Рабэрта Сальдада

Рабэрта Сальдада Рыльлё (па-гішпанску: Roberto Soldado Rillo; нар. 27 траўня 1985 году, Валенсія, Гішпанія) ― колішні гішпанскі футбаліст. Абараняў колеры нацыянальнай зборнай Гішпаніі. Гуляў на пазыцыі нападніка.

Рабэрта Сальдада
Пэрсанальная інфармацыя
Нарадзіўся	27 траўня 1985(1985-05-27)[1][2] (40 гадоў) Валенсія
Рост	179 см
Вага	72 кг
Пазыцыя	нападнік
Клюбы
Гады	Клюб	Гульні (галы)¹
2006—2008	Рэал Мадрыд	16 (2)
2006—2007	→ Асасуна	30 (11)
2008—2010	Хэтафэ	60 (29)
2010—2013	Валенсія	101 (59)
2013—2015	Тотэнгэм Готспур	52 (7)
2015—2017	Вільярэал	38 (9)
2017—2019	Фэнэрбахчэ	47 (15)
2019—2021	Гранада	62 (16)
2021—2023	Левантэ	43 (5)
Зборныя
2002—2004	Гішпанія (да 19)[d]	9 (5)
2003	Гішпанія (да 18)[d]	3 (3)
2004—2007	Гішпанія (да 21)[d]	9 (6)
2007—2013	Гішпанія	12 (7)

Кар’ера

«Рэал»

Рабэрта далучыўся да мадрыдзкага «Рэалу» ў 14 гадоў, пасьля таго, як ён пакінуў «Дон Боска» (клюб рэгіянальнай лігі аўтаномнай супольнасьці Валенсіі), і год за годам прасоўваўся празь юнацкія каманды «Рэалу». Ён быў адным з ключавых гульцоў «Рэал Мадрыд Кастыльля» ў той час, калі дубль «Рэалу» здолеў выйсьці ў лігу Сэгунда, забіўшы ў сэзоне 2005—2006 гадоў 19 галоў, Рабэрта атрымаў Трафэй Зары й дапамог камандзе ўтрымацца ў другой лізе гішпанскага чэмпіянату. У гэтым жа годзе ён дэбютаваў у першай камандзе ў гульнях Ля Лігі, таксама ён зьяўляўся на полі й у Лізе чэмпіёнаў, больш за тое, Сальдада здолеў адзначыцца ў абодвух турнірах забітымі галамі.

Сэзоне 2006—2007 гадоў Сальдада правёў у «Асасуне», куды быў аддадзены для атрыманьня гульнявой практыкі й вопыту гульняў у Ля Лізе. У гульнях за «Асасуну» Рабэрта забіў 14 галоў і стаў адным з адкрыцьцяў сэзону. Сэзон 2007—2008 гадоў, аднак, аказаўся для маладога форварда куды менш удалым: рэальнай канкурэнцыі Руўду ван Ністэльрою, які атрымаў у папярэднім сэзоне тытул «Пічычы», самага дзейснага гульца гішпанскай лігі, Рабэрта скласьці ня здолеў.

«Хэтафэ»

Улетку 2008 году Сальдада пакінуў «Рэал» і перабраўся ў «Хэтафэ»^[3].

«Валенсія»

У зімовае трансфэрнае вакно сэзону 2009—2010 гадоў зьявілася інфармацыя, што па заканчэньні сэзону Рабэрта можа вярнуцца ў родны горад^[4], замяніўшы ў «Валенсіі» аднаго зь лідэраў каманды, найлепшага бамбардзіра клюбу другой паловы 2000-х — Давіда Вільлю. 9 чэрвеня 2010 году стала вядома, што «Хэтафэ» й «Валенсія» дасягнулі пагадненьня аб пераходзе Сальдада^[5]. Кантракт, які абыйшоўся «Валенсіі» ў 10 млн эўра, быў разьлічаны на 4 гады^[6].

Паводле вынікаў сэзону 2011—2012 гадоў Рабэрта, які выконваў у мінулым сэзоне абавязкі віцэ-капітана «Валенсіі», забіў 17 мячоў, стаўшы ня толькі найлепшым бамбардзірам клюбу, але й заваяваўшы, такім чынам, Трафэй Сары. Рабэрта стаў першым у гісторыі гішпанскага футболу гульцом, якому ўдалося дамагчыся гэтага посьпеху ў абедзьвюх прафэсійных гішпанскіх лігах.

«Тотэнгэм Готспур»

1 жніўня 2013 году «Тотэнгэм Готспур» дамовіўся з «Валенсіяй» аб трансфэры гульца за рэкордную для клюбу плату ў памеры 26 млн фунтаў^[7]. Трансфэр быў афіцыйна пацьверджаны праз чатыры дні пасьля пасьпяховага мэдычнага абсьледаваньня^[8].

Міжнародная кар’ера

У 2007 годзе малады форвард упершыню атрымаў выклік у нацыянальную зборную Гішпаніі, на адборачныя матчы чэмпіянату Эўропы супраць зборных Латвіі й Ліхтэнштайну. Нягледзячы на тое, што Сальдада згуляў у абодвух матчах, на якія выклікаўся, у сьпісе гульцоў, выкліканых у зборную Гішпаніі для ўдзелу ў фінальным турніры чэмпіянату Эўропы, Рабэрта не аказалася.

У лютым 2012 году галоўны трэнэр зборнай Гішпаніі, Вісэнтэ дэль Боске, пасьля амаль пяцігадовага перапынку выклікаў Рабэрта на таварыскі матч супраць зборнай Вэнэсуэлы. Сальдада выйшаў на поле ў пачатку другога тайму, замяніўшы Фэрнанда Льярэнтэ, і адзначыў сваё вяртаньне ў нацыянальную каманду трыма забітымі мячамі^[9].

Дасягненьні

«Рэал»:

• Чэмпіён Гішпаніі: 2008