Адной дарогай

Адной дарогай — музычны альбом гурта «Наві» 2017 году.

Адной дарогай
Альбом гурта «Наві»
Выдадзены	21 лістапада 2017 (7 гадоў таму)[1]
Запісаны	студыя «Селах»
Месца запісу	Менск
Жанр	поп-музыка
Працягласьць	31 хвіліна
Выдавец	«Мэдыякуб» (Кіпр)
Прадусар	Аляксандар Табольскі
Храналёгія гурта «Наві»
Ілюмінацыя (2017)	Адной дарогай (2017)	Наві (2019)

Стаў другім беларускамоўным альбомам гурта^[2]. Адразу пасьля ўдзелу ў конкурсе «Эўрабачаньне», які праходзіў у траўні 2017 году ў Кіеве (Украіна), увесь гурт «Наві» зьехаў на тыдзень у вёску за 300 км ад Менску. Там музыкі напісалі большасьць песьняў новага альбому^[3]. Пры гэтым рэпэтавалі на прыродзе ў полі. У выніку 9 створаных беларускамоўных песьняў запісалі на менскай студыі «Селах» з гукарэжысэрам Андрэем Баброўкам. Іх зьвядзеньнем займаўся Павал Трацяк. Музыку выконвалі: у сьпеўным дуэце Ксенія Жук (клявішы) і Арцём Лук’яненка (акустычная гітара), а таксама Аляксандар Табольскі (электрагітара), Уладзь Чашчавік (бас-гітара) і Ўладзімер Бегер (барабаны)^[4].

16 кастрычніка 2017 году гурт абвясьціў пра напісаньне альбома Адной дарогай і намер прадставіць яго на канцэрце 9 сакавіка 2018 году ў сталічным клюбе «Прайм Хол»^[3]. Як адзначылі самі музыкі, усе песьні «прасякнутыя любоўю да роднай мовы, зямлі, музыкі, жыцьця і адно да аднаго»^[5]. 4 сьнежня 2017 году выйшаў відэакліп на альбомную песьню «А дзе жывеш ты», які да 2023 году набраў звыш 300 000 праглядаў^[6].

Альбом выйшаў на 6 музычных парталах ЗША («Амазон»^[7], «Бандкэмп», «Саўндклаўд»^[8], «Спотыфай»^[9], «Эпл»^[10] і «Ютуб»), а таксама на адным у Расеі («Яндэкс»^[11]) і Францыі («Дызэр»)^[12].

Песьні

Ксенія Жук, Арцём Лук’яненка зьяўляецца аўтарам усіх песень. 

Адной дарогай[13]
№	Назва	Працягласьць
1.	«Як я жыў безь цябе»	3:13
2.	«А дзе жывеш ты»	3:41
3.	«Уяўляй»	3:28
4.	«Навальніца»	2:26
5.	«Восень»	2:36
6.	«Адной дарогай»	3:33
7.	«Час прыйшоў»	4:04
8.	«Мы прачынаемся»	5:07
9.	«Далей»	3:16
31:14

Крытыка

4 студзеня 2018 году музычны крытык парталу «Experty.by» Мікалай Янкойць адзначыў «мяккі і ўтульны» гук альбому, а таксама заўважыў паўсюдныя двухгалосьсі, бо «Арцём і Ксенія літаральна зьліваюцца ў адно цэлае». Пры гэтым Янкойць падкрэсьліў: «Дабрыня са сьвятлом так і пруць з кожнага куточка альбома: вазьмі любую песьню, і яна будзе годным саўндтрэкам да рамантычнага фільма пра юнацкае каханьне». Іншы крытык парталу «Experty.by» Ягор Цывілька параўнаў альбом зь яго папярэднікам: «Тут знаходзяцца некалькі някепскіх трэкаў ("А дзе жывеш ты?", "Уяўляй", "Восень"), астатняе ж — даволі аднародная прахадная маса са знаёмых хадоў»^[2].