Радзім Гарэцкі

Радзі́м Гаўры́лавіч Гарэ́цкі (1928, Менск, цяпер Беларусь — 2025, Менск, Беларусь) — беларускі вучоны-геоляг, грамадзкі дзяяч. Акадэмік НАН Беларусі. Сын Гаўрылы Іванавіча Гарэцкага, пляменьнік Максіма Гарэцкага. Цесьць Генадзя Вугляніцы^[2].

Вікіпэдыя мае артыкулы пра іншых асобаў з прозьвішчам Гарэцкі.

Радзім Гарэцкі лац. Radzim Harecki
Дата нараджэньня	7 сьнежня 1928(1928-12-07)
Месца нараджэньня	Менск, БССР, СССР
Дата сьмерці	22 чэрвеня 2025(2025-06-22)[1] (96 гадоў)
Месца вучобы	Расейскі дзяржаўны ўнівэрсытэт нафты і газу[d]
Занятак	геоляг, прафэсар унівэрсытэту
Навуковая сфэра	геалёгія
Месца працы	Геалягічны інстытут РАН[d] Інстытут геалягічных навук НАН Беларусі[d] БДУ Інстытут прыродакарыстаньня
Сябра ў	Згуртаваньне беларусаў сьвету Бацькаўшчына, ТБМ, Беларускі фонд культуры і Беларуская перспектыва[d]
Навуковая ступень	доктар геоляга-мінэралягічных навук[d] (1969)
Узнагароды

Адукацыя

Скончыў Маскоўскі нафтавы інстытут імя І. М. Губкіна(ru).

Навуковая дзейнасьць

У 1952—1957 навуковы супрацоўнік Геалягічнага інстытуту АН СССР. З 1971 загадчык аддзелу (а з 1978 лябараторыі) Інстытуту геахіміі і геафізыкі АН БССР (з 1994 Інстытут геалягічных навук). Чалец-карэспандэнт АН БССР (1972), з 1977-га — правадзейны чалец АН БССР. У 1977—1993 дырэктар Інстытуту геахіміі і геафізыкі АН Беларусі.

У 1973—1990 сябра Бюро, намесьнік старшыні, старшыня Міжведамаснага тэктанічнага камітэту АН СССР. З 1975 намесьнік старшыні, старшыня Беларускага нацыянальнага камітэту па Міжнароднай праграме геалягічнай карэляцыі, з 1993 сябра Амэрыканскага геафізычнага саюзу. У 1992—1997 віцэ-прэзыдэнт Нацыянальнай акадэміі навук Беларусі. З 1993 галоўны рэдактар часопісу «Літасфэра». У 1995—1997 працаваў загадчыкам катэдры Беларускага дзяржаўнага ўнівэрсытэту.

Радзім Гарэцкі зьяўляецца заснавальнікам беларускай школы тэктаністаў. Добра вядомы ў міжнародных навуковых колах. Імем Радзіма Гарэцкага названа некалькі відаў выкапнёвых арганізмаў.

Навуковыя працы

Навуковыя працы прысьвечаныя тэктоніцы і геадынаміцы плятформаў, уключаючы тэрыторыю захаду Ўсходне-Эўрапейскага кратона і Беларусі, геалёгіі карысных выкапняў. Удзельнічаў у складаньні шматлікіх тэктанічных мапаў у якасьці галоўнага рэдактара ці аўтара. Р. Гарэцкі зьяўляецца аўтарам 500 навуковых прац.

Надрукаваў шэраг твораў, прысьвечаных нацыянальнаму адраджэньню Беларусі.

Грамадзкая дзейнасьць

Радзім Гарэцкі зьяўляецца сябрам Саюзу беларускіх пісьменьнікаў і актыўным грамадзкім дзеячам. Ён клапоціцца пра адраджэньне нацыянальнай культуры. На працягу васьмі гадоў, з 1993 да 2001, зьяўляўся прэзыдэнтам «Згуртаваньня беларусаў сьвету „Бацькаўшчына“», на цяперашні момант сябра Вялікай і Малой Радаў арганізацыі.

Прэміі і ўзнагароды

Узнагароджаны ордэнам Працоўнага Чырвонага Сцяга і мэдалямі. Узнагароджаны дзяржаўнымі прэміямі СССР, БССР, Расейскай АН.