Tax free

Такс-фры (па-ангельску: Tax free — бяз збораў) — сыстэма вяртаньня сумы падатку на дададзеную вартасьць (ПДВ). ПДВ вяртаецца на пакупкі, зробленыя замежнымі грамадзянамі пры выезьдзе за граніцу тае дзяржавы, дзе былі зробленыя пакупкі. Сумы вяртаньня складаюць ад 7 да 20% ад сумы пакупкі ў залежнасьці ад велічыні ПДВ ў канкрэтнай краіне.

Сэрвісы такс-фры дзейнічаюць у больш як 320 000 крамаў 40 краінаў сьвету.

Для юрыдычных асобаў таксама існуе сыстэма вяртаньня сумы ПДВ з выдаткаў на замежныя бізнэсовыя паездкі — Business Tax free.

Эўразьвяз

Турысты, якія ўяжджаюць ў Эўразьвяз, маюць магчымасьць скарыстацца сыстэмай такс-фры ў крамах па-за межамі аэрапортаў. Асноўным патрабаваньнем для вяртаньня ПДВ зьяўляецца грамадзянства пакупніка — не з краіны Эўразьвязу; пакупкі павінны быць экспартаваныя за мяжу Эўразьвязу не пазьней за тры месяцы з даты набыцьця; для вяртаньня ПДВ прадстаўляюцца толькі тавары, набытыя для асабістага карыстаньня.

Вярнуць грашовыя сродкі можна наступным чынам:

• У аэрапорце пры вылеце ў пункце Tax free cash refund. Пункты вяртаньня гатоўкі звычайна месьцяцца ля крамаў Duty free.
• Ва ўпаўнаважаных на працу з сыстэмаю Tax free банках, куды трэба зьвярнуцца падчас наступнае паездкі ў краіну, дзе была зробленая пакупка.

Беларусь

У Беларусі сыстэма Tax free ўведзеная з 1 студзеня 2013 року. Мінімальная сума пакупкі, зь якой будзе вяртацца ПДВ — 800 000 рублёў. Грошы можна вярнуць цягам трох месяцаў пасьля даты пакупкі, аднак яшчэ няма кампаніі-апэратара, якая займаецца вяртаньнем сродкаў^[1].

Беларусы, якія зьдзейсьнілі за мяжой пакупкі па сыстэме Global Blue, маюць магчымасьць вярнуць ПДВ у «Тэхнабанку» (Менск)^[2].

Мінімальны кошт пакупкі і тэрмін, на працягу якога адбываецца вяртаньне сродкаў

•  Аўстрыя — 75,01 EUR, без абмежаваньняў
•  Баўгарыя — 300 BGN
•  Беларусь — 800 000 BYR, 3 месяцы ад даты пакупкі
•  Бэльгія — 125 EUR
•  Вугоршчына — 45 000 HUF
•  Вялікабрытанія — без абмежаваньняў, 3 месяцы ад даты пакупкі
•  Гішпанія — 90,15 EUR, без абмежаваньняў
•  Данія — 300 DKK (1200 DKK для нарвэжцаў)
•  Ірляндыя — без абмежаваньняў
•  Італія — 154,95 EUR, 3 месяцы ад даты пакупкі
•  Кіпр — 50 EUR
•  Летува — 200 LTL
•  Люксэмбург — 74 EUR
•  Мальта — 55 EUR
•  Нідэрлянды — 50 EUR, 3 месяцы ад даты пакупкі
•  Нямеччына — 25 EUR (для ПДВ 19%) або 30 EUR (для ПДВ 7%), 3 месяцы ад даты пакупкі
•  Партугалія — 49,88 EUR
•  Польшча — 200 PLN, 4 месяцы ад даты пакупкі
•  Фінляндыя — 40 EUR, 3 месяцы ад даты пакупкі
•  Францыя — 175 EUR, 6 месяцаў ад даты пакупкі
•  Чэхія — 2000 CZK, 6 месяцаў ад даты пакупкі
•  Швайцарыя — 300 CHF, 1 месяц ад даты пакупкі
•  Швэцыя — 200 SEK
•  Эстонія — 38 EUR

Глядзіце таксама

• Duty free