港地鐵最繁忙嘅路綫嚟。當中荃灣站、葵興站、葵芳站同埋荔景站4個車站係架空或者地面，其餘全部喺地底。荃灣綫列車一列8卡，喺路綫圖裏面用紅色代表。

荃灣綫 Tsuen Wan Line

荃灣綫荃灣站2號月台 荃灣綫荃灣站2號月台

站數 16 簡稱 TWL 類別 重型鐵路系統 長度 16公里 地區 荃灣、葵青、深水埗、油尖旺及中西區 通車日期 1982年5月10號 電化模式 1500伏特直流電 軌距 混凝土道床段：1432毫米 開放式路段標準軌：1435毫米 雙線區間 全綫 閉塞方式 車內訊號閉塞式（ATP） 營運最高速度 每小時80公里 用車 都城嘉慕電動列車（M-Train）

路綫圖

港鐵荃灣綫路線圖（按真實地形繪畫）

歷史

港鐵荃灣綫葵興站往大窩口嘅隧道

港鐵荃灣綫太子站

地下鐵路嘅誕生同埋早期系統（1967-1970）

荃灣綫，喺1960年中研究興建地鐵計劃就有，係4條路綫之一。佢落成之後嘅設計，同初期規劃好唔同。主要係車站名，同埋荃灣衞星城市裏面嘅站位唔同。初期計劃嘅終點站「荃灣西站」，係喺家下荃灣站重要西嘅山谷，以方便第時伸到去屯門。2003年開通嘅九廣西鐵（而家嘅西鐵綫）嗰個站唔係原先嗰個「荃灣西站」。除此之外，荃灣站到荔景站一段，最初設計係起喺地底，係經葵涌貨櫃碼頭一帶，而唔係好似家下咁起喺高架橋上面。重有九龍佐敦站同尖沙咀站都係轉車站。

修正早期系統（1974-1975）

香港整體運輸研究（1976-1977）

1976年，政府再邀請顧問公司，對香港嘅交通發展作出研究，發表首份《香港整體運輸研究》，當中建議興建地鐵荃灣綫。

1977年，荃灣綫工程獲批，隨即動工。雖然九龍彌敦道一段，1979年已經起好兼行緊，但係荃灣站到深水埗站一段，就要到1982年5月10號先正式投入服務。所有位於深水埗區嘅車站（深水埗站、長沙灣站、荔枝角站同埋美孚站），要喺荃灣綫通車之後一個禮拜，先至有得用。

荃灣綫有最少8個車站嘅名，同最初計劃嘅名稱唔同。中環站、油麻地站同旺角站，最初係用街道命名，分別係遮打道、窩打老道同埋亞皆老街，後來先改成地區名。此外，旺角站本來係計劃起喺比而家更北嘅位置，並無太子站；而深水埗站原本計劃係起喺比而家南啲嘅位置。

另外，美孚站本來叫做「荔枝角站」；而荔枝角站就叫「長沙灣站」；長沙灣站應該叫做「蘇屋站」。位於荃灣區嘅葵芳站本來係叫「垃圾灣站」，呢個名係取自葵芳填海前嘅海灣，即係垃圾灣（又叫醉酒灣）。而葵興站本來係叫「葵涌站」。葵芳站、葵興站、荔枝角站同埋長沙灣站4個車站，都喺通車前改做而家嘅名。美孚站就由「荔枝角站」改名做「荔灣站」。其餘車站嘅中文名都喺開幕前全部改番。最終「荔灣站」亦都喺1985年改做現時嘅「美孚站」。

東涌綫轉車站（1997）

東涌綫正式落實興建嗰陣，荃灣綫要個轉車站，唔係乘客就要坐晒全程去中環站，先至可以喺香港站轉東涌綫。地鐵選擇咗荔景站做轉車站，於是荃灣綫北行路軌要重鋪，荔景站月台改成雙層，以便騰個位出來同東涌綫轉車。新月台喺1997年7月2號正式啟用，比東涌綫早成年。

九廣鐵路轉車站（2003-2005）

九廣鐵路公司起成九廣西鐵（而家嘅西鐵綫）同埋九廣東鐵（而家嘅東鐵綫）尖沙咀支綫，地鐵站亦有改動配合。美孚站同埋尖沙咀站要起多咗出入口，同埋有行人隧道分別駁去九廣鐵路嘅美孚站同埋尖東站。2003年，美孚站嘅轉乘通道（D出口），喺九廣西鐵（而家嘅西鐵綫）通車嗰日同時啟用，乘客可以直接行行人通道去西鐵美孚站；而尖沙咀站同東鐵尖東站之間嘅轉乘通道（即係F、G出口），G出口喺2004年10月24號同九廣東鐵（而家嘅東鐵綫）尖沙咀支線通車一齊啟用，連接尖東站麼地道嘅行人隧道。至於F出口就要到2005年3月30號先至啟用，連接尖東站中間道行人隧道。

用車

全線採用英製都城嘉慕電動列車（M-Train），總共36列，一列8卡，由通車用到家下，不過1998年到2001年間，都全部翻新過。車以英製都城嘉慕電動列車第2a代車卡為主，第2a代車卡係英製列車之中佔最多嘅車卡。2004年初亦曾有用過南韓造車卡。

下行（往中環）	都城嘉慕電動列車車廂編組	（往荃灣）上行
AXXX（單數號碼） - CXXX（單數號碼） - DXXX - B4XX - C4XX - DXXX - CXXX（雙數號碼） - AXXX（雙數號碼）

• 都城嘉慕電動列車車廂編組註解：
  • AXXX - 有駕駛室負責操控嘅動力車廂
  • B4XX - 操控嘅動力車廂動力推動卡
  • CXXX/C4XX - 附集電弓嘅電力車廂
  • DXXX - 拖卡

車站一覽‧接駁路線

車站名同套色	英文站名	喺邊區	營運距離（公里）		接駁路綫	通車日期
			站間	累計
荃灣綫
荃灣	Tsuen Wan	荃灣區	-	0.00	[TWW]	1982年5月10號
大窩口	Tai Wo Hau		0.83	0.83
葵興	Kwai Hing	葵青區	1.29	2.12
葵芳	Kwai Fong		0.82	2.94
茘景	Lai King		1.05	3.99	東涌綫
美孚	Mei Foo	深水埗區	1.84	5.83	屯馬綫	1982年5月17號[NST]
茘枝角	Lai Chi Kok		1.12	6.95
長沙灣	Cheung Sha Wan		0.94	7.89
深水埗	Sham Shui Po		0.81	8.70
太子	Prince Edward	油尖旺區	0.94	9.64	觀塘綫[MKK]	1982年5月10號
旺角	Mong Kok		0.59	10.23		1979年12月31號[MIS]
油麻地	Yau Ma Tei		0.76	10.99		1979年12月22號[MIS]
佐敦	Jordan		0.87	11.86		1979年12月16號[MIS]
尖沙咀	Tsim Sha Tsui		0.81	12.67	屯馬綫[ETS]
金鐘	Admiralty	中西區	2.39	15.06	港島綫、南港島綫或東鐵綫	1980年2月12號[MIS]
中環	Central		0.72	15.78	港島綫 可以經香港站轉東涌綫或機場快綫
註
TWW 荃灣站並唔係接駁屯馬綫荃灣西站嘅車站，但係可以利用八達通免費轉專線小巴95K或者行大概15至20分鐘去車站。 NST 荃灣綫列車曾經喺1982年5月10號至16號間以唔停站方式途徑呢個站，但係車站喺同一年嘅5月17號先至正式啟用。 MKK 旺角站唔係接駁東鐵綫旺角東站嘅車站，但係可以經行人天橋行10至15分鐘去車站。 MIS 由於荃灣綫而家行嘅呢一段係屬於修正早期系統嘅原有路段，所以以修正早期系統嘅啟用日期為準。 ETS 用八達通轉車要先出入閘，單程票乘客就要喺轉車期間買過張單程票。