Ceyms Mid

Ceyms Edvard Mid (ing. James Edward Meade) (23 iyun 1907^[1][2][…] – 22 dekabr 1995^[1][2][…], Kembric, İngiltərə) — məşhur ingilis iqtisadçısı. 1977-ci ildə İqtisadiyyat üzrə Nobel mükafatını Bertil Ulinlə bölüşdürmüşdür.

Ceyms Mid
ing. James Edward Meade
Doğum tarixi	23 iyun 1907
Doğum yeri	Svineyc  Böyük Britaniya
Vəfat tarixi	22 dekabr 1995 (88 yaşında)
Vəfat yeri	Kembric  Böyük Britaniya
Milliyyəti	Böyük Britaniya
Elm sahəsi	Makroiqtisadiyyat
İş yerləri	Kembric Universiteti, London İqtisadiyyat məktəbi
Təhsili	Malvern kolleci[d], Triniti Kolleci
Tanınır	Beynəlxalq ticarət nəzəriyyəsi, Beynəlxalq investisiya dövranı nəzəriyyəsi
Üzvlüyü	Britaniya Akademiyası, Amerika İncəsənət və Elmlər Akademiyası, ABŞ Milli Elmlər Akademiyası (1981–)
Mükafatları	1977 İqtisadiyyat üzrə Nobel mükafatı
Vikianbarda əlaqəli mediafayllar

Həyatı

Ceyms Mid özəl Malvern Kollecini bitirmişdir. 1926-cı ildə Oksford Universitetində təhsilə başlamışdır. Əvvəlcə klassik dərslər üzrə təhsil alsa da, sonradan fəlsəfə, siyasət və iqtisadiyyat üzrə oxumuşdur və 1929-cu ildə fərqlənmə ilə məzun olmuşdur.

1930–1931-ci illərdə Kembric Universitetinin Triniti Kollecində ixtisas artırma keçmişdir. Bu müddət ərzində dövrün ən məşhur iqtisadçıları olan Dennis Robertson və Con Meynard Keyns ilə yaxın akademik əlaqələr qurmuşdur. Con Meynard Keynsin pul və məşğulluqla bağlı tədqiqatlarında iştirak edən Mid və yaxın dostları Riçard Ken, Pyero Sraffa və Robinzon Keynsin "Ümumi nəzəriyyə" kitabının hazırlanmasına böyük dəstək olmuşlar.

Sonralar Ceyms Mid 1937–1939-cu illərdə İsveçrənin Cenevrə şəhərində yerləşən Millətlər Liqasının İqtisadiyyat Bölümündə iqtisadçı kimi işləmişdi.

İkinci Dünya müharibəsi illərində hökumət kabinetində dövlət məmuru kimi işləmişdi. 1941-ci ildə Mid və Riçard Ston ilk dəfə ikili yazılışlı mühasibat hesablarına əsaslanaraq Böyük Britaniya üçün rəsmi milli gəlir və xərcləmə hesablarını hazırlamışdır. Bu, Dünyada geniş yayılmış Milli Hesablar Sisteminin hazırlanmasında bir başlanğıc olmuşdur.

1945-ci ildə İşçi Partiyası iqtidara gələndə Ceyms Mid Baş nazir Klement Ettlinin baş iqtisadi məsləhətçisi kimi mülkiyyəti dövlətləşdirmə və sosial həmrəyliyin artırılması siyasətlərinin inkişafında önəmli rol oynamışdır. 1947–1957-ci illərdə London İqtisadi məktəbində iqtisadiyyat üzrə professor olaraq işləmişdi. Bununla yanaşı beynəlxalq iqtisadi siyasət nəzəriyyəsi haqqında ödəmələr tarazlığı, ticarət və rifah haqqında çox önəmli iki kitabı çap olunmuşdur.

1977-ci ildə İqtisadiyyat üzrə Nobel mükafatını Bertil Ulinlə bölüşdürmüşdür.

Önəmli əsərləri

• 1951 — Beynəlxalq iqtisadi siyasət nəzəriyyəsi — Ödənişlər balansı
• 1955 — Beynəlxalq iqtisadi siyasət nəzəriyyəsi — Ticarət və rifah
• 1965–1976 — Siyasi iqtisadın prinsipləri
• 1975 — Ağıllının iqtisadi siyasətinə radikal bələdçi

Həmçinin bax

• İqtisadiyyat üzrə Nobel mükafatı
• İqtisadiyyat üzrə Nobel mükafatı laureatlarının siyahısı