Nephthys

Nephthys was in die Egiptiese mitologie ’n lid van die Ennead van Heliopolis, ’n dogter van Noet en Geb. Sy is saam met haar suster, Isis, verbind met begrafnisrituele^[1] vanweë haar rol as die beskermer van mummies en die god Osiris, en as die suster en vrou van Set.

Nephthys
Nephthys is gewoonlik uitgebeeld as ’n jong vrou met ’n hoofbedekking in die vorm van ’n huis en mandjie.
Soort godin	Egipties
Godin van	Die dood, diens, weeklag en die nag
Naam in hiërogliewe
Simbool	Die huis, mummieverbande
Ouers	Geb en Noet
Sibbes	Isis, Osiris, Haroeris, Set
Metgesel	Set
Kinders	Anoebis
Portaal    Antieke Egipte

Rol

Teen die tyd van die 5de-dinastiese Piramidetekste het Nephthys haar verskyning gemaak as godin van die Ennead. Sy is beskryf as ’n godin van goddelike hulp en beskerming. Sy word in sommige mites beskou as die ma van die begrafnisgod, Anoebis.^[2][3]

As hoofversorger van die farao-god Horus was Nephthys ook die versorger van die heersende farao.^[4] Soms is sy uitgebeeld as ’n gevaarlike godin wat die farao se vyande met haar vurige asem kon verbrand.^[5]