Менскі дзяржаўны лінгвістычны ўнівэрсытэт

Ме́нскі дзяржа́ўны лінгвісты́чны ўнівэрсытэ́т (МДЛУ) — вядучая лінгвістычная вышэйшая навучальная ўстанова Беларусі, адзін з галоўных пэдагагічных унівэрсытэтаў краіны.

Менскі дзяржаўны лінгвістычны ўнівэрсытэт
Беларускі дзяржаўны ўніверсітэт замежных моў
Галоўны ўваход ва ўнівэрсытэт
Заснаваны	28 лістапада 1948 (76 гадоў таму)
Тып	дзяржаўны
Рэктар	Баранава Натальля Пятроўна
Колькасьць пэрсаналу	1186 (2011)
Месцазнаходжаньне
Геаграфічныя каардынаты	53°54′26″ пн. ш. 27°34′41″ у. д.
Горад	Менск
Краіна	Беларусь
Кампус	Гарадзкі
Былыя назвы	Менскі дзяржаўны пэдагагічны інстытут замежных моваў (да 13 кастрычніка 1993 г.)
Знаходзіцца ў складзе	Міністэрства адукацыі Рэспублікі Беларусь
Вэб-сайт	www.mslu.by
Менскі дзяржаўны лінгвістычны ўнівэрсытэт у Вікісховішчы
Менскі дзяржаўны лінгвістычны ўнівэрсытэт на мапе Менску Менскі дзяржаўны лінгвістычны ўнівэрсытэт

Гісторыя

Менскі дзяржаўны пэдагагічны інстытут замежных моваў утвораны ў лістападзе 1948 году на базе факультэту замежных моваў Менскага дзяржаўнага пэдагагічнага інстытуту.^[1] У 1993 годзе ператвораны ў Менскі дзяржаўны лінгвістычны ўнівэрсытэт.^[2]

За час свайго існаваньня (з 1948 году) унівэрсытэт падрыхтаваў больш за 25 тысячаў настаўнікаў і 2,5 тысячы перакладчыкаў-рэфэрэнтаў.^[3]

На лістапад 2011 г. ВНУ мела 58 катэдраў, на якіх працавалі 1186 выкладнікаў^[4].

Факультэты

• Факультэт ангельскае мовы
• Факультэт нямецкае мовы
• Факультэт францускае мовы
• Факультэт гішпанскае мовы
• Перакладчыцкі факультэт
• Факультэт міжкультурных камунікацыяў
• Факультэт расейскае мовы для замежных грамадзянаў
• Інстытут падвышэньня кваліфікацыі і перападрыхтоўкі кадраў

Агульнаўнівэрсытэцкія катэдры

• Катэдра агульнага мовазнаўства
• Катэдра псыхалёгіі
• Катэдра пэдагогікі
• Катэдра мэтодыкі выкладаньня замежных моў
• Катэдра філязофіі і лёгікі
• Катэдра эканамічных навукаў
• Катэдра інфарматыкі і прыкладной лінгвістыкі
• Катэдра другой замежнае мовы (ангельская)
• Катэдра другой замежнае мовы (нямецкая)
• Катэдра другой замежнае мовы (француская)
• Катэдра італьянскае мовы
• Катэдра трэцяй замежнае мовы
• Катэдра ўсходніх моў
• Катэдра гісторыі, сусьветнай культуры і турызму
• Катэдра беларускае мовы і літаратуры
• Катэдра паліталёгіі і міжнародных адносінаў
• Катэдра славянскіх моваў
• Катэдра фізычнага выхаваньня і спорту
• Катэдра пэдагогікі і мэтодыкі вышэйшай школы

Прафэсійныя асацыяцыі і цэнтры

На базе ўнівэрсытэту дзейнічаюць 5 прафэсійных асацыяцыяў: Беларускія асацыяцыі выкладчыкаў ангельскай, францускай і нямецкай моваў, Беларуская асацыяцыя камунікатыўнай лінгвістыкі, Беларуская асацыяцыя амэрыканскіх дасьледаваньняў.

Ва ўнівэрсытэце дзейнічае шэраг інфармацыйных цэнтраў (беларускай, гішпанскай, турэцкай ды кітайскай моваў і культураў).

Міжнароднае супрацоўніцтва

Унівэрсытэт мае 52 дзейныя дамовы аб супрацоўніцтве з замежнымі партнэрамі і зьяўляецца ўдзельнікам 19 міжнародных праграмаў. МДЛУ разьвівае сувязі з вышэйшымі навучальнымі ўстановамі Расеі, Аўстрыі, Францыі, Бэльгіі, Польшчы, Гішпаніі, Італіі, Вялікабрытаніі, мае сумесныя праграмы з ВНУ Канады, ЗША, Кітаю, Турцыі.^[5]

Ва ўнівэрсытэце навучаюцца 275 замежных студэнтаў з 33 краінаў сьвету. У 2001 годзе ўнівэрсытэт зьяўляўся арганізатарам і месцам правядзеньня ў Беларусі Эўрапейскага году моваў. На базе МДЛУ дзейнічае катэдра ЮНЭСКО.^[5]

У студзені 2010 году пры спрыяньні Пастаяннага прадстаўніцтва Рэспублікі Беларусь пры ААН унівэрсытэт падпісаў мэмарандум аб узаемаразуменьні з сакратарыятам ААН. МДЛУ стаў 16-й вышэйшай навучальнай установай сьвету, зь якой сакратарыят ААН падпісаў такі дакумэнт. Мэмарандум прадугледжвае садзейнічаньне ў падрыхтоўцы кандыдатаў для ўдзелу ў конкурсным адборы на суісканьне пасады вуснага або пісьмовага перакладчыка для ААН. Выкладчыкі МДЛУ атрымалі права рыхтаваць спэцыялістаў да экзамэну ў ААН, а таксама карыстацца любымі матэрыяламі ААН для навучальнага працэсу. Для падпісаньня мэмарандуму ў Беларусь з працоўным візытам прыбыў намесьнік генэральнага сакратара ААН па пытаньнях Генэральнай Асамблеі і канфэрэнцыйным абслугоўваньні Мухамад Шаабан.^[6]

Студэнцкае жыцьцё

• Студэнцкі хор «Cantus Juventae» (заснаваны ў 1986 годзе, у канцэртны склад хору ўваходзіць 60 чалавек; у рэпэртуары — беларуская народная музыка, духоўныя сьпевы, вядомыя творы беларускіх і замежных кампазытараў, джаз, і інш; хор выпусьціў тры кампакт-дыскі з сваімі сьпевамі ^[7]
• Вакальныя студыя «Фальк-Моdern» (створана ў 2004 годзе, самы малады песенны калектыў у студэнцкім клюбе МДЛУ)^[8]
• Тэатар танцу «Renaissance dance» (створаны ў 2004 годзе)^[9]
• Францускі тэатар (робіць пастаноўкі на францускай мове)

Абвінавачваньні ў палітычных рэпрэсіях

Паводле справаздачы, падрыхтаванай Польскім фондам свабоды й дэмакратыі, Натальля Баранава(be), рэктар унівэрсытэту, адлічала студэнтаў за іх палітычную дзейнасьць^[10].

Падзеі 2020 году

Асноўны артыкул: Пратэсты ў Беларусі (2020)

Падчас пратэстаў у Беларусі ў 2020 годзе, якія рушылі за, як многія лічаць, фальсыфікацыяй прэзыдэнцкіх выбараў^[11][12], МДЛУ стаў адным з эпіцэнтраў грамадзянскае актыўнасьці студэнтаў, якія пратэставалі супраць рэжыму Лукашэнкі^[13][14]. За гэта студэнты арыштаваліся міліцыяй і сілавікамі неўсталяванага падпарадкаваньня на тэрыторыі ўнівэрсытэту, пры гэтым адміністрацыя ўнівэрсытэту не прапаноўвала абарону сваім студэнтам і замест гэтага забараняла ўсе пратэсты на тэрыторыі кампуса^[14][15][16]. Нягледзячы на адсутнасьць падтрымкі студэнтаў з боку адміністрацыі, Аляксандар Лукашэнка пасьля асабіста зьмяніў рэктара ўнівэрсытэту^[17][18]. Шэраг вучоных, якія працуюць у МДЛУ, запісалі відэазварот, у якім асудзілі рэакцыю ўнівэрсытэту^[15]. За гэтым усьлед рушыла рэакцыя кіраўніцтва: дацэнта, які прапрацаваў у МДЛУ 28 гадоў, звольнілі за падтрымку студэнцкіх пратэстаў і страйк^[19], за ім рэпрэсавалі таксама і іншых выкладчыкаў, якія падтрымалі пратэстуючых^[20].

Дзеяньні кіраўніцтва ўнівэрсытэту былі шырока асуджаныя на міжнародным узроўні^[15][21]. У справаздачы «International Media Support(en)», у прыватнасьці, было адзначана, што «падзеі ў Менскім дзяржаўным лінгвістычным унівэрсытэце паказваюць, як студэнты падвяргаюцца пагрозам і рэпрэсіям з боку сваіх уласных навучальных установаў»^[22].

Узнагароды

• Ганаровы дзяржаўны сьцяг Рэспублікі Беларусь (прысуджаны за асаблівыя дасягненьні ў сацыяльна-культурным разьвіцьці, шматгадовую плённую дзейнасьць па падрыхтоўцы высокакваліфікаваных спэцыялістаў і навуковых кадраў і ў сувязі з 60-годзьдзем зь дня заснаваньня)^[23]

Выпускнікі

• Іван Антановіч (1960) — 3-ы міністар замежных справаў Рэспублікі Беларусь (1997—1998)
• Міхаіл Хвастоў (1975) — 5-ы міністар замежных справаў Рэспублікі Беларусь (2000—2003)
• Уладзімер Макей (1980) — 7-ы міністар замежных справаў Рэспублікі Беларусь (2012—2022)