Капліца ў імя святога дабравернага князя Аляксандра Неўскага (Гомель)

Капліца ў імя святога дабравернага князя Аляксандра Неўскага — праваслаўная капліца ў Гомелі, якая размяшчаецца на рагу вуліц Савецкай і Кірава. Прысвечана воінам-вызваліцелям у Вялікай Айчыннай вайне. Адкрыта 11 жніўня 2022 г. З’яўляецца сучаснай архітэктурнай рэплікай капліцы канца ХІХ ст. у памяць расійскага імператара Аляксандра ІІ,  збудаванай у псеўдарускім стылі на колішняй Саборнай плошчы Гомеля^[1].

Капліца
Капліца ў імя святога дабравернага князя Аляксандра Неўскага
Краіна	Беларусь
Горад	Гомель
Месцазнаходжанне	Гомель
Канфесія	праваслаўе
Епархія	Гомельская
Будаўніцтва	2021—2022 гады

Унутры капліцы размяшчаюцца тры ківоты з іконамі святога Аляксандра Неўскага (як «абронцы Святой Русі і заступніка воінаў»^[2]), свяціцеля Іаана Златавуста (у дзень яго памяці 26 лістапада 1943 г. Гомель быў вызвалены ад нямецка-фашысцкай акупацыі), святога Георгія Пераможцы (як сімвал перамогі у Вялікай Айчыннай вайне)^[1].

Апроч таго ў капліцы сабрана 990 капсул з зямлёй з брацкіх магіл і воінскіх пахаванняў з усіх раёнаў Гомельскай вобласці і дзве капсулы з зямлёй з мемарыяльнага комплекса «Азарыцкі лагер смерці» (г. п. Азарычы, Калінкавіцкі раён) і мемарыяла «Помнік дзецям — ахвярам Вялікай Айчыннай вайны» (в. Красны Бераг, Жлобінскі раён)^[1].

Аб планах узвядзення капліцы было заяўлена ўлетку 2020 г. Абвяшчалася, што будаўніцтва будзе ажыццяўляцца прыходам гомельскага Петра-Паўлаўскага кафедральнага сабора^[3]. Першы камень пры будаўніцтве быў урачыста закладзены 31 мая 2021 г.^[4]

Месца ўзвядзення капліцы з’яўляецца крайнім пунктам паўночнай ускраіны колішняга рабочага пасёлка Чырвоны Кастрычнік.

Зноскі

1. Часовню во имя князя Александра Невского в память о воинах-освободителях открыли в Гомеле // БелТА. 11 августа 2022.
2. Митрополит Вениамин совершил чин освящения часовни-памятника в честь святого благоверного князя Александра Невского в городе Гомеле // Официальный портал Белорусской Православной Церкви. 11 августа 2022.
3. У Гомелі плануецца будаўніцтва капліцы-помніка ў гонар святога Аляксандра Неўскага // Афіцыйны партал Беларускай Праваслаўнай Царквы. 18 чэрвеня 2020.
4. У Гомелі заклалі першы камень пры будаўніцтве капліцы ў гонар воінаў-вызваліцеляў // БелТА. 1 чэрвеня 2021.