Выдра

У паняцця ёсць і іншыя значэнні, гл. Выдра (значэнні).

Выдра, або звычайная выдра, або парэшня (Lutra lutra) — від драпежных млекакормячых сямейства куніцавых, які вядзе паўводны спосаб жыцця; адзін з трох відаў роду выдр (Lutra).

Выдра
Навуковая класіфікацыя
прамежныя рангі Дамен:  Эўкарыёты Царства:  Жывёлы Падцарства:  Эўметазоі Без рангу:  Двухбакова-сіметрычныя Без рангу:  Другаснаротыя Тып:  Хордавыя Падтып:  Пазваночныя Інфратып:  Сківічнаротыя Надклас:  Чацвераногія Клас:  Млекакормячыя Падклас:  Звяры Інфраклас:  Плацэнтарныя Надатрад:  Laurasiatheria Атрад:  Драпежныя Падатрад:  Сабакападобныя Інфраатрад:  Arctoidea Парватрад:  Куніцыпадобныя Сямейства:  Куніцавыя Падсямейства:  Lutrinae Род:  Выдры Від:  Выдра
Міжнародная навуковая назва
Lutra lutra Linnaeus, 1758
Арэал
Ахоўны статус
Блізкія да ўразлівага становішча IUCN 3.1 Near Threatened : / 12419
Сістэматыка на Віківідах Выявы на Вікісховішчы ITIS   621916 NCBI   9657 EOL   328044 FW   157463

Апісанне

Выдра — даволі буйны звер з выцягнутым, гнуткім целам абцякальнай формы. Даўжыня цела — 55-95 см, хваста — 26-55 см, маса — 6-10 кг. Тулава гнуткае, мускулістае, лапы кароткія, пальцы злучаны перапонкамі. Хвост мускулісты, непухнаты.

Афарбоўка поўсці: зверху цёмна-бурая, бліскучая, знізу светлая, серабрыстая. Асцёвыя валасы грубыя, але апушша вельмі густое і пяшчотнае. Будова яе цела прыстасаваная для плавання пад вадой: плоская галава, кароткія лапы, доўгі хвост і гідрафобная поўсць.

Пашырэнне

Пашырана ў Еўропе, Азіі, Паўночна-Заходняй Афрыцы. На Беларусі трапляецца па ўсёй тэрыторыі, найбольш у паўночных і цэнтральных зонах; нешматлікая.

Сустракаюцца на захламленых рэках з абрывістымі берагамі, незамярзаючымі ямамі і перакатамі, каля старыц, па азёрах з густой расліннасцю па берагах, буйных каналах і ў іншых мясцінах, багатых рыбай.

Асаблівасці біялогіі

Тэрытарыяльны від, межы сваіх участкаў рэгулярна маркіруе. Селіцца ў норах або іншых укрытых сховішчах. Актыўная пераважна ноччу. Добра плавае і нырае. Корміцца пераважна рыбай, зрэдку ракамі, вадзянымі пацукамі, жабамі.

Жыве да 11 гадоў. Палавой спеласці самкі дасягаюць на дргім, самцы — на трэцім-чацвёртым годзе жыцця. Цяжарнасць 61—63 сутак, дзіцяняты (2—5) нараджаюцца найчасцей у красавіку — чэрвені. Малыя кормяцца малаком самкі да 2,5 месяцаў, плаваць яны пачынаюць у двухмесячным узросце. На працягу 8—10 месяцаў трымаюцца разам з самкай, якая яшчэ падкормлівае дзіцянят.

Промысел

Аб’ект промыслу дзеля цёплага і прыгожага футра.

Літаратура

• Самусенка Э. Р.. Выдра // Энцыклапедыя прыроды Беларусі. У 5-і т. Т. 1. Ааліты — Гасцінец / Рэдкал. І. П. Шамякін (гал. рэд.) і інш. — Мн.: БелСЭ імя Петруся Броўкі, 1983. — 575 с., іл. — 10 000 экз.