Антон Францішак Брыль

У Вікіпедыі ёсць артыкулы пра іншых людзей з прозвішчам Брыль.

Антон Францішак Брыль (нар. 18 жніўня 1982, Мінск) — беларускі перакладчык і паэт.

Антон Францішак Брыль
Асабістыя звесткі
Дата нараджэння	18 жніўня 1982(1982-08-18) (42 гады)
Месца нараджэння	Мінск, Беларуская ССР, СССР
Грамадзянства	Беларусь
Бацька	Андрэй Брыль[d]
Альма-матар	ліцэй БДУ (1999) факультэт прыкладной матэматыкі і інфарматыкі БДУ (2004)
Месца працы	Гарадскі ўніверсітэт Дубліна
Прафесійная дзейнасць
Род дзейнасці	перакладчык, паэт
Мова твораў	беларуская
Прэміі	прэмія імя Карласа Шэрмана (2019) прэмія Цёткі

Біяграфія

Сын Андрэя Брыля, унук Янкі Брыля^[1]. Скончыў матэматычны клас Ліцэя БДУ (1999), факультэт прыкладной матэматыкі і інфарматыкі БДУ (2004) па спецыяльнасці «матэматык-праграміст». Атрымаў ступень PhD ў Трэнцкім універсітэце (2008) па спецыяльнасці «Машыннае навучанне». Працаваў на факультэце інфарматыкі Дублінскага гарадскога ўніверсітэта^[2]. Жыў у Дубліне, Цюрыху, Лондане.

Творчасць

Зборнік вершаў і малых паэм А. Ф. Брыля, напісаных у 2003—2011 гадах, «Не ўпаў жолуд» выйшаў у 2011 годзе^[1], казачная аповесць «Ян Ялмужна» выйшла асобным выданнем у 2014 годзе.

Аўтар першага перакладу на беларускую гімна Кэдмана, найранейшага помніка стараангліскай паэзіі. Пераклаў стараанглійскую паэму «Беавульф», урыўкі публікаваліся ў часопісах «Наша вера» і «Дзеяслоў», асобным выданнем, пад назвай «Бэўвульф», пераклад выйшаў у чэрвені 2013 года^[3][4]. Таксама пераклаў на беларускую паасобныя творы А. Э. Адынца, Ч. Дыкенса, У. Б. Ейтса, Катула, Марцыяла, С. Кларк, Ф. Д. Князьніна, Ю. У. Нямцэвіча, Д. Толкіна і інш.

Выявіў у бібліятэцы АН Літвы і падрыхтаваў да друку санеты Б. Янкоўскага^[5].

Прызнанне

• Фіналіст конкурсу маладых літаратараў імя У. Караткевіча (2005)^[1].
• Зборнік А. Ф. Брыля «Не ўпаў жолуд» заняў 2-е месца сярод дзесяці найбольш значных літаратурна-мастацкіх выданняў 2011 года паводле версіі часопіса «Маладосць»^[6], 10-е месца паводле версіі газеты «Наша Ніва»^[7], прызнаны лепшай дэбютнай кнігай паэзіі 2011 года паводле Беларускага ПЭН-цэнтра і Саюза беларускіх пісьменнікаў^[2].
• Лаўрэат прэміі часопіса «ПрайдзіСвет» (2011) за пераклады з польскай Ф. Д. Князьніна, А. Э. Адынца, Ю. У. Нямцэвіча і з лацінскай Катула^[8].
• Лаўрэат прэміі імя Карласа Шэрмана (2019) за зборнік перакладаў з лацінскай «Выбраныя вершы» паэзіі Марцыяла^[9].
• Лаўрэат прэміі Цёткі ў намінацыі «Найлепшая кніга для дзяцей і падлеткаў» з кнігай «Мышыныя Каляды» (2022).