Будапэшцкі ўнівэрсытэт

Будапэшцкі ўнівэрсытэт (Унівэрсытэт імя Ло́ранда Э́твэша) — найбуйнейшы ўнівэрсытэт Вугоршчыны.

Будапэшцкі ўнівэрсытэт
Eötvös Loránd Tudományegyetem (ELTE)[1]
Лінгвістычны факультэт на беразе Дунаю
Лягатып
па-лацінску: Universitas Budapestinensis de Rolando Eötvös nominata
Заснаваны	1635 (390 гадоў таму)
Тып	грамадзкі
Рэктар	Прафэсар, доктар Мэзэй Барна
Факультэтаў	8
Колькасьць пэрсаналу	1500
Колькасьць студэнтаў	каля 30 000
Месцазнаходжаньне
Горад	Будапэшт
Краіна	Вугоршчына
Кампус	гарадзкі
Знаходзіцца ў складзе	Асацыяцыя эўрапейскіх унівэрсытэтаў, Куімбрская група, Утрэхцкая сетка
Вэб-сайт	www.elte.hu
Будапэшцкі ўнівэрсытэт у Вікісховішчы

Гісторыя

У 1635 годзе ў Трнаве (сучасная Славаччына) кардынал Пэтэр Пазмань заснаваў унівэрсытэт з двума факультэтамі — вольных мастацтваў і тэалёгіі. У 1667 годзе быў створаны юрыдычны факультэт. У 1777 годзе ўнівэрсытэт з Трнавы быў пераведзены ў Буду, а ў 1784 годзе — у Пэшт. Да 1844 году выкладаньне ва ўнівэрсытэце вялося на лацінскай мове. З 1895 году ва ўнівэрсытэце атрымалі магчымасьць навучацца й жанчыны. У 1921—1950 унівэрсытэт насіў імя свайго заснавальніка Пэтэра Пазманя, а ў 1950 годзе быў названы ў гонар фізыка Лоранда Этвэша.

Склад

Факультэты

На пачатак 2011 году існуюць 8 факультэтаў:

• Факультэт права й палітычных навук
• Факультэт сацыяльных навук
• Факультэт гуманітарных навук
• Факультэт прыродазнаўчых навук
• Факультэт інфарматыкі
• Факультэт адмысловага навучаньня
• Факультэт пэдагогікі й псыхалёгіі
• Факультэт пэдагогікі пачатковай школы

Беларусістыка

Беларуская мова выкладаецца з 1994 году загаднікам катэдры ўсходнеславянскай і балканскай філялёгіі Андрашам Золтанам і мовазнаўцамі зь Берасьцейскага ўнівэрсытэту (Беларусь). З 2005 году беларускую мову выкладае дацэнтка Ларыса Станкевіч. Разам з Жужай Каціч яна выдала вугорскамоўны падручнік «Дваццаць сустрэч зь Беларусьсю» (2006) і «Вугорска-беларускі слоўнік» (2007)^[2].