Сем камянёў

«Сем камянёў» — кніга беларускага аўтара Аляксея Шэіна. Жанр — мастацкая проза, фэнтэзі. Выдадзена ў 2015 годзе выдавецтвам «Пазітыў-цэнтр».

Сем камянёў
Жанр	казка і фэнтэзі
Аўтар	Аляксей Георгіевіч Шэін
Мова арыгінала	беларуская
Дата першай публікацыі	2015
Выдавецтва	Пазітыў-цэнтр
Колькасць старонак	416
Афармленне	Раман Сустаў
Электронная версія
ISBN	978-985-6983-53-8

Сюжэт

Галоўны герой кнігі, хлопец па імі Ясь, апынуўся ў дзівоснай краіне Эферыі. Ён імкнецца разгадаць загадку крышталёў, тайна якіх схавана ў вяках, для выратавання жыцця сваёй сяброўкі. Пра прыход героя, якім акажацца сам Ясь, гаворыцца ў старажытных летапісах, якія называюць яго «Дастойным». Толькі ён адзін зможа раскрыць таямніцу Сямі Камянёў^[1].

У чароўнай краіне Эферыі хлопцу Ясю даводзіцца змагацца за жыццё сваёй невылечна хворай сяброўкі Міркі. Выпадкова хлопец чуе, што ў гэтай краіне калісьці была крыніца жывой вады. Але, каб яе адшукаць, трэба спачатку знайсці сем камянёў, якія і падкажуць, дзе схаваная гэта крыніца.

Сама ж краіна знаходзіцца пад прыгнётам самазванца, які захапіў уладу і несправядліва кіруе народам. І паралельна галоўны герой змагаецца і за вяртанне свабоды краіне Эферыі^[2].

Змест

• Першы дзень
• Другі дзень
• Трэці дзень
• Чацвёрты дзень
• Пяты дзень
• Шосты дзень
• Сёмы дзень

Водгукі

Літаратурны крытык Ганна Янкута пісала пра кнігу: «Гэта раман пра цуды, якія, хоць і здараюцца ў дзівосным свеце, закліканыя падкрэсліць, што ў цудзе няма нічога надзвычайнага. А яшчэ — пра прыгоды, перажыць якія таемна марыць ці не кожны захоплены чытач. Падазраю, што ад узросту гэта не залежыць».

На думку журналісткі і адной з аўтарак праекту Velvet.by Ганны Севярынец: «Раман — вельмі цікавы. Неспрактыкаваны чытач знойдзе ў ім асаблівы свет, захапляльны сюжэт і цікавых герояў, спрактыкаваны — выявіць глыбокую хрысціянскую падаплёку. Сем частак рамана, сем цудоўных камянёў, сем дзён стварэння свету, персанажы, у якіх так раптоўна адгадваюцца героі, вядомыя нам паводле зусім іншых гісторыяў… Па-мойму, у беларускай літаратуры нічога падобнага пакуль яшчэ не было. Зусім. І вось з’яўляецца»^[1].

Прэміі

• 2017 год — кніга адзначана Еўрапейскім таварыствам навуковай фантастыкі як лепшы літаратурны дэбют. Прэмія штогод уручаецца прадстаўнікамі Таварыства на Eurocon — еўрапейскім кангрэсе навуковай фантастыкі, які ў 2017 годзе прайшоў у нямецкім Дортмундзе^[3][4].

Намінацыі

• 2016 год — намінавана на літаратурную Прэмію Цёткі ў катэгорыі «Найлепшая кніга для дзяцей і падлеткаў»^[5].
• 2016 год — намінавана на літаратурную Прэмію Ежы Гедройця^[6].
• 2016 год — намінавана на літаратурную прэмію «Кніга году»^{[крыніца?]}.