Касцёл Адведзін Найсвяцейшай Дзевы Марыі (Ракаў)

Касцёл Адведзін Найсвяцейшай Дзевы Марыі Ружанцовай (Св. Дамініка) — неагатычны каталіцкі храм, размешчаны ў цэнтры вёскі Ракаў Валожынскага раёна Мінскай вобласці Беларусі, помнік архітэктуры рэгіянальнага значэння^[1].

Славутасць
Касцёл Адведзін Найсвяцейшай Дзевы Марыі
53°57′56,12″ пн. ш. 27°03′21,29″ у. д.HGЯO
Краіна	Беларусь
Аграгарадок	Ракаў
Канфесія	Рымска-каталіцкая царква
Епархія	Мінска-Магілёўская дыяцэзія
Архітэктурны стыль	неаготыка
Дата пабудовы	1906 год
Статус	Гісторыка-культурная каштоўнасць Беларусі, шыфр 613Г000096шыфр 613Г000096
Медыяфайлы на Вікісховішчы

У паняцця ёсць і іншыя значэнні, гл. Касцёл Адведзін Найсвяцейшай Дзевы Марыі.

Гісторыя будаўніцтва

Драўляны храм

• 1676 г. — будаўніцтва першага, драўлянага касцёла князем Геранімам Сангушкам.
• 1687 г. — Канстанцыя Тэадора Сангушка (з Сапегаў) фундавала пры касцёле кляштар дамініканцаў.
• 1712 г. — кляштар згарэў і быў адбудаваны намаганнямі айца Валадковіча.
• 1812 г. — касцёл спалены падчас руска-французскай вайны.
• 1824 г. — касцёл адноўлены, зноў у драўляным выглядзе.
• 1835 г. — скасаваны кляштар дамініканцаў, а касцёлу нададзены статус парафіяльнага.

Мураваны храм

Марыінскі касцёл, бакавы фасад

Інтэр'ер касцёла

Мураваны храм быў узведзены ў 1906 г. з жоўтай цэглы намаганнямі ксяндза Яўстахія Карповіча замест драўлянага касцёла Маці Божай Ружанцовай. Вялікі ўклад у будаўніцтва храма зрабілі князь Геранім Эдвінавіч Друцкі-Любецкі, памешчыкі Булгакі, Здзяхоўскія, Хелхоўскія і ўсе парафіяне. У 1911 г. пажар знішчыў драўляную плябанію, але не зачапіў храм. Пасля 2-ой сусветнай вайны храм не дзейнічаў. Набажэнствы аднавіліся толькі ў пачатку 1990-х гадоў.

Архітэктура

Помнік архітэктуры неаготыкі. 3-нефная 2-вежавая базіліка з трансептам і круглай апсідай. У архітэктурным афармленні шырока выкарыстаныя неагатычныя элементы: ступеньчатыя контрфорсы, высокія спічастыя аконныя праёмы і нішы, зубчатыя фрызы, аркатурныя паясы, ружа-акно на фасадзе. У інтэр'еры — спічастыя скляпенні.

Зноскі

1. склад. В.Я. Абламскі, І.М. Чарняўскі, Ю.А. Барысюк. Дзяржаўны спіс гісторыка-культурных каштоўнасцей Рэспублікі Беларусь. — Мн.: БЕЛТА, 2009. — 684 с. — ISBN 978-985-6828-35-8.