面試研究

面試研究（當中面試作粵拼：min6 si5），又或者叫訪問研究，係一種做研究嘅方法，指研究者透過面試對答嚟攞研究用嘅數據，常見於社會學同教育學等嘅社會科學。呢種研究偏向定性多過定量，可以按照「有幾多硬性規定」分做有結構同無結構兩大類。

可以想像面試員問呢類問題：「我哋係 XX 公司嘅市場調查專員，請問你有冇用過我哋公司嘅產品呢？」

喺營銷同相關嘅領域上，做研究嘅人成日用面試研究，想探知消費者或者使用產品嘅人對一件產品有咩觀感。研究者會用各種技巧引受訪者講嘢，想知受訪者用件產品嗰陣有咩體驗，佢哋對件產品有乜嘢感受（鍾意定唔鍾意），以及係乜嘢體驗引致佢哋嘅感受（如果唔鍾意，係咩體驗令佢哋唔鍾意）... 呀噉。訪問後，研究者就會得到一啲有用資訊，可以攞去報告^[1]。

有無結構

睇埋：社會統計調查同見工

有結構

如果話一場面試研究有結構^{[e 1]}，意思係話研究者打算事先「部署」好晒場面試要點樣進行：研究者會喺面試前準備好一個列表，列出晒佢哋要問咩問題——呢個列表望落好似一份有專人設計嘅問卷噉，次次做親面試都一定要問晒每條問題；除此之外，研究者仲會盡力做到無論面試對象係咩人，都保持完全一致嘅態度同舉止，以防自己喺行為或表情上嘅變動會影響受試者作答。因為有結構面試偏向吓吓要跟足計劃行事，呢類研究好多時都偏好問封閉式問題^{[e 2]}，答嗰個只能夠喺幾個可能答案當中揀一個，例如想像有位研究者想探究啲人返工嗰陣嘅行為^[2]：

「你有冇試過用 Zoom 嚟開會？」

「你覺得你做嗰行嘅前景，係咪明朗？」

「你有冇試過喺 office 同同事鬧交？」

對於呢條問題，答嗰個得幾個答案可以揀，例如有同冇、係同唔係等嘅二元選擇，再唔係就答唔知或者冇意見^[3]。因此，有結構面試被指係成日「限制」住受訪者作答嘅自由，實際上似問卷調查多啲。

無結構

睇埋：傾閒偈

無結構^{[e 3]}嘅面試研究就好唔同。有人嗌呢種研究做受引導嘅對話^{[e 4][4]}，研究者依然會有返個明確嘅目標（知自己想研究乜），但係就唔會有太多硬性嘅規劃。做無結構嘅面試研究，研究者通常唔會準備一個列表，列出「一定要問晒」嘅問題，而且亦唔會追求「無論對住邊個，行為舉止都完全一樣」；反而佢哋場面試會做到好似傾閒偈噉，會問較多開放式問題^{[e 5]}，甚至容許受訪者問返研究者轉頭，用返返工行為做例子^[5]：

「可唔可以講講你同你老闆關係點？」

「你對你做嗰行嘅前景，有咩睇法？」

「你喺 office 同啲同事互動，氣氛係點？」

有教育領域嘅學者噉樣嚟描述無結構面試：

「（無結構面試想達致嘅係）按受訪者嘅步伐理解佢哋，聽清楚佢哋點樣喺自己嘅人生、體驗同認知過程當中搵到意義。^[6]

有學者話，無結構型嘅面試旨在「要探究受訪者嘅世界，搵出佢哋講嘅每隻字詞同每句句子背後嘅意思」，唔似得有結構型嘅面試噉，好多時一味掛住搵出一啲數值^{[註 1]}。

無論係有結構定無結構嘅面試，研究方法背後梗會有邏輯。喺現實應用上，研究者通常都會跟從某啲協定，即係一啲既定嘅方法，係學界普遍接受嘅。呢啲協定實會或多或少有理據，每條行事法則背後都有原理^[7]。

做法技巧

做訪問研究好有技巧。

一般認為，訪問者理應要保持中立，唔應該對任何嘢作出價值判斷，更加唔可以畀受訪者覺得一條問題「有正確答案」。而且訪問者亦應該要保持友善，得到受訪者嘅信賴，噉樣受訪者就會更加暢所欲言。

聆聽

好多學者主張，聆聽係面試研究嘅重要技巧：一般認為，訪問者嘅職責係發問，啲問題要逐條逐條噉問，亦要令受訪者覺得自己嘅意見受重視，噉就最引得到受訪者講嘢；訪問者亦要不時問口，叫受訪者詳細啲解釋自己嘅諗法，例如^{[7]:p 144}

「呀吓，可唔可以講講，點解你會有噉嘅觀感呢？」^{[註 2]}

呀噉。無論如何，訪問過程理應要多數時間都係受訪者喺道講嘢，噉樣訪問者先可以由受訪者身上得到大量數據。有研究者仲話面試研究最惡劣嘅情況，係訪問者問咗條好長嘅問題，不過答案就係簡單二元嘅「係定唔係」。

開頭

面試研究亦有所謂嘅大巡迴問題^{[e 6]}概念^[6]：大巡迴問題泛指一啲開放式問題，係容許受訪者「設下訪問嘅大方向」嘅，呢條問題通常係訪問一開始嗰時問，然後訪問者就會由受訪者畀嘅答案嗰道搵線索，進一步發問^[8]；大巡迴問題嘅例子有——

• 「喺過往呢一年，閣下間中學發展如何？」
• 「你做中學老師嘅，呢排有咩工作忙緊？」
• 「你可唔可以講講，你哋 office 嘅典型工作日係咩樣嘅呢？」

理想嘅話，受試者會畀一個相當長嘅答案，然後訪問者就會由個答案道搵出有啲乜嘢係值得進一步探索嘅——想像「吖，你頭先提到最近好多中學生出現情緒問題喎，可唔可以詳細啲解釋吓？」噉嘅問題^[9]。

分析方法

做親面試研究，啲數據實會包含語言性質嘅內容——研究者會記低受訪者講咗乜，而呢啲數據跟住會攞去做進一步嘅分析，面試研究得到嘅數據，可以用以下方法分析：

• 主題分析^{[e 7]}：搵出數據入面有邊啲主題，從而增進對現象嘅了解；舉個簡單例子，想像有個人做市場研究，訪問咗一班消費者，問佢哋對產品 A 有咩觀感，佢哋發覺受訪者當中有大半（70%）嘅人都（用唔同嘅字眼）話件產品嘅 design 好有創意（主題），跟住就將呢個發現寫落研究報告嗰道。
• 自然語言處理^{[e 8]}：用人工智能分析語言文字數據^[10]；到咗廿一世紀初，已經有技術可以做到分析字句嘅意思，甚至可以用數值表示一段語言文字數據當中「有咩情感」。詳情可以睇睇文本情感分析方面嘅內容。
• 數值型嘅量度：原則上，研究者可以索性用一啲數值嚟評估受訪者，例如「1 到 10 分嚟量度受訪者有幾鍾意佢個工作環境，呢位受訪者攞幾多分？」；有關呢啲分析要點做，可以睇睇心理測量方面嘅概念。

等等。

優同缺點

面試研究嘅優點^[11]：

• 可以深入探知受訪者嘅經歷同諗法。
• 研究者可以觀察受訪者，而受訪者嘅「眉頭眼額」有時可以提供重要資訊。
• 研究者可以就個別受訪者，調整自己問咩問題，確保自己由每位受訪者身上得到最多嘅資訊。

面試研究嘅缺點：

• 由於記憶同意識（好多行為係無意識嘅）方面嘅問題，人未必吓吓都能夠講返自己嘅體驗出嚟^{[12]:Ch 5}。
• 訪問好花時間，研究者唔能夠訪問好多人，噉就表示研究嘅樣本會細。
• 訪問好花精神，可能會搞到研究者好攰。

睇埋

• 社會統計調查
• 市場調查
• 人機互動