Алексіс Мак Алістэр

Алексіс Мак Алістэр (па-гішпанску: Alexis Mac Allister; нар. 24 сьнежня 1998 году) — аргентынскі футбаліст, паўабаронца ангельскага клюбу «Лівэрпул» і нацыянальнай зборнай Аргентыны. Мае шатляндзка-ірляндзкае паходжаньне.

Алексіс Мак Алістэр
Пэрсанальная інфармацыя
Нарадзіўся	24 сьнежня 1998(1998-12-24)[1][2] (26 гадоў) Санта-Роса[d], Аргентына
Рост	176 см
Вага	72 кг
Пазыцыя	паўабаронца
Клюбная інфармацыя
Клюб	Лівэрпул
Нумар	10
Клюбы
Гады	Клюб	Гульні (галы)¹
2016—2019	Архэнтынас Хуніёрс	56 (8)
2019—2023	Брайтан энд Гоўв	98 (16)
2019—2020	→ Бока Хуніёрс	13 (1)
2019	→ Архэнтынас Хуніёрс	10 (2)
2023—	Лівэрпул	68 (10)
Зборныя
2019—	Аргентына	38 (4)
2020—2021	Аргентына (да 23)[d]	9 (5)
¹ Колькасьць гульняў і галоў за прафэсійны клюб лічыцца толькі для нацыянальнай лігі, адкарэктавана на 11 траўня 2025. ² Колькасьць гульняў і галоў за нацыянальную зборную ў афіцыйных матчах, адкарэктавана на 25 сакавіка 2025.

Кар’ера

Клюбная

Як і ягоныя браты, Франсіс і Кевін, гулец пачынаў займацца футболам у клюбе «Соцыял Парк», пасьля чаго далучыўся да акадэміі клюбу «Архэнтынас Хуніёрс». Упершыню згуляў за першую каманду клюбу 30 кастрычніка 2016 году ў матчы другога дывізіёну аргентынскага чэмпіянату. 25 лістапада 2017 году поруч з сваімі братамі згуляў у матчы супраць «Сан-Лярэнса»^[3]. Алексіс і Франсіс зьявіліся ў стартавым складзе, а Кевін прыяднаўся да іх на полі праз замену. Свой першы гол паўабаронца забіў 5 сакавіка 2018 году ў матчы супраць «Бокі Хуніёрс»^[4].

24 студзеня 2019 году Мак Алістэр падпісаў кантракт з клюбам Прэм’ер-лігі «Брайтан энд Гоўв Альбіёнам» тэрмінам на на чатыры з паловай гады. У рамках пагадненьня Мак Алістэр быў аддадзены ў арэнду ў «Архэнтынас Хуніёрс», каб уласна дагуляць сэзон^[5]. Пасьля гэтага застаўся яшчэ амаль на сэзон у Аргентыне, бо быў запазычаны «Бокай Хуніёрс»^[6][7]. У сваім жа дэбютным матчы, які прыпаў на Кубак Лібэртадорэс, гулец адзначыўся голам, пацэліўшы мяч у браму бразыльскага клюбу «Атлетыку Паранаэнсі». У жніўні Мак Алістэр згуляў свой першы матч за клюб у чэмпіянаце, зьявіўшыся ў сустрэчы з «Патраната».

Мак Алістэр у складзе «Брайтан энд Гоўв Альбіёну» ў 2022 годзе.

Мак Алістэр дэбютаваў за «Брайтан» 7 сакавіка 2020 году, выйшаўшы на замену на 80-й хвіліне ў матчы супраць «Ўулвэргэмптан Ўандэрэрзу», які скончыўся ўнічыю з рахункам 0:0^[8]. Пасьля чаго ліга была прыпыненая з нагоды пошасьці каранавірусу. Па старце розыгрышу паўабаронца згуляў некалькі няпоўных матчаў. 17 верасьня ён забіў свой першы гол у кашулі ангельскага клюбу, пакрыўдзіўшы «Портсмут» у матчы Кубка лігі^[9]. 18 кастрычніка аргентынец улучыў мяч у браму «Крыстал Пэласу»^[10]. Няблага гулец правёў сэзон 2021—2022 гадоў, гэтак жа як і наступны. 24 кастрычніка 2022 году Мак Алістэр узгадніў з клюбам умовы новага кантракту^[11]. Аднак, 8 чэрвеня 2023 году гулец далучыўся да «Лівэрпулу»^[12][13]. Як паведамлялася, сума трансфэру склала мінімум 35 мільёнаў фунтаў стэрлінгаў, і агулам, з улікам мажлівых бонусаў, магла дасягаць 55 мільёнаў фунтаў стэрлінгаў^[14]. 13 жніўня 2023 году аргентынец запачаткаваў выступы ў «Лівэрпулі» ў матчы Прэм’ер-лігі супраць «Чэлсі»^[15]. Свой першы гол здабыў 3 сьнежня ў матчы супраць «Фулгэму», улучыўшы мяч у браму з 27 мэтраў. Пазьней гол быў абраны найлепшым голам сьнежня ў чэмпіянаце^[16].

Міжнародная

Упершыню быў выкліканы да шыхтаў нацыянальнай зборнай Аргентыны ў жніўні 2019 году на таварыскія матчы супраць зборных Чылі і Мэксыкі. Дэбютаваў у камандзе 5 верасьня ў гульні з чылійцамі. У 2021 годзе браў удзел у футбольным розыгрышы Алімпійскіх гульняў у Токіё.

Дасягненьні

«Бока Хуніёрс»:

• Чэмпіён Аргентыны: 2020

«Лівэрпул»:

• Чэмпіён Ангельшчыны: 2025
• Уладальнік Кубка футбольнай лігі: 2024

Аргентына:

• Чэмпіён сьвету: 2022
• Уладальнік Кубка Амэрыкі: 2024