Паленсія

Пале́нсія (па-гішпанску: Palencia) — горад у Гішпаніі, які месьціцца ў аўтаномнай супольнасьці Кастылія і Леон. Адміністрацыйны цэнтар аднайменнай правінцыі. Паленсія была заснавана як Палянтыя на беразе ракі Карыён у I стагодзьдзі да н. э., затым заваяваная вэстготамі, ад якіх захавалася найстаражытная ў Гішпаніі хрысьціянская царква — базыліка Сан-Хуан-Баўтыста (за 12 км ад гораду каля вёскі Вэнта-дэ-Баньёс). У Сярэднявеччы Паленсія была каралеўскай рэзыдэнцыяй. У 1212 годзе Альфонса VIII Кастыльскі заснаваў у горадзе першы ў Гішпаніі ўнівэрсытэт, які пазьней быў пераведзены ў Саляманку. Галоўны будынак гораду — сабор Ля-Бэльля-Дэскансыда, фактычна скапіяваны з Бургаскага сабора. Паводле перапісу насельніцтва на 2009 год у Паленсіі пражываюць 82 651 чалавек.

Паленсія
гішп. Palencia
Герб Паленсіі Сьцяг Паленсіі
Краіна:	Гішпанія
Аўтаномная супольнасьць:	Кастылія і Леон
Правінцыя:	Паленсія
Кіраўнік:	Альфонса Палянка[d]
Плошча:	94,71 км²
Вышыня:	749 м н. у. м.
Насельніцтва (2016)
колькасьць:	79 137 чал.
шчыльнасьць:	835,57 чал./км²
Часавы пас:	UTC+1
летні час:	UTC+2
Тэлефонны код:	979
Паштовы індэкс:	34001–34006
Нумарны знак:	P
Геаграфічныя каардынаты:	42°1′0″ пн. ш. 4°32′0″ з. д.
Паленсія на мапе Гішпаніі Паленсія
Галерэя здымкаў у Вікісховішчы
http://www.aytopalencia.es/

Гісторыя

Паленсійскі сабор

Умацаванае паселішча кельтаібэраў згадваецца як Пальлянтыя яшчэ Страбонам і Пталямэям^[1]. Горад быў падпарадкаваны рымлянамі ў II стагодзьдзі да нашай эры й уключаны ў правінцыю Тараконская Гішпанія. У горадзе меўся маленькі вайсковы гарнізон. У адпаведнасьці са зьвесткамі гальскага летапісца V стагодзьдзя Ідацыюса, Паленсія была ​​амаль цалкам разбурана ў 457 годзе падчас вайны вэстготаў супраць свэваў, гэтая дата выпадае на пэрыяд кіраваньня Тэадорыха II, калі сталіцца вэстготаў яшчэ месьцілася далёка на ўсход, у Аквітаніі.

У III стагодзьдзі альбо раней у горадзе была створана каталіцкая дыяцэзія^[2].

Адукацыя

Першы ўнівэрсытэт у Гішпаніі быў заснаваны менавіта ў Паленсіі Альфонса VIII ў 1208 годзе. Мяркуецца, што паэт XIII стагодзьдзя Гансалё дэ Бэрсэо вучыўся ў гэтым унівэрсытэце. Пазьней настаўнікі з Паленсіі былі прыцягнутыя да квітнеючага ўнівэрсытэту Саляманкі.