Віктар Васільевіч Вабішчэвіч

У Вікіпедыі ёсць артыкулы пра іншых людзей з прозвішчам Віктар Вабішчэвіч.

Віктар Васільевіч Вабішчэвіч (9 ліпеня 1960(1960-07-09)^[1], Рубель, Брэсцкая вобласць^[2] — 20 жніўня 2025(2025-08-20)^[2], Столінскі раён, Брэсцкая вобласць^[2]) — беларускі паэт, настаўнік, гісторык і краязнаўца.

Віктар Васільевіч Вабішчэвіч
Асабістыя звесткі
Дата нараджэння	9 ліпеня 1960(1960-07-09)[1]
Месца нараджэння	Рубель, Рубельскі сельсавет, Давыд-Гарадоцкі раён, Брэсцкая вобласць, Беларуская ССР, СССР[2]
Дата смерці	20 жніўня 2025(2025-08-20)[2] (65 гадоў)
Месца смерці	Столінскі раён, Брэсцкая вобласць, Беларусь[2]
Альма-матар	гістарычны факультэт БДУ (1982)
Прафесійная дзейнасць
Род дзейнасці	паэт, настаўнік, гісторык, краязнавец
Грамадская дзейнасць
Член у	Саюз беларускіх пісьменнікаў
Прэміі	Літаратурная прэмія імя Уладзіміра Калесніка

Біяграфія

Нарадзіўся ў 1960 годзе ў вёсцы Рубель. Скончыў Рубельскую сярэднюю школу з залатым медалём. Пасля паступіў на гістарычны факультэт БДУ, які ў 1982 годзе скончыў з чырвоным дыпломам^[3][4]. Працаваў у Арлоўскай сярэдняй школе, пазней перайшоў у СШ № 1 Давыд-Гарадка^[4]. Выкладаў гісторыю і мастацкую культуру^[3]. Жыў у Давыд-Гарадку^[5]. Памёр па дарозе ў родную вёску 20 жніўня 2025 года^[3].

Дзейнасць

Першыя вершы Віктара з’явіліся ў друку ў 1977 годзе. Творы друкаваліся ў газетах «Навіны Палесся», «Заря», «Народная трыбуна», «Настаўніцкая газета», часопісах «Роднае слова», «Маладосць», «Полымя», «Першацвет», калектыўных зборніках «Вусны» (1985), «Квадра» (1990)^[4].

Даследаваў творчасць беларускіх класікаў, удзельнічаў у падрыхтоўцы навуковых і краязнаўчых выданняў. З’яўляўся сябрам Саюза беларускіх пісьменнікаў^[3].

Асабістае жыццё

Бацька працаваў на трактары ў калгасе. Маці закончыла толькі чатыры класы, але ведала на памяць шмат вершаў Янкi Купалы, Якуба Коласа, iншых паэтаў^[6].

Бібліяграфія

• «Чорны боль» (2003)^[3]
• «Кахаю і люблю» (2006)^[3]
• «Уражанне» (2009)^[3]
• «ORBI» (2012)^[4]

Узнагароды

• Лаўрэат літаратурнай прэміі імя Уладзіміра Калесніка (2010)^[4]