Іван Дарэмідонтавіч Трубнікаў

У Вікіпедыі ёсць артыкулы пра іншых людзей з прозвішчам Трубнікаў.

Іван Дарэмідонтавіч Трубнікаў (1857 — ?) — беларускі і ўкраінскі інжынер і архітэктар^[1].

Іван Дарэмідонтавіч Трубнікаў
Дата нараджэння	24 чэрвеня 1857(1857-06-24)
Дата смерці	не раней за 1913
Альма-матар	Пецярбургскае будаўнічае вучылішча (1884)
Медыяфайлы на Вікісховішчы

Біяграфія

Нарадзіўся ў 1857 годзе. Пачатковую адукацыю атрымаў у рэальным вучылішчы, адкуль перайшоў у Інстытут грамадзянскіх інжынераў у 1879 годзе. Скончыў курс па 1-м разрадзе ў 1884 годзе^[1].

Па выхадзе з Інстытута прызначаны малодшым інжынерам будаўнічага аддзялення гродзенскага губернскага праўлення, а праз тры гады прызначаны малодшым архітэктарам там жа. У 1890 годзе пераведзены ў горад Камянец-Падольскі ў якасці губернскага архітэктара будаўнічага аддзялення і займаў гэта месца прынамсі да 1892 года^[1]. У 1905 годзе быў прызначаны выконваючым пасаду валынскага губернскага інжынера^[2][3] і займаў гэту пасаду да 1913 года^[4].

9 красавіка 1907 года было зарэгістравана Жытомірскае таварыства аматараў фізічных практыкаванняў, у якім адным з членаў праўлення стаў губернскі інжынер І. Трубнікаў^[3].

Творчасць

Дзейнасць І. Трубнікава заключалася галоўным чынам у рамонце і перабудовах казённых будынкаў (турмы, казначэйствы, бальніцы), збудаванні новых драўляных мастоў, царкоўных пабудовах у некалькіх паветах Гродзенскай губерні і ў складанні розных праектаў^[1].

У 1880-х гадах удзельнічаў у будаўніцтве Новых казармаў за чыгункай у Гродне (цяпер на рагу вуліц Чырвонаармейскай і Шчорса)^[5]. У 1887—1890 гадах праектаваў мураваныя храмы ў Гродзенскай губерні^[1].

Праекты

Свята-Іаана-Прадцечанская царква ў Лунне.

Беларусь

• Праект Свята-Іаана-Прадцечанскай царквы ў мястэчку Лунне Гродзенскага павета (1886).
• Праект рэканструкцыі Барысаглебскай царквы ў вёсцы Накрышках Гродзенскага павета (19 студзеня 1885).
• Праект рэканструкцыі Свята-Міхайлаўскай царквы ў вёсцы Сынкавічах Слонімскага павета (24 чэрвеня 1886)^[6].

Польшча

• Праект Свята-Мікалаеўскай царквы  (польск.) ў сяле Гарадзіск  (руск.) Бельскага павета.
• Праект царквы Раства Іаана Хрысціцеля  (польск.) ў сяле Пасынкі  (бел. (тар.)) Бельскага павета^[1].

Адрасы

У Жытоміры:

• у 1908-09 гадах жыў па адрасе зав. Кудраўцава, д. № 4^[7]
• у 1911 — у зав. Кудраўцава, д. № 3^[8]
• 1912-13 — па вул. Баннай, д. № 4

Зноскі

1. Барановский Г. В. Юбилейный сборник сведений о деятельности бывших воспитанников Института гражданских инженеров (Строительного училища) 1842—1892. С. 349 (руск.)
2. Памятная книжка Волынской губернии на 1905 год (руск.)
3. Григорій Грибан ІСТОРІЯ ДІЯЛЬНОСТІ СПОРТИВНИХ ТОВАРИСТВ НА ЖИТОМИРЩИНІ В 1893—1922 РОКАХ (укр.)
4. Памятныя кніжкі Валынскай губерні за адпаведныя гады
5. Александр Севенко. История 11-го военного городка в г. Гродно (руск.)
6. Кулагин А. Н. Гродненские зодчие XIX — начала XX веков (новые архивные изыскания). // Пытанні мастацтвазнаўства, этналогіі і фалькларыстыкі. Выпуск 24. — Мінск, «Права і эканоміка». — 2018. — С. 79
7. Памятная книжка Волынской губернии на 1909 год (руск.)
8. Памятная книжка Волынской губернии на 1911 год (руск.)