Перадплюсна

Перадплюсна́^[1][2] (лац.: tarsus) — сукупнасць невялікіх касцей ступні, якія размешчаны паміж вяліка- і малагалёнкавай касцямі галёнкі (праксімальна) і касцямі плюсны (дыстальна). Сустаў, які ўтвараецца паміж касцямі галёнкі і перадплюсной, дакладней яе тараннай косцю, называецца галёнкаступнёвым.

Косці перадплюсны чалавека (злева — від правай ступні знізу; справа — від правай ступні зверху): A — пятачная, B — таранная, C — кубападобная, D — чоўнападобная, E-F-G — латаральная, прамежкавая і медыяльная клінападобныя косці.

Перадплюсна ўтвараецца сямю кароткімі губчатымі касцямі, якія, падобна да касцей запясця, размешчаны ў два шэрагі. Задні, ці праксімальны, шэраг складаецца з дзвюх буйных касцей: тараннай і пятачнай, якая ляжыць пад ёй. Пярэдні, ці дыстальны, шэраг складаецца з медыяльнага і латаральнага аддзелаў. Медыяльны аддзел утвораны чоўнападобнай косцю і трыма клінападобнымі касцямі. У латаральным аддзеле знаходзіцца толькі кубападобная косць^[3].

Галерэя

• 
  Косці правай ступні, від зверху (тыльная паверхня)
• 
  Косці правай ступні, від знізу (падэшвавая паверхня)
• 
  Косці левай ступні, від знутры
• 
  Косці левай ступні, від знадворку