Беларускі дзяржаўны ўнівэрсытэт інфарматыкі і радыёэлектронікі

Белару́скі дзяржа́ўны ўнівэрсытэ́т інфарма́тыкі і радыёэлектро́нікі — вышэйшая навучальная ўстанова Беларусі, заснаваная ў сакавіку 1965 году ў якасьці Менскага радыётэхнічнага інстытуту.

БДУІР
наркам. Беларускі дзяржаўны ўніверсітэт інфарматыкі і радыёэлектронікі
Галоўны корпус (2020 год)
Дэвіз	БДУІР — веды і стыль жыцьця
Заснаваны	15 сакавіка 1964 (61 год таму)
Тып	урадавы
Рэктар	Вадзім Богуш
Факультэтаў	10
Колькасьць студэнтаў	больш за 16 000[1]
Месцазнаходжаньне
Горад	Менск
Краіна	Беларусь
Кампус	гарадзкі
Былыя назвы	Менскі радыётэхнічны інстытут (да 16 лістапада 1993 году)
Знаходзіцца ў складзе	Міністэрства адукацыі Рэспублікі Беларусь
Вэб-сайт	bsuir.by/bel
БДУІР у Вікісховішчы

На 2020 год месьціўся ў Савецкім раёне Менску па вуліцы Петруся Броўкі, д. 6^[2].

Мінуўшчына

27 лютага 1964 году Савет міністраў Беларускай ССР зацьвердзіў Пастанову № 78, паводле якой 15 сакавіка 1965 году адчынілі Менскі радыётэхнічны інстытут (МРТІ). 16 лістапада 1993 году Савет міністраў Рэспублікі Беларусь ухваліў Пастанову № 786, паводле якой перайменаваў МРТІ ў Беларускі дзяржаўны ўніверсітэт інфарматыкі і радыёэлектронікі (БДУІР)^[3].

У 2013—2014 гадах з БДУІРу адлічылі каля 10 % ад агульнага ліку студэнтаў за непасьпяховасьць^[4].

Дзейнасьць

У цяперашні час унівэрсытэт рыхтуе інжынэрныя кадры па двух кірунках адукацыі, 36 спэцыяльнасьцях^[1] і 25 спэцыялізацыях у вобласьці вылічальнай тэхнікі, праграмнага забесьпячэньня інфармацыйных тэхналёгій, інфарматыкі, інфармацыйнага забесьпячэньня аўтаматызаваных сыстэм, штучнага інтэлекту, аўтаматычнага кіраваньня, радыётэхнікі, радыёэлектронных сыстэм, мікраэлектронікі, тэлекамунікацыяў, праектаваньня радыёэлектронных і электронна-вылічальных сродкаў, электроннага апаратабудаваньня, мэдыцынскай электронікі, тэхнічных сродкаў бясьпекі, мэтралёгіі, стандартызацыі і сэртыфікацыі, эканомікі. На 10 факультэтах і 35 катэдрах па дзённай, вячэрняй, завочнай і дыстанцыйнай формах навучаньня займаецца больш за 15 тысячаў студэнтаў, у тым ліку каля 350 — з краінаў далёкага і блізкага замежжа. У 2001 г. адчынена магістратура, заразь вядзецца падрыхтоўка магістраў па 27 спэцыяльнасьцях БДУІР. Падрыхтоўка навуковых кадраў вышэйшай кваліфікацыі для рэспублікі і іншых краінаў праводзіцца ў асьпірантуры і дактарантуры. Працуюць шэсьць доктарскіх саветаў па абароне дысэртацыяў, якія ахопліваюць 13 тэхнічных і 2 фізыка-матэматычныя спэцыяльнасьці.

Факультэты і іншыя падразьдзяленьні

• Факультэт кампьютарнага праектаваньня (ФКП)
• Факультэт інфармацыйных тэхналёгіяў і кіраваньня (ФІТК)
• Факультэт радыётэхнікі і электронікі (ФРЭ)
• Факультэт кампутарных сыстэмаў і сетак (ФКСіС)
• Факультэт інфакамунікацыяў (ФІК), да 2017 году — Факультэт тэлекамунікацыяў (ФТК)
• Інжынэрна-эканамічны факультэт (ІЭФ)
• Факультэт завочнага навучаньня (ФЗН)
• Факультэт бесьперапыннага і дыстанцыйнага навучаньня (ФБіДН)
• Факультэт даўнівэрсытэцкай падрыхтоўкі і прафэсійнай арыентацыі (ФДПіПА)
• Ваенны факультэт (ВФ)
• Інстытут павышэньня кваліфікацыі і перападрыхтоўкі кадраў «Інстытут інфармацыйных тэхналёгіяў» (ІІТ БДУІР)
• ДУА «Ліцэй №1 г. Мінска» пры БДУІР

Выкладчыкі

• Уладзімер Лемяшонак — беларускі гісторык, доктар гістарычных навук, прафэсар