Пружанскі завод радыёдэталяў

ААТ Пружа́нскі заво́д радыёдэта́ляў — прамысловае прадпрыемства ў Пружанах Берасьцейскай вобласьці, заснаванае ў 1967 року.

Пружанскі завод радыёдэталяў
Тып	Адкрытае акцыянэрнае таварыства
Заснаваная	1967
Разьмяшчэньне	Беларусь, 225133, Берасьцейская вобласьць, Пружаны, вул. Чырвонаармейская, 81
Ключавыя фігуры	Віктар Каліх
http://pzrd.by/

Уваходзіць у склад прадпрыемстваў Міністэрства прамысловасьці Рэспублікі Беларусь.

Вытворчасьць

• распрацоўка канструктарскае дакумэнтацыі;
• інструмэнтальная вытворчасьць;
• ліцьцё тэрмаплястаў;
• ліцьцё рэактаплястаў;
• прэсаваньне рэактаплястаў;
• халоднае штампаваньне;
• мэханаапрацоўка мэталаў, рамонт і выраб запчастак для тэхнікі АПК;
• гальванічнае пакрыцьцё вырабаў з мэталу (цынк, цына—бісмут, нікель, храмаваньне, срэбраньне) ў звонах і барабанах^[1][2].

Мінуўшчына

Заснаваны ў 1967 року як філія 1-га Маскоўскага заводу радыёдэталяў. У траўні 1968 першыя супрацоўнікі былі накіраваныя на стажыраваньне ў Маскву. У сьнежні таго ж року была выпушчаная першая прадукцыя — пераменныя рэзыстары СП3-4.

Завод займаўся вытворчасьцю радыёдэталяў (рэзыстараў) для вайсковае радыёэлектроннае апаратуры. Вытворчасьць была засакрэчаная, і прадпрыемства наогул нельга было згадваць у друку^[3].

Першы драўляны будынак заводакіраваньня на вуліцы Чырвонаармейскай не захаваўся. Новы галоўны корпус збудаваны на месцы былога стадыёну.

У пачатку 90-х рокаў вытворчасьць рэзыстараў заняпала, і профіль прадпрыемства перакваліфікаваны. Былі спробы выпускаць мэблевую фурнітуру, плястмасавыя цацкі, мэталаканструкцыі, дробныя мэталічныя запчасткі.

У цяперашні час частка плошчаў здаецца ў арэнду прыватным прадпрыемствам. 25 сакавіка 2012 року на складзе аднаго з арандатараў — ААТ «Нятканы сьвет» — адбыўся пажар, плошча якога склала 2400 м². На тушэньне пажару спатрэбіліся 4 гадзіны, 15 адзінак тэхнікі і 40 выратавальнікаў^[4].