Загорнае (возера)

У паняцця ёсць і іншыя значэнні, гл. Загорнае.

Заго́рнае, Хвасты^[1] — возера ў Браслаўскім раёне Віцебскай вобласці Беларусі. Знаходзіцца за 27 км у напрамку на паўднёвы захад ад Браслава каля вёскі Хвасты ў басейне ракі Дрысвята. Належыць да групы Рычана-Дрысвяцкіх азёраў.

Загорнае
Морфаметрыя
Вышыня над узроўнем мора	140,4 м
Даўжыня	1,49 км
Шырыня	0,4 км
Плошча	0,36 км²
Аб’ём	0,00115 км³
Даўжыня берагавой лініі	4,13 км
Найбольшая глыбіня	6,7 м
Сярэдняя глыбіня	3,2 м
Гідралогія
Салёнасць	0,175—0,2 ‰
Празрыстасць	1 м
Басейн
Плошча вадазбору	2,9 км²
Размяшчэнне
Краіна	Беларусь
Рэгіён	Віцебская вобласць
Загорнае
Загорнае

Плошча возера Загорнае складае 0,36 (0,37^[1]) км². Найбольшая глыбіня 6,7 м, сярэдняя 3,2 м. Даўжыня 1,49 км, найбольшая шырыня 0,4 км. Даўжыня берагавой лініі 4,13 км. Аб'ём вады ў возеры складае 1,15 млн м³, плошча вадазбору 2,9 км².
Катлавіна возера выцягнутая ў напрамку з паўночнага захаду на паўднёвы ўсход. Схілы катлавіны маюць вышыню 3—5 м, разараныя. Берагавая лінія звілістая. Берагі вадаёма невысокія, не перавышаюць 0,1—0,3 м, пясчаныя, знаходзяцца пад хмызняком. Мелкаводдзе вузкае, стромкае, пясчанае. На большых глыбінях дно глеістае. Глыбіні да 2 м займаюць каля 22 % плошчы возера. Возера эўтрофнае, слабапраточнае. Зарастае падводнай расліннасцю да глыбіні 3 м. У возера ўпадаюць ручаі і на паўночным захадзе выцякае ручай, злучаючы Загорнае праз невялікае возера з ракой Дрысвята.

У возеры водзяцца шчупак звычайны, лешч, акунь, лінь, плотка, карась і інш. Зарыблялася сазаном.

Зноскі

1. Постановление Министерства сельского хозяйства и продовольствия Республики Беларусь 18 июня 2014 г. № 29 «О Республиканской комплексной схеме размещения рыболовных угодий» Архівавана 17 красавіка 2018. (руск.)