閃電泡芙

閃電泡芙paau3 fu4（法文：éclair）係一種法式甜品，特色係佢長條形嘅形狀。佢由泡芙酥皮整成，通常有吉士或者忌廉餡，上面仲有層糖衣。

閃電泡芙

歷史

朱古力閃電泡芙望落閃閃令噉。

閃電泡芙最早喺十九世紀出現，起源地係法國里昂。^[1]最早期嘅食譜冇乜點提過閃電泡芙嘅起源，所以佢好可能係慢慢演化出嚟嘅，不過亦有人估佢係名廚安托南‧卡雷姆（法文：Antonin Carême）發明嘅。^[2][3]閃電泡芙一開始叫做「公爵夫人式麵包」（法文：pain à la duchesse）^[4]或者「細公爵夫人」（法文：petite duchesse）。^[5]要去到1860年代，éclair呢個名先至出現，意思係閃電或者閃光。^[4]閃電泡芙個中文名就係噉嚟嘅。

Éclair呢個名嘅由來有兩種講法，法文入面最權威嘅法蘭西學院詞典話係因為閃電泡芙好似閃電咁快就食嗮。^[6]不過亦有人覺得，閃電（或者閃光）係指緊閃電泡芙上面嗰層閃閃令ling3嘅糖衣。^[3]

整法

機整嘅閃電泡芙

閃電泡芙嘅外層係泡芙酥皮整成嘅，質地同普通泡芙一樣。西餅師傅通常會用唧zit1花袋將佢唧做一條條長條，然後攞去焗到出面脆身、入面空心為止。^[5]不過依家某啲餅舖有專門整閃電泡芙嘅機，唔使人手唧都可以量產一樣長度嘅泡芙酥皮長條。

等焗完攤凍咗之後，就可以唧啲餡入泡芙裏面，再喺上面鋪層糖衣。傳統嘅閃電泡芙餡有吉士、雲呢拿忌廉、或者希布斯特忌廉（法文：crème chiboust）。不過今時今日嘅閃電泡芙有好多種變奏，除咗開心果或者咖啡味忌廉之外，仲有冧酒吉士同栗子蓉餡可以揀。有啲整做花色蛋糕仔（法文：petit four）嘅閃電泡芙仲會有鹹口嘅餡。^[5]

有關甜品

• 「雅各伯嘅棍」（法文：bâton de Jacob）係閃電泡芙嘅一種。佢用焦糖取代咗平時閃電泡芙上面嗰層糖衣。^[5]

• 「修女泡芙」（法文：religieuse）嘅食材同閃電泡芙一樣。不過佢唔係長形嘅，而係一大一細兩個泡芙波疊埋一齊嘅。

• 「長莊」（英文：Long John）個樣同餡都同閃電泡芙好似。不過長莊唔係用泡芙酥皮整嘅，而係一種冬甩。長莊喺北美都算流行，有啲舖頭會將佢叫做閃電泡芙。^[7]

修女泡芙 修女泡芙  切開咗嘅長莊冬甩 切開咗嘅長莊冬甩

文化

今時今日閃電泡芙已經成為咗遠近聞名、代表住法國嘅嘢食之一，唔少人去到法國都會特登幫襯下啲地道嘅閃電泡芙名店，而專賣閃電泡芙嘅舖頭亦都開到香港、東京等地。同時，閃電泡芙嘅花款亦越嚟越多，有啲西餅師傅仲會整農曆新年主題或者動畫角色造型嘅閃電泡芙嚟吸客。^[8]

節日

喺比利時，由2020年開始每年11月20號都會慶祝閃電泡芙節（法文：journée de l'éclair），幫患癌嘅細路籌錢醫病。^[9]

而喺美國，6月22號係全國閃電泡芙日（英文：National Eclair Day）。^[10]

世界紀錄

閃電泡芙個特別之處就係佢嘅長度，所以整西餅呢行出現咗鬥長嘅風氣。截至2023年為止，由健力士世界紀錄認證嘅「世界上最長朱古力閃電泡芙」紀錄喺一班瑞士嘅西餅師傅手上，佢哋喺2014年整嗰條有成503米咁長。^[11]而嚟自比利時嘅朱古力師傅讓-菲臘·達爾西斯（法文：Jean-Philippe Darcis）嘅團隊其實喺2016整過一條676米長嘅朱古力閃電泡芙出嚟，不過因為佢哋冇申請新嘅世界紀錄，所以仲未記錄在冊。^[12]

另一項同閃電泡芙有關嘅世界紀錄亦都係由瑞士西餅師傅打破嘅，佢哋用咗23,700嚿閃電泡芙、堆滿咗80.27平方米面積，畫咗隻漫畫角色出嚟，係世界上最大嘅閃電泡芙馬賽克鑲嵌藝術。^[13]