Убарць

У́барць — рака ў Беларусі і Ўкраіне, правы прыток Прыпяці (басэйн Дняпра). Даўжыня 292 км (у межах Беларусі 126 км). Плошча вадазбору 5,8 тыс. км². Выдатак вады ў вусьці 24,4 м³/с. Агульны спад ракі 96,3 м. Сярэдні нахіл воднай паверхні 0,3 ‰.

Рака

Убарць лац. Ubarć
Убарць каля мястэчка Емільчына
Агульныя зьвесткі
Выток	каля в. Андрэевічаў
Вусьце	Прыпяць
Краіны басэйну	Беларусь, Украіна
Вобласьці	Гомельская вобласьць і Жытомірская вобласьць
Даўжыня	292 км
Сярэднегадавы сьцёк	24,4 м³/с
Плошча басэйну	5,8 тыс. км²
Нахіл воднай паверхні	0,3 ‰
Галерэя здымкаў у Вікісховішчы

Асноўныя прытокі

• Правыя: Плотніца, Лохніца, Сьвідовец, Балотніца, Гурыстая
• Левыя: Крывы Рог, Каросьцінка

На рацэ

• Мястэчкі: Алеўск, Емільчына, Лельчыцы.

Агульныя зьвесткі

Пачынаецца на вышыні 207,2 м над узроўнем мора каля вёскі Андрэевічаў Алеўскага раёну Жытомірскай вобласьці. Цячэ Жытомірскім Палесьсем, на Беларусі Прыпяцкім Палесьсем. Вусьце за 2 км на паўднёвы захад ад места Петрыкава.

Даліна невыразная, месцамі зьліваецца з прылеглай мясцовасьцю. Абалона двухбаковая, чаргуецца па берагах, яе шырыня ад 0,1—0,2 км у верхняй плыні да 1—5 км на астатнім працягу. Рэчышча свабодна мэандруе, зьвілістае, у ніжняй плыні моцназьвілістае, зрэдку трапляюцца нізкія пясковыя выспы. Шырыня рэчышча 10—15 м, у нізоўі месцамі да 60 м.

Разводзьдзе пачынаецца звычайна ў 1-й палове сакавіка (найбольшая вышыня над межанным узроўнем 4 м, сярэдняя 1,8—2,7 м), заканчваецца ў сярэдзіне траўня. Устойлівая межань наступае ў ліпені (працягласьць у сярэднім 3 месяцы). Замярзае ў пачатку сьнежня. Выдатак вады за 44 км ад вусьця найбольшы 659 м³/с (1932 год), найменшы 0,44 м³/с (1935 год)^[1].