Два полі

«Два полі» — беларуская патрыятычная песьня, запісаная ў 1983 годзе ансамблем «Сябры» на Ўсесаюзным радыё.

«Два полі»
Песьня выканаўцы «Сябры» зь міні-альбому «Завіруха»
Мова	беларуская
Напісаная	1983 (42 гады таму)
Выдадзеная	1984 (41 год таму)
Фармат	грампласьцінка
Запісаная	1983 (42 гады таму)
Студыя	«Мэлёдыя» (Масква)
Жанр	вакальная музыка
Працягласьць	2:20
Лэйбл	Усесаюзнае радыё
Аўтар(ы)	Анатоль Вярцінскі
Кампазытар(ы)	Эдуард Ханок
Пясьняр(ы)	Анатоль Ярмоленка
Прадусэр(ы)	Уладзімер Рыжыкаў
храналёгія самотнікаў
«Два полі» (1984) «Вы шуміце, бярозы» (1984)

Верш да песьні напісаў паэт Анатоль Вярцінскі ў 1976 годзе^[1], а музыку — кампазытар Эдуард Ханок. У 1984 годзе песьня выйшла на грампласьцінцы ў міні-складанцы «Завіруха», што зьмяшчала мэлёдыі кампазытара Эдуарда Ханка. У 1985 годзе ўвайшла ў музычны альбом «Я ўдзячны лёсу» гурта «Сябры».

У песьні сьцісла малюецца перамога ў Другой сусьветнай вайне, якая высьпявала на палях Беларусі. У 2014 годзе 1-ы галоўны рэдактар часопіса «Роднае слова» (1987—2006) Міхась Шавыркін адзначыў, што аўтары песьні стварылі вобраз поля як быліннай прасторы, якая набывае акварэльнае аблічча. У маленстве яно паўстае казачнай нівай, дзе забавы і дзівосныя ўяўленьні расквечваюць навакольле. З гадамі поле пераўтвараецца ў працоўныя палеткі. Калі навала дакоціцца да яго квітнеючых межаў, яно становіцца ратным месцам мужнасьці. Шавыркін заўважыў у песьні вобраз «Поля Жыцьця», дзе людзі працуюць, ахвяруюць і змагаюцца дзеля шчасьлівай будучыні. У прыпеве яднаюцца пачуцьцёвыя ўспаміны маленства і сталасьці пра адзіны нязгасны вобраз Поля Жыцьця, якое ўвесь час ёсьць самым блізкім і дарагім. Урэшце, апяваецца жыцьцядайнасьць поля праз вольнасьць і заможнасьць, велічнасьць і творчасьць^[2].

Выканаўцы

У 1984 годзе ансамбаль «Сябры» на чале з Анатолем Ярмоленкам выканаў песьню «Два полі» на Беларускім тэлебачаньні для тэлеканцэрта «Салют Перамогі»^[3]. У 1984 годзе кампазытар Эдуард Ханок выпусьціў міні-альбом «Завіруха» з 3-х напісаных ім мэлёдыяў, сярод якіх 2-й была песьня «Два полі» ў выкананьні «Сяброў»^[4]. Запіс папярэдне ў 1983 годзе зрабілі на Ўсесаюзным радыё, а саму грампласьцінку накладам 30 000 асобнікаў у 1984 годзе выдала маскоўская студыя грамзапісу «Мэлёдыя» (Расейская СФСР)^[5].

У 1985 годзе «Сябры» выступілі зь песьняй акапэльна на 15-м тэлефэстывалі «Песьня-85», які паказвала Цэнтральнае тэлебачаньне СССР^[6]. У 1985 годзе гурт выпусьціў вінілавую грампласьцінку з сольным альбомам «Я ўдзячны лёсу», у складзе якога песьня «Два полі» была 2-й па ліку зь 9 мэлёдыяў. Альбом выйшаў на маскоўскай студцыі «Мэлёдыя» па выніках савецкага фэсту «Песьня-85»^[7]. Музычным кіраўніком альбому выступіў Мікалай Сацура, а мастацкім — Анатоль Ярмоленка^[8].

У 2008 годзе сьпеўны гурт 5-й брыгады спэцпрызначэньня выканаў песьню «Два полі» на 11-м тэлефэстывалі армейскай песьні «Зорка», які вёў палкоўнік Сяргей Макей^[9].

5 траўня 2016 году сьпявачка Тацяна Матафонава выканала песьню «Два полі» на прэзэнтацыі зборніка «Галасы паэтаў», якая прайшла ў грамадзкай залі сабору Кірылы Тураўскага ў Новым Ёрку^[10]. 13 траўня 2022 году песьню выканаў «Усіхсьвяцкі» мужчынскі хор пад дырыгенцтвам Зьмітра Такмакова^[11].

Верш

Было ў салдата два полі: Поле, дзе кветкі ірваў, Бегаў зь сябрамі на волі, І поле, дзе ён ваяваў. Прыпеў: Ціха было і чыста Ў полі яго дзяцінства. Былі агонь і дым На полі ратным тым. Два полі было ў салдата. Адно зелянела травой. Другое было ўзарата Вайной і паліта крывёй. Прыпеў. Было ў салдата два полі: Поле, дзе кветкі ірваў, Бегаў зь сябрамі на волі, І поле, дзе ён паміраў. Былі агонь і дым На полі ратным тым. Прыпеў. — Анатоль Вярцінскі, «Два полі»