Electromagnetismu

L'electromagnetismu^[1] ye una rama de la física qu'estudia y unifica los fenómenos llétricos y magnéticos nuna sola teoría, que los sos fundamentos definiéronse por Michael Faraday y formuláronse per primer vegada de manera completa por James Clerk Maxwell. La formulación consiste en cuatro ecuaciones diferenciales vectoriales que rellacionen el campu llétricu, el campu magnéticu y les sos respeutives fontes materiales (corriente llétrica, polarización llétrica y polarización magnética), conocíes como ecuaciones de Maxwell.

Electromagnetismu
rama de la física
fenómenu físicu

L'electromagnetismu ye una teoría de campos; esto ye, les esplicaciones y predicciones qu'apurre básense en magnitúes físiques vectoriales o tensoriales dependientes de la posición nel espaciu y del tiempu. L'electromagnetismu describe los fenómenos físicos macroscópicos nos cualos intervienen cargues llétriques en reposu y en movimientu, usando pa ello campos llétricos y magnéticos y los sos efeutos sobre les sustancies sólides, líquides y gaseoses. Por ser una teoría macroscópica, esto ye, aplicable namái a un númberu bien grande de partícules y a distancies grandes respeutu de les dimensiones d'estes, l'electromagnetismu nun describe los fenómenos atómicu y molecular, pa los que ye necesariu usar la mecánica cuántica.

L'electromagnetismu consideráu como fuercia, ye una de les cuatro fuercies fundamentales del universu anguaño conocíu.