Аляксандр Сцяпанавіч Рагачук

Аляксандр Сцяпанавіч Рагачу́к (нар. 1 лютага 1965, Шыповічы, Кобрынскі раён, Брэсцкая вобласць, БССР) — беларускі дзяржаўны дзеяч. Старшыня Брэсцкага гарадскога выканаўчага камітэта (2014^[1]–2023^[2]). Палкоўнік запасу.

Аляксандр Сцяпанавіч Рагачук
старшыня Брэсцкага гарадскога выканаўчага камітэта[d] 14 кастрычніка 2014 — сакавік 2023
Папярэднік	Аляксандр Сяргеевіч Палышанкоў
Пераемнік	Сяргей Мікалаевіч Лабадзінскі[d]
Нараджэнне	1 лютага 1965(1965-02-01) (60 гадоў) Шыповічы, Батчынскі сельсавет, Кобрынскі раён, Брэсцкая вобласць, Беларуская ССР, СССР
Адукацыя	Курганскае вышэйшае ваенна-палітычнае авіяцыйнае вучылішча[d] Акадэмія кіравання пры Прэзідэнце Рэспублікі Беларусь Інстытут павышэння кваліфікацыі і перападрыхтоўкі БрДТУ
Месца працы	Самарскі дзяржаўны аэракасмічны ўніверсітэт[d]
Званне	палкоўнік[d]
Узнагароды

Біяграфія

Нарадзіўся 1 лютага 1965 года ў вёсцы Шыповічы Кобрынскага раёна Брэсцкай вобласці ў сям’і педагогаў.

У 1985 годзе скончыў Курганскае вышэйшае ваенна-палітычнае авіяцыйнае вучылішча і быў накіраваны для праходжання службы ў Афганістан. Па 1998 год служыў на афіцэрскіх пасадах ва Узброеных Сілах Расійскай Федэрацыі. У 1998—2000 гадах выкладаў у Самарскім аэракасмічным універсітэце.

У 2000 годзе вярнуўся на радзіму, працаваў у Кобрынскім райвыканкаме начальнікам аддзела арганізацыйна-кадравай працы, намеснікам старшыні выканкама.

У 2004 годзе скончыў Акадэмію кіравання пры прэзідэнце Рэспублікі Беларусь і быў прызначаны на пасаду начальніка ўпраўлення ідэалагічнай працы Брэсцкага аблвыканкама. На гэтай пасадзе ён стаў вядомым тым, што ўвёў па серадах абавязковы беларускамоўны дзень у арганізацыі^[3].

У 2010 годзе заняў пасаду главы адміністрацыі Маскоўскага раёна горада Брэста. У інтэрв’ю пасля прызначэння заявіў, што: «мы з часам, канешне, але ўсё роўна пяройдзем на беларускую мову», хоць большасць грамадзянаў цяпер карыстаецца «расійскай мовай»^[3].

У 2012 годзе скончыў Інстытут павышэння кваліфікацыі і перападрыхтоўкі Брэсцкага дзяржаўнага тэхнічнага ўніверсітэта па спецыяльнасці «Эканоміка і кіраванне на прадпрыемстве прамысловасці».

14 кастрычніка 2014 года прэзідэнт Беларусі Аляксандр Лукашэнка даў згоду на прызначэнне Аляксандра Рагачука старшынёй Брэсцкага гарвыканкама. 15 кастрычніка 2014 года прызначэнне было падтрымана дэпутатамі гарсавета.

У час «Марша недармаедаў» 2017 года, накіраванага супраць прэзідэнцкага Дэкрэта № 3 «Аб папярэджанні сацыяльнага ўтрыманства» і эканамічнай палітыкі ўлад, Аляксандр Рагачук нечакана запрасіў на гутарку ў актавую залу гарвыканкама пратэстоўцаў, якія сабраліся каля будынка^[4]. На перамовах пратэстоўцы выказалі яму патрабаванне адмяніць дэкрэт, на што Рагачук паабяцаў перадаць гэтае патрабаванне «вышэйшым уладам»^[5].

27 сакавіка 2023 года была дадзена згода на прызначэнне мэрам Брэста Сяргея Лабадзінскага. Аляксандр Рагачук з 28 сакавіка 2023 года пайшоў у адстаўку з дзяржаўнай службы.

У маі 2023 года абраны старшынёй Брэсцкага абласнога аб’яднання прафсаюзаў^[6].

20 жніўня 2024 года на пасяджэнні прэзідыума Савета Брэсцкага абласнога аб’яднання прафсаюзаў члены прэзідыума Савета прагаласавалі за вызваленне ад пасады старшыні Брэсцкага абласнога аб’яднання прафсаюзаў Аляксандра Рагачука па пагадненні бакоў у сувязі з яго заявай^[7].

Узнагароды

• медаль «За адвагу» (СССР).
• Медаль «За баявыя заслугі».
• Ордэн свяціцеля Кірыла Тураўскага II ступені (2019)^[8].
• медаль «За працоўныя заслугі» (2020)^[9].

Сям’я

Жанаты, мае дачку.

Зноскі

1. Навіна пра прызначэнне
2. Стала вядома, за што звольнілі мэра Брэста Рагачука і куды яго прызначаць (нявызн.). Наша Ніва (27 сакавіка 2023).
3. Прыхільнік беларускай мовы стаў мэрам Брэста ФОТА
4. Некалькі тысяч людзей далучыліся да шэсця пратэсту ў Брэсце АНЛАЙН  (бел.). Наша Ніва (5 сакавіка 2017). Праверана 7 сакавіка 2017.
5. Старшыня Берасьцейскага гарвыканкаму паабяцаў шмат новых працоўных месцаў у будаўніцтве
6. Вечерний Брест. Рогачук Александр Степанович (руск.)
7. Александр Рогачук уходит с должности председателя Брестского областного объединения профсоюзов (руск.)
8. Мэр Бреста Александр Рогачук награжден орденом святителя Кирилла Туровского
9. Указ Прэзідэнта Рэспублікі Беларусь ад 8 студзеня 2020 года № 7 «Аб узнагароджанні»