Бярозаўскі сыраробны камбінат

Бярозаўскі сыраробны камбінат — прадпрыемства малочнай прамысловасці ў Бярозе (Беларусь)^[1], раней уваходзіў у склад канцэрна Брэстмясамалпрам^[2], у 2018 годзе прыватызаваны без аўкцыёну, уваходзіць у ААТ «Савушкін прадукт». Асноўная прадукцыя — паўцвёрдыя сычужныя сыры, плаўленыя сыры, таксама выпускае пітное малако, кефір, ражанку, смятану, тварог і тварожныя прадукты, марожанае, сухія малочныя канцэнтраты і паўфабрыкаты.

Бярозаўскі сыраробны камбінат
Тып	прадпрыемства
Заснаванне	1944
Размяшчэнне	Беларусь: горад Бяроза
Адрас	Бяроза
Галіна	малочная прамысловасць (МСГК: 1050)
Прадукцыя	Сыр, плаўлены сыр, масла, маянэз, тварог, сыракваша, ражанка, заменнік неразведзенага малака, біянапоі, марожанае, тварожныя сыркі
Сайт	cheese.by

Гісторыя

У жніўні 1944 года на тэрыторыі Бярозаўскага раёна пачаў працу раённы маслапрам, які ўключаў Бярозаўскі галаўны маслазавод, а таксама Сялецкі, Пяскоўскі і Сігневіцкі нізавыя маслазаводы. Нарыхтоўка малака, масла і тлушчазаменнікаў ажыццяўлялася як ад аднаасобных гаспадарак, так і ад насельніцтва^[3].

У межах рэканструкцыі ў 1959 годзе быў уведзены новы парамеханізаваны масларобны завод, здольны перапрацоўваць 30 тон малака ў змену^[3]. У 1965—1967 гадах быў пабудаваны масларобна-сыраробны завод, здольны перапрацоўваць 50 тон малака ў змену, што дазволіла значна пашырыць асартымент выпускаемай прадукцыі: пачаўся выпуск новых відаў масла, кісламалочнай прадукцыі і смятаны, а таксама асвоена вытворчасць расійскага сыру^[3].

У 1981 годзе пачата чарговая рэканструкцыя прадпрыемства^[4], у снежні 1986 года была ўведзена ў эксплуатацыю першая лінія новай вытворчасці магутнасцю перапрацоўкі 280 тон малака ў змену^[5], а на пачатку 1988 года ўведзены ў эксплуатацыю цэх плаўленых сыроў^[6].

У 1994 годзе прадпрыемства пераўтворана ў адкрытае акцыянернае таварыства «Бярозаўскі сыраробны камбінат»^[7]. У снежні 2006 года запушчана аўтаматызаваная лінія па выпуску цвёрдых сыроў прадукцыйнасцю 30 тон гатовай прадукцыі ў суткі^[7].

У верасні 2011 года прадпрыемствам быў набыты СВК «Земляроб» (увайшоў у склад сельскагаспадарчага філіяла «Прамень»), а таксама запушчана другая аўтаматызаваная лінія па выпуску цвёрдых сыроў прадукцыйнасцю 40 тон у суткі^[7].

У 2018 годзе Аляксандр Лукашэнка дазволіў прыватызаваць прыбытковае прадпрыемства без аўкцыёну: кантрольны пакет акцый прадалі кампаніі «Савушкін прадукт» Аляксандра Машэнскага. Колькасць работнікаў камбіната, уключаючы філіялы, за 2018—2019 гады скарацілася з 1503 да 1103 чалавек^[8][9].

Геаграфія экспарту

Асноўным імпарцёрам прадукцыі прадпрыемства з’яўляецца Расійская Федэрацыя. Акрамя таго, прадпрыемства супрацоўнічае з такімі краінамі, як Украіна, Казахстан, Туркменістан, Азербайджан, Арменія, Малдова, Літва, Нідэрланды, Францыя, Германія, Чэхія, Польшча, Балгарыя, В’етнам, Кітай, Латвія, Мексіка і ЗША^[1].

Склад прадпрыемства

Акрамя асноўнай вытворчай пляцоўкі ў горадзе Бяроза, у склад прадпрыемства ўваходзяць: Іванаўскі цэх у горадзе Іванава, Івацэвіцкі цэх у горадзе Івацэвічы, СВК «Прамень»^[5].