Арнольд Бёклін

Арнольд Бёклін (па-нямецку: Arnold Böcklin; 16 кастрычніка 1827, Базэль, Швайцарыя — 16 студзеня 1901, Сан-Дамэніка-дзі-Ф’езоле, Італія) — швайцарскі жывапісец, графік, скульптар; адзін з прадстаўнікоў сымбалізму ў эўрапейскім выяўленчым мастацтве XIX стагодзьдзя.

Арнольд Бёклін
Арнольд Бёклін, аўтапартрэт (1873)
Дата нараджэньня	16 кастрычніка 1827(1827-10-16)[1][2][3][…]
Месца нараджэньня	Базэль, Швайцарыя
Дата сьмерці	16 студзеня 1901(1901-01-16)[1][4][5][…] (73 гады)
Месца сьмерці	Сан-Дамэніка-дзі-Ф’езоле, Італія
Месца пахаваньня	Cimitero Evangelico agli Allori[d] Grave of Arnold Böcklin[d]
Месца вучобы	Дусэльдорфская акадэмія мастацтваў
Занятак	гістарычны жывапіс, пэйзаж, партрэт
Навуковая сфэра	малярства
Месца працы	Веймарскі ўніверсітэт «Bauhaus»[d]
Жанры	гістарычны жывапіс[6], пэйзаж[6] і партрэт[6]
Плынь	сымбалізм
Узнагароды
Арнольд Бёклін у Вікісховішчы

Біяграфія

Вучыўся ў Акадэміі мастацтваў у Дусэльдорфе ў тэарэтыка мастацтва А. фон Гільдэбранта і пэйзажыста Ё. В. Шырмэра (1845—1847), затым у Мюнхэне, дзе прыцягнуў увагу графа Шака. Распачаў адукацыйнае падарожжа па Швайцарыі, Нідэрляндах і Францыі. Першапачаткова займаўся ляндшафтным жывапісам, аднак з часам перайшоў у міталягічную тэматыку. У 1850—1857 гадох працаваў у Рыме. У 1860—1862 гадох быў прафэсарам у Акадэміі мастацтваў у Ваймары. Апошнія гады працаваў напераменку ў Базэлі і ў Італіі. Аказаў уплыў на такіх прадстаўнікоў сюррэалізму, як Макс Эрнст, Сальвадор Далі, Джорджа дэ Кірыко.

Творчасьць

«Востраў мёртвых»

Карціны Бёкліна, яркія і кідкія сваімі колерамі, напісаныя галоўным чынам тэмпэрай. У карцінах Бёкліна выступае выдуманы сьвет, часта знарочыста таямнічы. Спачатку Бёклін пісаў рамантычныя пэйзажі зь міталягічнымі постацямі, затым — фантастычныя сцэны зь німфамі, марскімі пачварамі і г. д. («Трытон і Нэрэіда», 1873—1874).

Позьнія кампазыцыі («Востраў мёртвых», 1880, Мастацкі музэй, Базэль; у пачатку XX у. рэпрадукцыі зь яе былі вельмі папулярныя), дзе фантастычная сымболіка спалучаецца з натуралістычнай пэўнасьцю дэталяў, паўплывалі на фармаваньне нямецкага сымбалізму і югендштылю.

Некаторыя працы:

• «Востраў мёртвых» (1880, Мастацкі музэй, Базэль)
• «Трытон і Нэрэіда» (1873—1874, Мастацкі музэй, Базэль)
• «Фаўн у чаратах» (у мюнхэнскай Пінакатэцы)
• «Адпачывальніца Вэнэра»
• «Паляваньне амазонак» (у Базэлі),
• «Барацьба цэнтаўраў»
• «Палі блажэнных» (Нацыянальная галерэя ў Бэрліне)
• «Сьвяцілішча Гэркулеса» (у Брэслаў)
• «Наяды» (у Базэлі)
• «Віла на марскім беразе» (галерэя Шака ў Мюнхэне)
• «Хвалі» (Мюнхэн, Пінакатэка)
• «Вясновы лівень» (Дрэздэн)