Касцёл Святых Анёлаў-Ахоўнікаў (Раготна)

Касцёл Анёлаў-Ахоўнікаў — каталіцкі храм у аграгарадку Раготне Дзятлаўскага раёна Гродзенскай вобласці. Помнік архітэктуры позняга класіцызму^[1].

Каталіцкі храм
Касцёл Анёлаў-Ахоўнікаў
53°20′53,26″ пн. ш. 25°29′13,42″ у. д.HGЯO
Краіна	Беларусь
Аграгарадок	Раготна
Канфесія	Каталіцтва
Епархія	Гродзенская дыяцэзія
Дэканат	Дзятлаўскі
Архітэктурны стыль	класіцызм
Дата пабудовы	1840 год
Статус	Гісторыка-культурная каштоўнасць Беларусі, шыфр 413Г000704шыфр 413Г000704
Стан	дзейнічае
Медыяфайлы на Вікісховішчы

Гісторыя

Касцёл у 1915 годзе.

Парафія створана ў 1400 годзе, сённяшні касцёл пабудаваны ў 1840 годзе. У 1866 годзе быў ператвораны ў Раства-Багародзіцкую царкву і перабудаваны па праекце гродзенскага архітэктара Мікалая Ціхвінскага^[2]. У 1920-я гады быў вернуты католікам. У 1947 годзе зачынены, пераабсталяваны ў краму, вернуты ў 1988 годзе^[3][4]. Зноў асвячоны ў 1989 годзе. На 1997 годзе налічвалася 845 парафіян.

Архітэктура

Вырашаны магутным прамавугольным ў плане аб’ёмам, накрытым двухсхільным дахам. Галоўны фасад фланкіраваны чацверыковымі вежамі-званіцамі і вылучаны шасцікалонным порцікам з вялізным антаблементам. Фасады рытмічна члянёны лучковымі аконнымі праёмамі і пілястрамі ў прасценках. На трохвугольным франтоне порціка і гранях вежаў — арачныя нішы і аконныя праёмы^[1].

Зноскі

1. Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, 1986. — Гродзенская вобласць. — 371 с., іл.
2. Кулагин А. Н. Гродненские зодчие XIX — начала XX веков (новые архивные изыскания). // Пытанні мастацтвазнаўства, этналогіі і фалькларыстыкі. Выпуск 24. — Мінск, «Права і эканоміка». — 2018. — С. 78
3. Раготна — парафія Святых Анёлаў Ахоўнікаў
4. Касцёл святых Анёлаў-Ахоўнікаў (Раготна, вёска; Дзятлаўскі раён)