陳恒鑌

陳恒鑌，BBS，JP（CHAN Han-pan，1975年—），花名「蚊怕水議員」，曾經係仁濟醫院總理，係香港立法會嘅新界西南選區議員、前荃灣區議會民選區議員（楊屋道選區），民建聯成員。

陳恒鑌
出生日	1975年
出生地	普寧
國籍	中華人民共和國
母校	香港科技大學
職業	政治人
政黨	民主建港協進聯盟
[改維基數據]
睇 傾 改

政途

陳恆鑌喺廣東省普寧市出世。2003年，當時重係工程師嘅陳恒鑌代表民建聯參選第2屆香港區議會選舉，出戰荃灣楊屋道選區，首次參選就擊敗保釣人士王化民，一擊即中，成功喺陳育文手上接棒，成為荃灣區議員，隨後喺2007、2011、2015年繼續喺楊屋道選區爭取連任，結果亦都成功冧莊。

2019年第6屆香港區議會選舉，陳恒鑌唔再喺楊屋道選區尋求冧莊，交棒畀伍俊瑜（花名「大魚」），但係，伍俊瑜嘅選情受制於香港修例風波，親中派漠視民意堅持修訂逃犯條例，選情大受影響，結果伍俊瑜輸畀林錫添，兩年後第7屆香港立法會選舉，佢喺新界西南選區尋求連任，結果成功連任。

2021年，佢喺李家超無提政綱嘅情況下，有份提名李家超參與2022年香港行政長官選舉^[1]。

部分公職

• 民建聯第17屆執行委員^[2]

個人榮譽

• 太平紳士（2014年）^[3]
• 銅紫荊星章（2018年）^[4]

政治立場

佢係親中派人士，而且同一啲激進建制派人士有所合作。例如，喺新疆棉花風波入面，佢曾經連同激進親中派人士高松傑同黃煒龍發起聯署，話H&M因應維吾爾人嘅大清洗問題而停用新疆棉嘅聲明係抹黑造謠嘅指控，又話佢哋喺度「操弄」政治議題^[5]。另外，佢亦喺社交媒體分享中國中央電視台嘅片段，批評西方成對中國嘅印象停留喺百幾年前^[6]。

選舉及提名經歷

喺2015年香港區議會選舉，佢攞到2,075票，成功當選^[7]。

喺2016年，佢有份提名林鄭月娥參與2017年香港行政長官選舉^[8]。

喺北京未經諮詢或香港人同意，大幅度削減立法會直選議席之後嘅2021年香港立法會選舉，佢提名林順潮^[9]。

爭議

散播電影《占士邦007》為美國國家安全宣傳嘅假資訊

陳恒鑌曾經公開提議政府同電視台合拍電視劇宣傳北京未經諮詢或香港人同意，強行訂立嘅《港版國安法》，又話電影《占士邦007》都係為美國政府拍黎為國家安全宣傳，但電影故仔其實係環繞英國情報機構軍情六處，而主角嘅係軍情六處間諜^[10][11]。

時事評論員馮睎乾批評，陳恒鑌發放假資訊嘅做法，係為咗要將香港影視工業「完善」為中共政治宣傳機器嘅一部份^[10]。