Энса Фэрнандэс

Э́нса Хэрэмі́яс Фэрна́ндэс (па-гішпанску: Enzo Jeremías Fernández; нар. 17 студзеня 2001 году) — аргентынскі футбаліст, паўабаронца ангельскага клюбу «Чэлсі» і нацыянальнай зборнай Аргентыны. Звычайна гуляе на пазыцыі цэнтральнага паўабаронцы, але здольны выканаць ролю апорнага ці атакуючага паўабаронцы. Жанаты, мае дачку і сына.

Энса Фэрнандэс
Пэрсанальная інфармацыя
Нарадзіўся	17 студзеня 2001(2001-01-17)[1] (24 гады) Сан-Марцін[d], Буэнас-Айрэс, Аргентына
Рост	178 см
Вага	78 кг
Пазыцыя	паўабаронца
Клюбная інфармацыя
Клюб	Чэлсі
Нумар	8
Клюбы
Гады	Клюб	Гульні (галы)¹
2019—2022	Рывэр Плэйт	40 (10)
2020—2021	→ Дэфэнса і Хустысія	14 (0)
2022—2023	Бэнфіка	17 (1)
2023—4	Чэлсі	82 (9)
Зборныя
2022—4	Аргентына	37 (5)
¹ Колькасьць гульняў і галоў за прафэсійны клюб лічыцца толькі для нацыянальнай лігі, адкарэктавана на 25 траўня 2025. ² Колькасьць гульняў і галоў за нацыянальную зборную ў афіцыйных матчах, адкарэктавана на 10 чэрвеня 2025.

Кар’ера

Клюбная

Выхаванец акадэміі «Рывэр Плэйту». Дэбютаваў у асноўнай камандзе клюбу ў 2019 годзе, а затым правёў два сэзоны ў арэндзе ў клюбе «Дэфэнса і Хустысія». Быў важнай часткай каманды, якая здолела здабыць Паўднёваамэрыканскі кубак, а таксама стаць пераможцамі Рэкопы Паўднёвай Амэрыкі. Пасьля гэтага вярнуўся ў «Рывэр Плэйт» у 2021 годзе. Па вяртаньні Фэрнандэс зарэкамэндаваў сябе як ключавы гулец клюбу, стаўшы зь ім чэмпіёнам краіны ў тым жа годзе. Улетку 2022 году гулец далучыўся да «Бэнфікі».

Адгуляўшы за партугальскі клюб усяго шэсьць месяцаў, у студзені 2023 году ён быў набыты ангельскім «Чэлсі» за рэкордныя 106,8 мільёнаў фунтаў стэрлінгаў. Кантракт гульца разьлічаны на восем за паловай гадоў^[2]. Фэрнандэс дэбютаваў у Прэм’ер-лізе 3 лютага ў хатнім матчы супраць «Фулгэму», згуляўшы 90 хвілінаў^[3]. 11 лютага аргентынец зрабіў галявую перадачу ў матчы супраць «Ўэст Гэм Юнайтэд», і сустрэча скончылася зь лікам 1:1^[4]. 30 жніўня 2023 году ўлучыў мяч у браму «Ўімбэлдану» ў матчы Кубка лігі^[5]. А 30 сьнежня забіў першыя галы ў элітным дывізіёне, двойчы засмуціўшы брамніка «Брайтан энд Гоўв Альбіёну»^[6].

Міжнародная

Дэбютаваў у складзе нацыянальнай зборнай Аргентыны 24 верасьня 2022 году ў матчы супраць зборнай Гандурасу^[7]. Гулец замяніў на 64-й хвіліне сустрэчы Леандра Парэдэса.

Дасягненьні

«Дэфэнса і Хустысія»:

• Уладальнік Паўднёваамэрыканскага кубка: 2020
• Пераможца Рэкопы Паўднёвай Амэрыкі: 2021

«Рывэр Плэйт»:

• Чэмпіён Аргентыны: 2021
• Уладальнік Трафэю чэмпіёнаў: 2021

«Бэнфіка»:

• Чэмпіён Партугаліі: 2023

«Чэлсі»:

• Пераможца Лігі канфэрэнцыяў: 2025
• Пераможца клюбнага чэмпіянату сьвету: 2025

Аргентына:

• Чэмпіён сьвету: 2022
• Уладальнік Кубка Амэрыкі: 2024