Бернард Комры

У Вікіпедыі ёсць артыкулы пра іншых людзей з прозвішчам Комры.

Бе́рнард Ко́мры (англ.: Bernard Comrie; вымаўляецца /bɜːnəd kɒmriː/; нар. 23 мая 1947, Сандэрленд) — брытанскі лінгвіст, які пражывае ў ЗША і доўгі час працаваў у Германіі; адзін з найбуйнейшых і найбольш вядомых сучасных тыполагаў, паліглот, які свабодна валодае многімі еўрапейскімі і нееўрапейскімі мовамі.

Бернард Комры
англ.: Bernard Comrie
Дата нараджэння	23 мая 1947(1947-05-23)[1] (78 гадоў)
Месца нараджэння	Сандэрленд, County Borough of Sunderland[d], графства Дарэм, Англія, Вялікабрытанія
Грамадзянства	Вялікабрытанія  Германія
Род дзейнасці	мовазнавец
Навуковая сфера	мовазнаўства
Месца працы	Лейпцыгскі ўніверсітэт Каліфарнійскі ўніверсітэт у Санта-Барбары Інстытут эвалюцыйнай антрапалогіі таварыства Макса Планка
Альма-матар	Кембрыджскі ўніверсітэт
Член у	Саксонская акадэмія навук[d] Еўрапейская акадэмія[2] Нідэрландская каралеўская акадэмія навук
Узнагароды	CSS Fellow[d] член Брытанскай акадэміі[d] Neil and Saras Smith Medal for Linguistics[d] (2017)

Адзін з дырэктараў Інстытута эвалюцыйнай антрапалогіі імя Макса Планка ў Лейпцыгу, першы старшыня міжнароднай Асацыяцыі лінгвістычнай тыпалогіі (1995—1999), ганаровы прафесар Каліфарнійскага ўніверсітэта ў Санта-Барбары (з 2002), член-карэспандэнт Брытанскай акадэміі (з 1999), Замежны член РАН (з 2016), ганаровы член многіх іншых замежных акадэмій і ганаровы доктар многіх універсітэтаў.

Біяграфія

Пачатковы перыяд навуковай дзейнасці Комры звязаны з Кембрыджскім універсітэтам, які ён скончыў у 1968 годзе і дзе пазней абараніў кандыдацкую дысертацыю (1972) і да 1978 года выкладаў розныя курсы, у тым ліку і на аддзяленні славянскіх даследаванняў. З 1978 па 1998 год ён працуе ў ЗША, выкладаючы ва ўніверсітэце Паўднёвай Каліфорніі (Лос-Анджэлес). У 1997 годзе ўзначальвае аддзяленне лінгвістыкі Інстытута эвалюцыйнай антрапалогіі Макса Планка ў Лейпцыгу, якое пад кіраўніцтвам Комры ператварылася ў найбуйнейшы ў Еўропе і адзін з найбольш значных у свеце даследчых цэнтраў па лінгвістычнай тыпалогіі. Аддзяленне закрыта ў 2015 годзе праз выхад Комры на пенсію.

У канцы 1970-х гадоў праходзіў стажыроўку ў Савецкім Саюзе, вывучаючы неславянскія мовы СССР, у прыватнасці, мовы Крайняй Поўначы і Каўказа. Падтрымлівае актыўныя асабістыя кантакты з многімі расійскімі тыполагамі.

Прэзідэнт Еўрапейскага лінгвістычнага таварыства ў 2007—2008 гадах.

Сям’я

Жонка — Акіко Кумахіра Комры, лінгвіст паводле адукацыі, у 1988 годзе абараніла ў ЗША дысертацыю аб «плаваючых квантарах» у японскай мове^[3].

Уклад у навуку

Навуковыя інтарэсы Комры разнастайныя, але асноўныя яго працы прысвечаны развіццю тэорыі моўных універсалій, граматычнай і сінтаксічнай тыпалогіі і тыпалагічнаму вывучэнню моў свету. Ён займаўся інтэнсіўнай палявой працай у розных арэалах (ад Дагестана да Новай Гвінеі), у яго даследаваннях актыўна выкарыстоўваецца матэрыял індаеўрапейскіх, уральскіх, японскай, нахска-дагестанскіх, чукоцка-камчацкіх, семіцкіх, аўстралійскіх, папуаскіх і многіх іншых моў. Найбольш вядомыя яго манаграфіі па тэорыі моўных універсалій у марфалогіі і сінтаксісе (1981), а таксама тыпалагічныя агляды катэгорый віду (1976, выпраўленыя выданні 1978 і 1981, усяго кніга вытрымала 9 выданняў, а таксама перакладзена на японскую і карэйскую мовы) і часу (1985) у мовах свету. Комры прымаў актыўны ўдзел у лейпцыгскім праекце Сусветнага атласа моўных структур (WALS), апублікаваным у 2005 г., і ў цяперашні час працягвае даследаванні моў Каўказа.

Асноўныя публікацыі

• Aspect: an introduction to the study of verbal aspect and related problems. Cambridge University Press, 1976.
• The languages of the Soviet Union. Cambridge University Press, 1981.
• Language universals and linguistic typology: syntax and morphology. Oxford: Blackwell, Chicago: University of Chicago Press, 1981.
• Tense. Cambridge University Press, 1985.
• The world’s major languages / Ed. by Bernard Comrie. London: Croom Helm, Oxford: Oxford University Press, 1987.
• Комри Б., Мэтьюс С., Полински М., Эйтчисон Д. Атлас языков мира. М.: Лик пресс, 1998.
• The World Atlas of Language Structures / Ed. by Martin Haspelmath, Matthew S. Dryer, David Gil and Bernard Comrie. Oxford University Press, 2005.
• Халилов М. Ш., Комри Б. Словарь языков и диалектов народов Северного Кавказа: сопоставление основной лексики. Лейпциг, Махачкала: Институт эволюционной антропологии им. Макса Планка, 2010. — ISBN 978-3-00-035064-1