Клаўдзія Фёдараўна Калітоўская

Клаўдзія Фёдараўна Каліто́ўская (12 жніўня 1911, в. Уселюб, Навагрудскі раён, Гродзенская вобласць — 4 сакавіка 2002^[1]) — беларуская артыстка балета. Заслужаная дзяячка культуры Беларусі (1967).

Клаўдзія Фёдараўна Калітоўская
Дата нараджэння	12 жніўня 1911(1911-08-12)
Месца нараджэння	Уселюб, Навагрудскі павет, Мінская губерня, Расійская імперыя
Дата смерці	4 сакавіка 2002(2002-03-04) (90 гадоў)
Грамадзянства	Расійская імперыя  СССР  Беларусь
Муж	Георгій Мікалаевіч Пятроў
Адукацыя	Мінскі музычны тэхнікум (1930) Беларуская студыя оперы і балета (1933)
Прафесія	балерына
Тэатр	Нацыянальны акадэмічны Вялікі тэатр оперы і балета Рэспублікі Беларусь Беларуская дзяржаўная харэаграфічная гімназія-каледж
Узнагароды

Біяграфія

Клаўдзія Фёдараўна Калітоўская нарадзілася ў 1911 годзе ў мястэчку Уселюб Наваградскага павета, дзе яе бацька Фёдар Марцінавіч Калітоўскі працаваў лясным кандуктарам графа О’Рурка. Бацьку праз год перавялі ў Мінск, дзе і прайшлі дзіцячыя гады Клаўдзіі. ^[2] У 1930 годзе скончыла харэаграфічнае аддзяленне Беларускага музычнага тэхнікума, у 1933 годзе — Беларускую студыю оперы і балета. Першай балетнай пастаноўкай, у якой Калітоўскай давялося паўдзельнічаць, стаў балет Р. Гліэра «Чырвоны мак», пастаўлены ў 1933 годзе Л. Крамарэўскім, дырыжыраваў Георгій Пятроў. Праз год гледачы змаглі ўбачыць яе ў балеце «Капелія», а ў 1936 годзе — «Канёк-Гарбунок» Ц. Пуні.^[2]

У 1933—1937 і 1945—1951 гадах — артыстка Дзяржаўнага тэатра оперы і балета Беларусі.

У 1937 годзе разам з мужам Г. Пятровым уехала ў Алма-Ату, дзе нядаўна быў створаны Дзяржаўны аб’яднаны тэатр казахскай і рускай оперы і стваралася балетная трупа.^[2]

У 1945 годзе Георгій Пятроў і Клаўдзія Калітоўская атрымалі запрашэнне вярнуцца на працу ў Мінск. Танцавала ў балетах «Арлекінада», «Раймонда», «Дон Кіхот», «Князь-возера», «Доктар Айбаліт», «Канёк-Гарбунок», «Лебядзінае возера» і іншых. ^[2]

У 1951 годзе Клаўдзія Фёдараўна Калітоўская пакінула балетную сцэну.^[2] У 1951—1975 гадах — дырэктар Беларускага харэаграфічнага вучылішча.

Зноскі

1. Клаўдзія Фёдараўна Калітоўская (нявызн.). Беларусь у асобах і падзеях. Праверана 13 сакавіка 2022.
2. Артыстка балета з Уселюба (нявызн.)(недаступная спасылка). Архівавана з першакрыніцы 13 сакавіка 2022. Праверана 13 сакавіка 2022.